2 Korintus 2:3 - En Taar Weru a nunuwu' é Tontemboan

³ An tutuw aku matic in suratku indior, kamu rinomaanku. Wo in taniitu sa aku maai sumawel ai camu ang Korintus, yaku ra'ica mawendu. Icamuo e musti maarui yaku. Ampa'paan percayanku sapaoka sa aku arui kamu ka'i arui.

2 Korintus 2:3 ပူးပေါင်းရင်းမြစ်များ

1 Korintus 4:21

Anaé, si wisa en sisiren iow? Yaku mai sumusui ai camu maké in sambok? Kuma'pa aku mai ai camu ang karapi ing kaupusan wo ang karapi ing ko'kos en até?

2 Korintus 1:15

Ampa'paan im paémanen ituo, asi kataré aku imawasao maangé ing karua ai camu wosama' kéréan iow en upus tatambér makarua lumepet.

2 Korintus 1:23

Si Amang Kasuruan en sairiku ampa'paan kailekan-Na en atéku. Yaku ra'ica mamuali maai ang Korintus, ampa'paan ra'ica kiimku mendu in até miow.

2 Korintus 12:11

Yaku rumayoo in owakku in esa tanuoka sé tou bodok. Taan kamuo sé ilumesé' akar aku méma' tanu siitu. En ulitna icamuo si musti mengarayo yaku tanu siitu. Ampa'paan mandé ka'i aku anio' ipakua é tou ra'ica makailek in sapa-sapa, taan am baya-waya yaku ra'ica kaindoan é ruru'du'an wangko' itu.

2 Korintus 12:21

Em paindé-indé'ku an tutuwku maai sa, yaku iwawa' i Amang Kasuruan an dior iow wo aku mawendu ampa'paan kelian sé an uner iow indior sé mengaéma' ing kamesé-meséaan wo ra'ipé' mape'dis mengéma-ngéma' sé karican, mengabersina, wo mengaéma' ing kasalé'an in owak sé ra'ica wutul.

2 Korintus 13:10

Ampa'paan in ituo aipaticku en surat anio' an tutuw aku ra'ipé' an uner iow. Wo in taniitu sa aku maai sa, ra'io sangali repetanku en tumindak icamu ang karapi imaké ing kawasa aiwéé i Amang Kasuruan a yaku. Eng kawasa itu aiwéé a yaku e méé ing kaincayaan am paémanen iow, ra'ica in tumeri.

2 Korintus 2:9

Indior aipaticku en surat ai camu e muji sa kamu wutu-wutul mengakiit sé aituru'kuo.

2 Korintus 7:12

Anaé, mandé ka'i aipatickuo en surat itu, ipaticku ra'ica ampa'paan i tou meséa'. Ra'ica ka'i ampa'paan i tou mawendu ampa'paano ing kaséaan itu. Ipaticku en surat itu wosama' an dior i Amang Kasuruan, pendamen iow in esa sapaoka kamu uli-ulit meméé-méé rékén ai cami.

2 Korintus 7:16

Yaku arui keli, ampa'paan kamu ro'na papercayan am baya waya.

2 Korintus 7:6

Taan makapulu'sama' a si Amang Kasuruan si mengaibor sé tou sama' en até. Sia mengaarui in até ami an tutuw si Titus mai ai cami.

2 Korintus 7:8

Anaé, mandé ka'i en suratku indior méma'o in até miow mawendu, yaku ra'ica manesel imatic in surat itu. Wutul aku isumangkumo manesel matic in surat itu, ampa'paan pakasérénku en surat itu méma' in até miow mawendu, mandé ka'i eng kawenduan itu ang karoro'anke'.

2 Korintus 8:22

Mewali-wali wo si Titus wo si esa poow, yutus ami ka'i si esa poow walina mangé mewali-wali wo iséra. Si poow itu pinenguri-ngurio niuji, wo kinaséréano ami sapaoka sia masalé' sumémbong. Wo intarépé', sia lébé masalé' sumémbong icamu, ampa'paan sia uli-ulit mercaya icamu.

Galatia 5:10

Taan ampa'paan i Apo' Yesus percayanku kamu ra'ica kumiit im pakawerot é tou walina taan makiitke' im pakawerotku. Wo si seike' si tou en lumicoko i ngaas iow, tanggongenna oka en ukuman i Amang Kasuruan.

2 Tesalonika 3:4

Wo percayan ami mauli-ulit a si Casuruan in andumoro' miow, sapaoka kamu ang karoro'ano maéma' in sapa sé aitaaro ami ai camu wo pengéma-ngémaano mangé en itu.

Filemon 1:21

An tutuwku imatic in surat anio', percayanku sapaoka eng kale'tekanmu émaanmu oka sapa em pinangilekku. Wo percayanku ka'i sapaoka en émaanmu lumébé mai asi pinangilekku.