2 Korintus 8:19 - En Taar Weru a nunuwu' é Tontemboan

¹⁹ Wo ra'ica siituke', si poowta itu ka'i aituru'o é jamaat eng kumarapi icami an tutuw ami maali in doit ipatawang an Yerusalem. Kami maarap en doit ipatawang itu e mamuali rarayo wo in sisiri' a si Amang Kasuruan wo ka'i mamuali tuus sapaoka kami uli-ulit masalé' tumawang.

2 Korintus 8:19 ပူးပေါင်းရင်းမြစ်များ

Kisah Para Rasul 14:23

Wo séra in dua sumisir sé penatua torona é jamaat itu. Séra sumombayang wo muasa en sumarakan sé penatua itu a si Casuruan si paémanen éra.

Kisah Para Rasul 15:22

Kumawus in itu pinusé' é ruru'du'an wo sé penatua wo ka'i pakasa en tou maéman an Yerusalem en sumisir piraan tou ai séra. Sé tou sé kinasisiran itu ayutus eng kumiit si Paulus wo si Barnabas mangé an Antiokhia. Sé sinisir éra itu, si Yudas si pengatuulen ka'i Barsabas wo si Silas. Sé tou maéman an Yerusalem mengasiri' ai séra in dua.

Kisah Para Rasul 15:25

Ampa'paano in itu pinusé'o ami en sumisir wo mutus piraan tou e mewali-wali wo si Barnabas wo ka'i si Paulus si icaupus ami.

Kisah Para Rasul 19:22

Wo iru'du'na si Timotius wo si Erastus, sé rua kara-karapina matawoi wosama' rumior mangé a Makedonia, taan si Paulus in esa mento' uré-uréan toyo' an Asia.

Kisah Para Rasul 19:29

Wo malicokoo waya sé ang kota itu. Tangkaan éra si Gayus wo si Aristarkhus wo iwali éra an stadion. Séra in dua itu tou Makedonia sé mewali-wali mai wo si Paulus am bawayaanna.

Roma 5:11

Wo ra'ica siituke'! Kita ka'i maaru-arui ampa'paan ing kasamaan i Amang Kasuruan si aituru' i Apo'ta Yesus Kristus, akar kita intarépé' menonou meelurano sumawel wo Sia.

Roma 5:3

Wo ra'ica siituke', kita ka'i ro'na maaru-arui an tutuw eng kawenduan sangkumenta. Ampa'paan kailekanta sapaoka eng kawenduan itu méma' icita makatalesen,

2 Korintus 4:15

Icami mendamo mai waya ing kawenduan itu asaloke' ing kalooran iow. Icami talesen masaru ing kawenduan itu wosama' en upus aitambér i Amang Kasuruan makakeli en tou imendam. Wo in taniitu makakelio sé tou makua i makapulu'sama' a si Amang Kasuruan, akar Sia iparayo-rayo wo pasiri-siriin.

2 Korintus 8:11

Wo intarépé' ilala'uso em pengaémaan iow kiit ing kawooan iow. Kamu maincaya' an tutuw kamu mawasa sumuun roit ipatawang, anaé intarépé' maincaya'o mangé en lumekep in sumuun in doit ipatawang itu.

2 Korintus 8:12

Sa kita mawéé ang karapi in lekep en até, teriman oka i Amang Kasuruan sapa sé aiwééta kiit ing kawooanta. Ampa'paan si Amang Kasuruan ra'ica kawisa mako tumuntut ai cita e méé si ra'ica kawooanta.

2 Korintus 8:20

Kami mareti-reti wosama' ra'ica wana tou e méé ing kaséaan ai cami an tutuw ami murus in doit keli anio'.

2 Korintus 9:2

Ampa'paan kailekankuo kamu masalé' mengatawang, wo kamu aitirayokuo a sé jamaat a Makedonia. Ipakuaku ai séra sapaoka kamu an sangkum in Akhaya tu'tulo méé in doit tatawang tumo'tolke' mai asi ta'un ilumangkoi. Wo eng kaincayaan iow imuwaso in até é kinakelian ai séra e mekiit méé roit tatawang.

2 Korintus 9:8

Si Amang Kasuruan makawoo tumambérai ing kamang kumeli-keli ai camu, akar sé paperlun iow am baya-waya imaaweso. Wo in taniitu lébé kawooan iow méma' im pakasa sé loor.