2 Korintus 2:14 - En Taar Weru a nunuwu' é Tontemboan

¹⁴ Taan makapulu'sama' a si Amang Kasuruan. Sia maaki- akin icami akar imuntung ampa'paan i Kristus. Pakén i Amang Kasuruan icami wosama' sé tou am bisa-wisa makatuus si Kristus. Anaé, em paselewir ami tanu im bou manam si pengakawouan am bisa-wisa.

2 Korintus 2:14 ပူးပေါင်းရင်းမြစ်များ

Yohanes 16:33

Icua-Ku waya en itu ai camu, wosama' kéréan iow eng kaeluran ampa'paan meesao ang karapi-Ku. Ang kayo'baan anio' ipeta'up oka miow eng kawenduan, taan kete-ketereno mangé en até miow, ampa'paan kinala-Kuo waya eng kawasa ing kayo'baan anio'.”

Roma 1:8

Kataré-taré aku kumua i makapulu'sama' a si Amang Kasuruanku ang karapi i ngaran i Yesus Kristus, ampa'paan kamu uli-ulit maéman akar keli en tou am bisa-wisa ang kayo'baan makaileko in andumoro' im paémanen iow.

Roma 15:19

wo en tuu-tuus kakaya'kaan sé niéma'ku maké ing kawasa i Roh Le'nas. En Abar Kaaruien andumoro' i Yesus Kristus itu aicuakuo waya a sé tou, tumo'tolai an Yerusalem akar an Ilirikum.

Roma 6:17

Anaé, makapulu'sama' a si Amang Kasuruan! Ampa'paan indior kamu ata ing kamesé-meséaan, taan intarépé' kamu icumiito ang karapi in lekep en até an sususuien sé aisusuio ai camu.

Roma 8:37

Taan mandé pakasa en itu sangkumenta, kita tantu uli-ulit muntung ampa'paan si Kristus imupuso icita.

1 Korintus 12:8

A si esa tou winéanai kamang aitambér i Roh e manuwu' mapaké ing kapinteran asi Amang Kasuruan owo. Wo a si Roh meputé ka'i, sé tou walina winéanai kamang aitambér i Roh e manuwu' mapaké ing keli eng kakailekan.

1 Korintus 15:37

Wo en lulumbo si ayusewmu itu asalo in lulumbonake', tanumai watuna ing gandum kuma'pa watuna walina, ra'ica sé tinanem wangkero.

1 Korintus 15:57

Taan makapulu'sama' a si Amang Kasuruan, ampa'paan niéma'-Na mai kita imuntung sumundur im papaté ampa'paano i Apo'ta, Yesus Kristus.

2 Korintus 1:11

Pekiupusen ami ai camu atasanai in sombayang wosama' si Amang Kasuruan tumawang icami. Wo in taniitu sowaten i Amang Kasuruan en somba-sombayang akar keli en tou kumua makapulu'sama' a si Amang Kasuruan ampa'paan ing kamang sé tinerima ami wo ampa'paan in sombayang é tou keli.

2 Korintus 8:16

Icua ami makapulu'sama' a si Amang Kasuruan, ampa'paan an até i Titus winéan-Nao mai ing kasalé'an wangko' en tumawang icamu, an até i Titus meputé wo si an até ami.

2 Korintus 9:15

Mayoo kita kumua i makapulu'sama' a si Amang Kasuruan ampa'paan ra'io icakua en aiwéé-Na itu.

Efesus 5:2

Menonouo mangé ang karapi i meupu-upusan, kaputé i Kristus mengaupuso icamu. Sia sumarakano in owak-Na torona icita tanu raragésan si mawou manam torona i Amang Kasuruan.

Efesus 5:20

Mengua-nguao mangé i makapulu'sama' am baya-waya a si Amang Kasuruan, Amangta, ang karapi i ngaran i Yesus Kristus Apo'ta.

Filipi 4:18

Pakasa eng kaperluanku kinakiitano, wo sé awéan a yaku ilumébéo asi paperlunku. Ampa'paan yaku tumerimao im patawang iow itu asi Epafroditus owo. En doit aiwéé miow itu meputé im paragés mawou manam si icasalé' i Amang Kasuruan si patus ai Sia.

Kolose 1:23

Ampa'paano in itu kamu musti le'tek maéman wo kasake' keter makatimboi asi Abar Kaaruien andumoro' si Yesus Kristus. Wo tioo itela'u miow em paarapen si an untep in Abar Kaaruien itu, si aiwééo ai camu wo liningao miow. Wo en Abar Kaaruien itu aicuao a sé pakasa é tou ang kayo'baan. Wo yaku Paulus mamuali tou mengaselewir eng kumua in Abar Kaaruien andumoro' i Yesus Kristus itu.

Kolose 1:6

Wo en Abar Kaaruien itu aicaseraro am bisa-wisa ang kayo'baan wo em buéna kinaséréano ang katouan é tou. Taniituo ka'i wo icamu, tumo'tolai kamu luminga in Abar itu wo wutu-wutul makailek in upus aitambér-Na, kamu kinamango i Amang Kasuruan.

Kolose 2:15

Ang kayu salip itu, pakasa é roh sé maperénta wo e roh sé makakawasa kinalao i Kristus. Niéma'-Na séra tanu tou pakawa'kesen, mawaya' makiit an somoi-Na. Séra mamuali séséro'en é tou an tutuw si Kristus muntung.

1 Tesalonika 1:8

Ampa'paan en taar i Casuruan icaseraro tumo'tolo mai ai camu wo akar an sangkum i Makedonia wo ra'ica am bituke' taan imakaro ka'i an sangkum in Akhaya. Wo ra'ica asaloke' andumoro' in taar pengakua miow taan ka'i en abar andumoro' im paémanen iow a si Amang Kasuruan icaseraro am pakasa in tampa. Ampa'paan in ituo kami ra'io wana torona eng kumua in sapa-sapa, ampa'paan pinalingao é tou em paémanen iow.

1 Tesalonika 3:9

Kami wutu-wutul arui ampa'paan kamu kasake' maéman a si Amang Kasuruan. Ampa'paan in ituo kami kumua i makapulu'sama' ai Sia ampa'paan ing kaaruian ami itu.

1 Timotius 2:8

Ampa'paano in itu, icasalé'ku wosama' am bisa-wisake' sé tuama mengasombayang angé ang karapi in até weresi a si Casuruan, ra'ica ang karapi in e'bow wo meindoan roma'.

2 Timotius 2:2

Liningamuo en sususuien si aisusuikuo an dior é tou keli. Musti isusuimu en itu a sé tou walina sé ro'na percayanmu wo sé pandéi masusui. Wo in taniitu séra ro'na sumusui sé tou walina.

Wahyu 7:12

Wo icua éra, “Ulit! Irayoo mangé si Amang Kasuruan! Toronake' Sia e rarayo wo en sisiri', eng kapinteran, wo i makapulu'sama', siri', kakawasaan, wo kaketeran akar ing kauré-uré! Ulit.”