1 Yohanes 5:6 - En Taar Weru a nunuwu' é Tontemboan

⁶ Si Yesus Kristus imayo ang kayo'baan ang karapi in dano ipabaptis-Na wo in enda' im papaté-Na. Sia maai ra'ica ang karapi in danoke', taan ang karapi in dano wo in enda'. Wo e Roh i Casuruan in esa e méé kasairian sapaoka pakasa en itu wutul.

1 Yohanes 5:6 ပူးပေါင်းရင်းမြစ်များ

Matius 26:28

Ampa'paan si anio' en enda'-Ku, si enda' perjanjian si aituas torona ing kaampungan ing kamesé-meséaan é tou keli.

Matius 3:16

Kumawusai nibaptis, si Yesus makala'us kumesot an dano wo asi témpo ituke' en langit mawuka' wo kaséréan-Na e Roh i Amang Kasuruan tanuoka mombo tumumpa mai ai Sia.

Markus 14:24

Icua-Na ai séra, “Si anioo en enda'-Ku, enda' im perjanjian si aituas torona é tou keli.

Lukas 22:20

Taniitu ka'i kekawus ing kuman i roti, indon-Na ka'i em paelepan si tinuasan-Nao in anggor wo iwéé-Na ka'i ai séra, wo kumua, “En anggor am paelepan anio', tanu im perjanjian weru i Amang Kasuruan wo sé tou, si nisahkan in enda'-Ku si aituas akar i maka'pu en lumowir icamu.

Yohanes 14:17

Si Matawang ituo si Roh Le'nas si mengawali icamu a si sususuien wutul andumoro' si Amang Kasuruan. Sé tou ang kayo'baan ra'ica tumerima Sia, ampa'paan séra ra'ica isuméré Sia wo ra'ica makatuus Sia. Taan kamu makatuus Sia ampa'paan Sia mewali-wali wo icamu intarépé', wo Sia mento' oka an untep in até miow i esa wo si esa.

Yohanes 14:6

Wo icua i Yesus, “Yakuo en lalan maangé a si Amang Kasuruan, Yaku ka'i si mengakua in sususuien wutul andumoro' i Amang Kasuruan, wo Yaku ka'i si mengawéé mai ing katouan akar ing kauré-uré. Ra'ica wana esake' tou e maai a si Amang sa ra'ica ipakawali-Ku.

Yohanes 15:26

Taan yutus-Ku oka ai camu si Matawang asi Amang owo. Siao si Roh Le'nas si maali icamu asi sususuien wutul andumoro' i Amang Kasuruan. An tutuw-Na i maai, Sia méé oka ing kasairian andumoro' Yaku.

Yohanes 16:13

Taan sa Sia maai, Siao e Roh si tumuru' in sususuien wutul i Amang Kasuruan, isusui-Na oka ai camu akar kailekan iow pakasa sé sususuien wutul andumoro' i Amang Kasuruan. Ampa'paan Sia ra'ica kawisa mengaroma' makiit im bewerot-Na in esa, taan Sia maroma' kumiit sapa sé lininga-Na. Wo icua-Na oka ka'i ai camu andumoro' in sapa sé mamuali sa.

Yohanes 3:5

Isowat i Yesus, “En ulitna icua-Ku mangé ai co, sa si tou ra'ica touen sumawel an dano wo e Roh i Amang Kasuruan, sia ra'ica muntep ang Kakolanoan i Amang Kasuruan.

Yohanes 4:10

Isowat i Yesus ai sia, “Sa raké' woo kailekan i inang sapa si casalé' iwéé i Amang Kasuruan wo makailek si séi réén Aku si mangilek woo elepen, tantu si inang mangilek oka a Yaku, wo iwéé-Ku oka a si inang en dano si mawéé ing katouan.”

Yohanes 4:14

Taan si séike' e melep in dano si aiwéé-Ku, sia ra'io ka'i maré'om akar ing kauré-uré, ampa'paan en dano si iwéé-Ku itu mamuali oka palemboian in dano an owakna. En dano itu melembo-lemboi an owakna akar sia menonou akar ing kauré-uré.”

