2 Korintus 8:8 - En Taar Weru a nunuwu' é Tontemboan

⁸ Sé ipakuaku andumoro' in doit ipatawang itu, ra'ica esa perénta ai camu. Taan en icasalé'ku kakailekan iow tambisa eng kaincayaan é tou walina en tumawang sé kakéléna, akar kamu ka'i kumiit tumawang iséra. Wo in taniitu icasalé'ku suméré sapaoka kamu uli-ulit mengaupus sé tou walina.

2 Korintus 8:8 ပူးပေါင်းရင်းမြစ်များ

Roma 12:9

Mengaupus angé sé kakélé tou ang karapi in lekep en até. Tumayango mangé ang kaléwo-léwo'an, wo mengéma-ngéma'o mangé sé loor.

1 Korintus 7:12

A sé tou walina yaku (ra'ica si Apo' Yesus) kumua: Sa awéan tuama maéman a si Kristus wo makapenanaan sé ra'ica maéman a si Kristus, wo si penanaanna itu masalé' menonou mewali-wali wo isia, si tuama itu ra'ica toro metané wo si penanaanna.

1 Korintus 7:25

Intarépé' aku rumoma' andumoro' sé tou ra'ipé' icumawéng, mangala'un kuma'pa mangalitou. Andumoro' iséra itu, aku ra'- ica makéré perénta asi Casuruan owo. Taan aku si tou ro'na papercayan iow, ampa'paan si Casuruan tumuru'o ing kaupusan-Na a yaku, méé im bewerotku andumoro' iséra.

1 Korintus 7:6

Sé aicuaku anio' asalo sina'u ra'ica perénta.

2 Korintus 6:6

Mandé ka'i in taniitu, kami menonou ang karapi in até weresi, makailek sé andumoro' in Taar i Amang Kasuruan, talesen, sama' en até. Em paturu' ami sapaoka kami ata i Amang Kasuruan. Wo kami ka'i mamangén a si tatawang i Roh Le'nas wo mengaupus sé tou ang karapi in lekep en até,

2 Korintus 8:10

Kiit im bewerotku, an témponao lekepen iow sapa sé niéma'o miow tumo'tol asi ta'un lumangkoi. Ampa'paan icamuo eng kataré-taré merot wo tumo'tol in tawoien mengawéé roit ipatawang.

2 Korintus 8:24

Ampa'paan in itu, ituru'o mio' en upus iow ai séra an tutuw séra maangé ai camu. Wo in taniitu pakasa sé jamaat am bia'i luminga oka in upus iow wo kailekan éra oka kéitu kami tatap marayo-rayo icamu ai séra.

2 Korintus 9:2

Ampa'paan kailekankuo kamu masalé' mengatawang, wo kamu aitirayokuo a sé jamaat a Makedonia. Ipakuaku ai séra sapaoka kamu an sangkum in Akhaya tu'tulo méé in doit tatawang tumo'tolke' mai asi ta'un ilumangkoi. Wo eng kaincayaan iow imuwaso in até é kinakelian ai séra e mekiit méé roit tatawang.

2 Korintus 9:7

Sa woo ro'na si esa wo si esa tou musti musé' an até e mengawéé. Tioo manesel mengawéé kuma'pa ampa'paan pinelesé'. Ampa'paan si Amang Kasuruan mengaupus sé tou sé mengawéé ang karapi in arui en até.

Efesus 4:15

Taan kita ra'ica tanu siitu. Timboienta sumama-sama' en sususuien wutul asi Amang Kasuruan wo meupu-upusan, akar kita makawangko' am baya-waya kaputé i Kristus. Siao si capalata.

Efesus 6:24

En upus si aitambér i Amang Kasuruan mewali-wali a sé im pakasa in tou sé ra'ica mento' mengaupus a si Apo'ta Yesus Kristus.

Ibrani 10:24

Wo mayoo kita mensén-séréan esa wo sé walina wosama' kita ro'na méé kaincayaan e mengaupus sé kakélé tou wo mengaéma' andumoro' sé loor.

1 Petrus 1:22

Kamu lume'naso in owak iow ang karapi in le'tek mengaéma' in sususuien wutul i Amang Kasuruan, akar kamu makawoo mengaupus sé poo-poow an esa paémanen ang karapi i mauli-ulit. Anaé sina'uenku kamu wosama' kamu meupu-upusan ang karapi in lekep en até.