2 Korintus 6:7 - En Taar Weru a nunuwu' é Tontemboan

⁷ wo mengakua in sususuien wutul. Ipaturu' ami ka'i eng kawasa i Amang Kasuruan si mewali-wali wo icami ang karapi makatimboi in sususuien wutul tanu makatimboi im pakakas ipaperang patéir in owak ami wo ipasundur sé kaséké'. Pakasa en itu tumuru' sapaoka kami ata-ata i Amang Kasuruan.

2 Korintus 6:7 ပူးပေါင်းရင်းမြစ်များ

Markus 16:20

Kumawus ako in itu, sé murit i Yesus mangé am bisa-wisa wo mangé kumua in Abar Kaaruien andumoro' i Yesus Kristus, wo si Casuruan tumawoi mewali-wali wo tumawang iséra akar ro'na méma' in tuu-tuus kakaya'kaan, en tumuru' sapaoka en taar aicua éra itu ulit.

Kisah Para Rasul 11:21

Wo eng kawasa i Casuruan mewali-wali wo iséra akar kelian tou ra'ica Yahudi maéman a si Yesus wo mape'dis.

1 Korintus 1:24

Taan sé tou tinowao i Amang Kasuruan, tou Yahudi kuma'pa ra'ica Yahudi, séra ro'na makailek andumoro' ing kawasa i Amang Kasuruan wo eng kapinteran-Na, asi abar i Kristus itu.

2 Korintus 13:4

Wutul an tutuw i Kristus aisalip, Sia lembi, taan Sia menonou ampa'paano ing kawasa i Amang Kasuruan. Kami ka'i ra'ica keter tanu si Kristus, taan kami ka'i menonou tanu si Kristus ampa'paano ing kawasa i Amang Kasuruan. Anaé, tindaken oka ami ang karapi ing kawasa i Amang Kasuruan torona ing kalooran iow.

2 Korintus 2:17

Kami ra'ica meputé wo sé kinakelian tou sé mengakua in abar i Amang Kasuruan e mangéré ing kauntungan in esa. Em paangé-angén ami lekep en até, ampa'paan si Amang Kasuruan e rumu'du' icami. Wo si Amang Kasuruan in esa en suméré sapaoka icami makua in abar itu tanu ata-ata i Kristus.

2 Korintus 4:2

Ra'ica kiim ami iméma' in tawoien anio' maké ing kanaramen sé ipaene-enep wo sé kalawiin. Wo ra'ica kiim ami matawoi ang karapi imauwak wo mengasélé'kow in Taar i Amang Kasuruan. Taan sé ipakua ami andumoro' sé wutul an dior i Casuruan, wo in taniitu icami maarap wosama' pakasa in tou numilai sumama-sama' ai cami an dior i Amang Kasuruan iciit in até weresi éra.

2 Korintus 7:14

Kamu iparayo-rayokuo a si Titus an tutuwna ra'ipé' mangé ai camu. Makapulu'sama', kamu ra'ica imapalawi' yaku. Pakasa sé aicuao ami ai camu wutul. Taniitu ka'i sapa sé iparayo-rayo ami andumoro' icamu a si Titus mémang wutul.

Efesus 1:13

Taniitu ka'i camu tou ra'ica Yahudi sé lumingao in sususuien wutul i Amang Kasuruan, siituo en Abar Kaaruien si mengawéé ing kalowiran ai camu. Wo an tutuw iow maémano a si Kristus, tinerimao miow e Roh Le'nas si aijanji-Na tanu tuus kamu imamualio tou-Na.

Efesus 3:20

Si Amang Kasuruan makawoo iméma' lébé kelimai asé sapa sé ipasombayangta kuma'pa sapa sé pawerotenta, kumiit ing kawasa-Na si matawoi ai cita.

Efesus 4:21

Ampa'paan en sususuien andumoro' i Kristus sé liningao miow itu, sususuien wutul. Wo en sususuien wutul itu kaséré-séréan an owak-Na.

Kolose 1:5

Kamu maéman wo mengaupus taniitu ampa'paan kamu maarap wo mengento-ngento' sapa sé aitu'tu'o i Amang Kasuruan torona miow an sorga. Em paarapen itu liningao miow an tutuw in sususuien wutul ipakua-kuao ai camu. Siituo en Abar Kaaruien andumoro' i Yesus Kristus.

1 Tesalonika 5:8

Taan kita anio' sé maéman a si Casuruan, musti kumawasa in owak tanu ing katouan é tou in sendot. Kita ka'i musti maéman a si Amang Kasuruan wo meupu-upusan, siituo en tuméir icita aipeputé wo si suraro mengapaké ing karai bési pari'dir in owak. Kita ka'i musti mauli-ulit maarap sapaoka kita lowiren oka i Casuruan, aipeputé wo si suraro makapaké in topi waja en tuméir in do'kosna.

2 Timotius 2:15

Émaano mangé sumama-sama' en tawoienmu wosama' si Amang Kasuruan masalé' ico. Ang karapi i méma' in taniitu, ko ra'ica malawi' an dior i Casuruan, wo ro'nao icuamu a sé tou ang karapi i makakii-kiit en sususuien wutul itu.

2 Timotius 4:7

Niéma'kuo en tawoienku ang karapi in sama' akar i malekep, kaputé wo si tou repet em pakatéron kumiit mekowa' tuméron akar in sumiwak. Wo aku kasake' le'tek maéman a si Casuruan.

Ibrani 2:4

Wo eng kasairian é tou itu kineter i Amang Kasuruan, ampa'paan séra winéan-Na kawooan iméma' in tuu-tuus wo membam-balinaan kakaya'kaan wo kawasa-kawasa wangko' wo mengawéténg in tatambér si aiwéé i Roh Le'nas kumiit ing kasalé'an i Amang Kasuruan in esa.

Yakobus 1:18

Kita niéma'-Na mamuali toya-toyaang-Na ang karapi in Taar wutul kumiit ing kasalé'an-Na. En itu icasalé'-Na wosama' kita mamuali wuéna kataré-taré asé im pakasa sé niéma'-Na.