2 Korintus 5:20 - En Taar Weru a nunuwu' é Tontemboan

²⁰ Anaé, icamio sé a yutus i Kristus. Sa kami sumina'u icamu, en itu meputéo si Amang Kasuruan sumina'u. Wo ang karapi i ngaran i Kristus, uli-ulit pekiupusen ami, wosama' icamu meeluran wo si Amang Kasuruan.

2 Korintus 5:20 ပူးပေါင်းရင်းမြစ်များ

Lukas 10:16

Wo icua ka'i i Yesus a sé tou sé makiit Sia, “Si séi en luminga icamu sia luminga Yaku. Wo si séi eng kumélong icamu sia kumélong Yaku. Wo si tou kumélong Yaku, sia ka'i kumélongo si Amang Kasuruan si mutusai Yaku.”

Lukas 14:23

Wo icua i tuang itu a si atana, ‘Mangém an lala-lalan wangko' wo an lala-lalan pesut ang kesot ing kota wo leséénai waya sé tou am bitu wosama' em palukutan mawuta.’

Yohanes 20:21

Wo icua-Na sumawel ai séra, “Eng kaeluran mewali-wali wo icamu! Yaku ayutuso mai i Amang-Ku ang kayo'baan, taniituo ka'i camu, yutus-Ku mangé am bisa-wisa ang kayo'baan anio'.”

Roma 5:10

An tutuw kita masunduré' a si Amang Kasuruan, kita niéma'-Nao meeluran wo Sia ampa'paan im papaté i Toyaang-Na. Lébé-lébépé' ka'i intarépé' an tutuw kita meelurano sumawel wo Sia, tantu kita lowiren oka asi endo kaka'puan ing kayo'baan ampa'paan si Kristus itumou sumawel.

2 Korintus 12:10

Ampa'paan in ituo en atéku arui an tutuw aku ra'ica keter. Yaku ka'i arui mandé ipaséro', mawendu, pinaokoi, ang kasusaan ampa'paan makiit asi Kristus. Ampa'paan an tutuw aku ra'ica keter, yaku maketer ampa'paan i Kristus.

2 Korintus 3:6

Siao e méma' icami makawoo imamuali maselewir sé makua in esa perjanjian weru a sé tou. Em perjanjian itu ra'ica an ukum sé aipatico indior, taan asi Roh i Amang Kasuruan owo. Ampa'paan en ukum aipatic itu sa ra'ica kiiten, makawali am papaté, taan e Roh i Amang Kasuruan mawéé ing katouan.

2 Korintus 5:11

Kailekan ami sapa eng kaangéan i maindé' a si Amang Kasuruan, ampa'paan in iituo raméjin ami méé ing kapercayaan a sé tou andumoro' in owak ami. Kailekan wutul i Amang Kasuruan sé an untep in até ami. Wo paarapenku kakailekan iow en até ami.

2 Korintus 6:1

Ampa'paan kami matawoi mewali-wali wo si Amang Kasuruan, pekiupusen ami imauli-ulit ai camu wosama' tioo paepesen iow im beren en upus aitambér i Amang Kasuruan si tinerimao miow itu.

Efesus 6:20

Yaku ayutus mengakua in Abar Kaaruien itu, wo ampa'paano in Abar Kaaruien ituo, akar in intarépé' aku pakabuin. Isombayang angé, wosama' ra'io wana eng kaindé'anku makua in Abar Kaaruien itu, tambisa si musti cuaku a sé tou.

Kolose 1:20

Wo ampa'paan si Kristus ituo, akar émaan i Amang Kasuruan pakasa sé ang kayo'baan wo sé an sorga meeluran sumawel wo Sia. Niéma'-Na pakasa ro'na meeluran sumawel wo Sia, ampa'paano in enda' i Kristus si maté ang kayu salip.

1 Tesalonika 4:8

Ampa'paan in itu, si séike' si ra'ica kiim tumerima in sususuien anio', sia itu ra'ica asaloke' kumélong sé tou, taan kumélongo si Amang Kasuruan si mééo mai i Roh Le'nas ai camu.