Yohanes 6:55

Ampa'paan en owak-Ku itu kakanen wutul wo en enda'-Ku itu elepen wutul.

Kisah Para Rasul 8:36

Séra lumala'us i bawayaan wo séra icateka' an esa tampa awéan rano. Icua i kikiiten itu a si Filipus, “Sérénmu, am bitu awéan rano! Tambisa, ro'nao réén aku baptisenmu?” [

Roma 3:25

Sia ayutuso mai i Amang Kasuruan ang kayo'baan wosama' makéré ukuman; maté wo en enda'-Na makatiti-titis. Niéma'-Na in taniitu wosama' em papaté i Yesus itu méma' sé tou ro'na icawekar ang kamesé-meséaan sa séra maéman ai Sia wo séra nianggap wutul i Amang Kasuruan. Si Amang Kasuruan méma' in taniitu en tumuru' sapaoka Sia ra'ica marapit. Ampa'paan indior Sia talesen makaséré sé tou mengéma-ngéma' ing kamesé-meséaan akar séra ra'ica ukumen-Na.

Efesus 1:7

Ampa'paano in enda' i Yesus Kristus wo ampa'paan kita meesao ang karapi-Na, icita tinu'buso, eng kaangéanna kita niampungano ang kamesé-meséaanta. Wo siituo en upus wangko' si aitambér i Amang Kasuruan ai cita.

Kolose 1:4

ampa'paan liningao ami andumoro' im paémanen iow a si Kristus Yesus wo andumoro' in upus iow a sé im pakasa é tou le'nas.

1 Timotius 3:16

Indior en sususuien wutul itu ra'ica kailekan é tou, taan intarépé' sé icaenep andumoro' in sususuien wutul sé ra'io cakua itu, winuka'o i Amang Kasuruan. Sé icaenep itu tana'i: “Si Yesus imayo wo mamualio tou, wo aituru' i Roh Le'nas sapaoka Sia itu wutul. Sia mapaturu'o in owak-Na a sé malaékat, wo en sisisilen andumoro' Sia itu icaseraro a sé bangsa. Wo Sia émanen é pakasa ing kayo'baan, wo Sia niangkaio mangé an sorga ang karapi i rarayo wo in sisiri'.”

Titus 3:5

An tutuw itu Sia lumowiro icita, en itu ra'ica ampa'paan kita mengaéma' im butul an dior-Na taan ampa'paan aituru'-Nao eng kaupusan-Na ai cita. Weresin-Na eng kamesé-meséaanta wo pakén-Na e Roh Le'nas e méma' ing katouanta maweru. En itu meputé kita tumou sumawel.

Ibrani 10:29

Anaé, ro'nao kawerotanta tambisa eng kauter in ukuman a sé tou sé maepes im beren asi Toyaang i Amang Kasuruan wo maanggap ra'ica wana wééna en enda' perjanjian si ro'na meresi ing kamesé-meséaan éra, wo sé mengaroros i Roh e mawéé in upus tatambér ai cita.

Ibrani 12:24

Wo kamu mai meta'up ka'i wo si Yesus, si maali mai im perjanjian weru i Amang Kasuruan a sé tou. Wo mai ka'i asi enda' im perjanjian weru si makatiti-titis e méé ing kaampungan ing kamesé-meséaan a sé tou. Sa taniitu en enda' i Yesus en lébé awéan wééna wo in enda' i Habel, ampa'paan en enda' i Habel si makatiti-titis asaloke' in sumuli' im pinanganat i Kain.

