2 Petrus 1:4 - En Taar Weru a nunuwu' é Tontemboan

⁴ Tanu siituo si Amang Kasuruan méé mai kamang lumoo-loor wo wutu-wutul awéan wééna ai cita tanu si aijanji-Nao. Asé kama-kamang aitambér-Na ituo, kamu ro'na icawekar ang kasalé'an léwo' si mengaléwo' im peri é tou ang kayo'baan, wo em peri miow ro'na mamuali tanuoka im peri i Amang Kasuruan.

2 Petrus 1:4 ပူးပေါင်းရင်းမြစ်များ

Roma 9:4

Séra itu sinisiro i Amang Kasuruan wo niangkaio mamuali toyaang-Na in esa wo tumerimao ka'i i rarayo wo in sisiri'-Na. Séra jinanjian i Amang Kasuruan ing kamangen, wo winéan-Nao ukum Torat. Wo aicuao i Amang Kasuruan ai séra tumambisa maapo' ai Sia, wo ka'i séra winéan-Nao in janji-janji.

2 Korintus 1:20

Ampa'paan pakasa en janji i Amang Kasuruan, linekepo i Apo' Yesus. Ampa'paan in ituo icuata, “Ulit” a si Amang Kasuruan ampa'paan i Yesus Kristus. Wo icami méma' taniitu wosama' si Amang Kasuruan iparayo wo pasiriin.

2 Korintus 3:18

Intarépé' en amota im baya ra'io pakatutuwan ing kaéng wo icita masendot in télang i Casuruan. Wo ampa'paano in itu icita peroba-roban mamuali tanu Sia, menguré-uré icita makatélango. Eng katélang itu asi Casuruan owo, Siao e Roh.

2 Korintus 6:17

Ampa'paan in ituo si Amang Kasuruan ka'i icumua, “Tela'uo mio' sé tou ra'ica makatuus si Amang Kasuruan, wo ipataya-tayango mangé en owakmu ai séra. Ra'ica toro misu' in sapake' sé karican keli, wo kamu teriman-Ku oka.

Galatia 3:16

Taniitu ka'i wo im pakasa in janji i Amang Kasuruan si aicuao a si Abraham wo a si taranakna. An tutuw en janji-Na itu niéma', ra'ica aicua “a sé tarana-taranakmu” en tumuru' a sé tou keli, taan aicua “a si taranakmu” si tumuru' asi esa tou, Siao si Kristus.

Galatia 6:8

Si séi si menonou asalo mengaéma' ing kasalé'an in owakna sé ra'ica loor, em buéna papaté asi kasalé'an in owakna si ra'ica loor. Taan si séi si menonou asalo makiit ing kasalé'an i Roh Le'nas, em bué ing katouanna akar ing kauré-uré.

Efesus 4:13

akar kita im baya maesa am paémanen wo makatuus si Toyaang i Amang Kasuruan. Wo an in taniitu, em paémanenta makawangkoo wo menguré-nguré kita mamuali oka kaputé i Kristus.

Kolose 3:10

Wo kamu intarépé' winéano ing katouan weru, wo em peri miow pemeru-merun i Amang Kasuruan si méma' icamu kiit ing gambar-Na, wosama' kamu wutu-wutul makatuus Sia.

Ibrani 12:10

Sé amangta ang kayo'baan mengatepi icita ang karoro'anke' iciit sapa sé paanggapen éra loor. Taan si Amang Kasuruan mengatepi icita torona ing kalooranta in esa wosama' kita ro'na male'nas kaputé Sia le'nas.

Ibrani 9:15

Ampa'paan in ituo, pinaalio mai i Kristus em perjanjian weru, wosama' sé tou sé tinowao i Amang Kasuruan makéré oka bagéan si akar ing kauré-uré asi janji-Na. Sé tou ro'na makéré im bagéan si akar ing kauré-uré ampa'paan si Kristus imatéo wo tumu'bus ing kamesé-meséaan sé pinengaéma' éra an tutuw im perjanjian kataré pengapakéné'.

Yakobus 1:27

Taan imaapo' im butul wo lekep an dior i Casuruan Amangta, tanu si anio': Tumawang sé toyaang ula wo sé wéwéné balu ang kasusaan éra wo matéir in owak wosama' ra'ica kumiit ing kasalé'an ing kayo'baan anio'.

2 Petrus 1:1

En surat anio' a yaku owo, Simon Petrus. Yaku anio' ata wo ruru'du'an i Yesus Kristus. Ipaticku en surat anio' ai camu sé maémano a si Yesus Kristus kaputé ami. Si Yesus Kristus itu Amang Kasuruan wo Lumolowirta. Sia iméma' icamu maéman ampa'paan si pengaémaan-Na wutul wo ra'ica marapit.

2 Petrus 3:13

Taan entoonta en langit weru wo eng kayo'baan weru si aijanji i Amang Kasuruan ai cita. A mangé mbitu, wayake' sé tou maéma' in sususuien wutul i Amang Kasuruan.

2 Petrus 3:9

Awéan tou mawerot si Amang Kasuruan mauré-urépé' lumekep in janji-Na sapaoka si Kristus maai sumawel, taan en ulitna Sia talesen mengento-ngento' icamu mape'dis ampa'paan ra'ica icasalé'-Na sa awéan esake' ai camu meta'up im papaté. Taan en icasalé'-Na wosama' pakasa in tou ra'io mengéma-ngéma' ing kamesé-meséaan wo maréng sumawel méma' ing kasalé'an-Na.

1 Yohanes 2:25

Wo si anioo en aijanji-Nao in esa ai cita: kita menonou oka akar ing kauré-uré.

1 Yohanes 3:2

Poo-poow sé icaupusku, intarépé' kita toya-toyaang i Amang Kasuruan, taan ra'ipé' kailekanta tuu tambisa e mamuali ai cita sa. Taan eng kailekanta, an tutuw i Kristus maai sumawel, kita mamuali oka tanu Sia wo wutu-wutul kaséréanta oka en owak-Na.