2 Korintus 8:2 - En Taar Weru a nunuwu' é Tontemboan

² Séra pinangepé'ano ing kawenduan-kawenduan uter. Taan an uner ing kawenduan itu, eng kaaruian in até éra mengawe-ngawes wo séra méé roit ipatawang a sé tou walina ang karapi in lekep en até. Mandé ka'i séra lengéi keli, en até éra siya' mengawéé.

2 Korintus 8:2 ပူးပေါင်းရင်းမြစ်များ

Matius 20:15

Si séi e méro yaku e maké in doitku in esa kumiit ing kasalé'anku? Kuma'pa panganatenmu réén ampa'paan aku tumuru' ing kalooranku a sé tou anio'?’

Roma 12:8

Sa eng kamang aitambér i Amang Kasuruan ai cita e masina'u sé tou walina wosama' em paémanen éra makaketer, tawoieno mangé en itu ang karapi i mauli-ulit. Sa eng kamang aitambér i Amang Kasuruan ai cita e mamuali tou masalé' mengawéténg ing kasiyaan a sé kakélé tou, musti émaanta en itu ang karapi in lekep en até. Sa eng kamang aitambér i Amang Kasuruan ai cita mamuali kikiiten, kita ka'i musti mamuali kikiiten si re'dem. Wo sa eng kamang aitambér i Amang Kasuruan ai cita e mengaturu' ing kaupusan a sé tou walina sé sumangkumai ing kawenduan, musti émaanta en itu ang karapi in arui en até.

Roma 2:4

Si Amang Kasuruan itu en até-Na sama', talesen wo wuta ing kaupusan. Taan tioo paepesen iow im beren em pakasa in itu wo mawerot ra'io sangali mape'dis! Ra'ica réén kailekan iow sapaoka ituru' i Amang Kasuruan eng kasamaan in até-Na itu wosama' kamu mape'dis ang kamesé-meséaan?

2 Korintus 1:12

Kami marayo, sapaoka eng katouan ami asi cayo'baan anio', linangkoio ami ang karapi in lekep en até wo rondor en até. Kami menonou tanu siitu wuntulke' im paesaan wo icamu. Siituo eng kasairian in até weresi ami. Niéma' ami en itu, ra'ica ang karapi ing kapinteran é tou, taan ang karapi in upus aitambér i Amang Kasuruan.

2 Korintus 2:9

Indior aipaticku en surat ai camu e muji sa kamu wutu-wutul mengakiit sé aituru'kuo.

2 Korintus 6:10

Mandé en até ami wendu, taan kami mengaru-ngarui. Kami kaséréan lengéi, taan keliano sé tou niéma' ami imasiya'. Kami anio' kaséréan ra'ica makaanu in sapa-sapa, taan en ulitna kami makaanuo im baya-waya.

2 Korintus 9:11

Wo in taniitu émaan-Na oka kamu masiya' am baya-waya akar kamu meméé-méé ang karapi in lekep en até. Wo sé peméé-méé miow méma' oka keli en tou an Yerusalem kumua i makapulu'sama' a si Amang Kasuruan an tutuw ami maali mangé si aiwéé miow itu ai séra.

2 Korintus 9:13

Wo asi kasamaan in até sé aituru' miow itu, kelian oka en tou an Yerusalem rumayo si Amang Kasuruan ampa'paan séra isumeréo icamu wutu-wutul menonou makiit wutul in Abar Kaaruien andumoro' i Yesus Kristus. Wo ka'i séra rumayo si Amang Kasuruan ampa'paan kamu wutul lekep en até mawéé in tatawang ai séra wo a sé pakasa in tou walina.

1 Tesalonika 1:6

Wo kamu mengakiito im peri ami wo im peri i Apo' Yesus. Mandé awéan tou maokoi camu, émaan i Roh Le'nas kamu kasake' tumerima in arui en taar i Casuruan.

1 Tesalonika 2:14

Poo-poow! Kamu niokoio é tou esa suku wo icamu an Tesalonika. Wo in taniitu kamu meputéo wo sé tou Yahudi an Yudea sé maémano a si Apo' Yesus Kristus, séra niokoi ka'i é tou éra in esa.

Yakobus 2:5

Poo-poow sé icaupusku! Lingano mai en icuaku anio': Sinisiro i Amang Kasuruan sé tou sé paweroten ing kayo'baan anio' lengéi, wosama' séra masiya' am paémanen éra wo makaanu im bagéan ang kakolanoan-Na tanu si aijanji-Nao a sé pakasa in tou sé mengaupus Sia.

Wahyu 2:9

Kailekan-Ku eng kasusaan iow wo eng kalengéian iow, taan am beren i Casuruan kamu siya'. Kailekan-Ku ka'i e ngaran iow pengawuruken é tou sé mangaku séra tou Yahudi. Taan en ulitna séra ra'ica tou i Amang Kasuruan taan séra itu jamaat i kikiiten é sétang.