Ibrani 13:20

Si Yesus Apo'ta tinou sumawel i Amang Kasuruan am papaté. An tutuw Sia imaté en enda'-Na makatiti-titis wo en enda'-Na itu iméma' im perjanjian weru mapaké akar ing kauré-uré. Anaé, Sia mamuali Gembala Wangko' torona icita. Ampa'paano in itu pekiupusenku a si Amang Kasuruan si palemboian ing kaeluran torona miow,

Ibrani 9:14

Anaé, sa en enda' wo en awu é binatang itu ro'na meresi in tou, lébé-lébépé' ka'i en enda' i Kristus! En enda'-Na ro'na lume'nas in até weresita asi mengéma-ngéma' sé ra'ica wana en torona, wosama' kita ro'na maapo' a si Amang Kasuruan si menonou. Ampa'paan si Kristus imééo in owak-Na in esa a si Amang Kasuruan tanu raragés si makaleke-lekep, ampa'paano ing kawasa i Roh i Amang Kasuruan si menonou akar ing kauré-uré.

Ibrani 9:7

Taan asi kamar karua si pengatuulen Kamar Lume'na-lenas wayake' si imam wangko' e ro'na muntep am bitu wo makasake' ka'i an sangata'un. An tutuw muntep am bitu, sia musti maali in enda' é binatang em pesic asi kekelew im piti perjanjian itu ampa'paan ing kamesé-meséaanna in esa wo ka'i ing kamesé-meséaan é tou Israel si niéma' éra ra'ica aipetutu'.

1 Petrus 1:2

Icamu sinisir i Amang Kasuruan, Amangta, tumo'tolke' mai indior kumiit im pawasa-wasan-Na. Wo kamu niéma' i Roh Le'nas mamuali le'nas wosama' kamu le'tek maéma' ing kasalé'an i Yesus Kristus wo eng kamesé-meséaan iow ka'i weresin-Na ang karapi in enda'-Na. Pekiupusenku a si Amang Kasuruan wosama' émaan-Na mai eng katouan iow elu-elur wo méé mai ing kamang si kumeli-keli ai camu.

1 Petrus 3:21

Si sonop wangko' an tutuw itu, andéan im baptisan intarépé'. Em baptisan itu pengatuus sapaoka kamu linowiro i Amang Kasuruan ampa'paano tinou-Na sumawel si Yesus Kristus. Em baptisan itu ra'ica i meresi sé kotor an owak iow, taan i mangilek a si Amang Kasuruan wosama' en até miow weresi.

1 Yohanes 1:7

Taan sa kita menonou an sendot meputé ka'i wo Sia an sendot, tantu kita menonou imeesa wo sé tou walina. Wo pakasa eng kamesé-meséaanta wu'asan oka in enda' i Yesus Toyaang-Na.

1 Yohanes 4:10

Si anioo en upus itu: Ra'ica icita si ririor imaupus si Amang Kasuruan, taan Siao si ririor mengaupus icita. Ampa'paan ituo ayutus-Na mai si Toyaang-Na wosama' eng kamesé-meséaanta kaampungan ampa'paan i Toyaang-Na itu.

Wahyu 1:5

Wo en upus aitambér wo eng kaeluran itu ka'i mai asi Yesus Kristus owo. Siao en sairi le'tek, wo eng kataré-taré itumou sumawel an uner é tou imaté, wo ka'i e makakawasa a sé kolano asi cayo'baan anio'. Sia mengaupus icita, wo mekar ing kamesé-meséaanta ang karapi in enda'-Na.

Wahyu 5:9

Wo séra kumantar esa kakantaren weru tana'i: “Icoo em patus tumerima ing gulungan kitap itu, wo muka' in ségél-ségélna. Ampa'paan Ko sumangkumo pinaté, wo ang karapi in enda'-Mu, tinu'bus-Muo séra torona i Amang Kasuruan, séra itu mai am pakasa in suku, i nunuwu', i negara wo im bangsa.

Wahyu 7:14

Wo sowatenku, “Tuang! Si tuang e makailek.” Wo icuana a yaku, “Séra ituo sé tou ilumangkoio mai ing kawenduan wangko'. Wo pakén éra en enda' i Toyaang i Domba eng kumemes in juba éra wo méma' akar i makulo'.