1 Yohanes 1:8 - En Taar Weru a nunuwu' é Tontemboan

⁸ Sa icuata sapaoka kita ra'ica wana kamesé-meséaan, kita imuwako in owakta in esa wo en sususuien wutul ra'ica an atéta.

1 Yohanes 1:8 ပူးပေါင်းရင်းမြစ်များ

Yohanes 8:44

Si kikiiten é sétango si amang iow, wo icasalé' miow mengaéma' sapa si casalé' i amang iow. Tumo'tolai indior akar intarépé' sia mapaté sé tou, wo ra'ica kiimna mengaéma' in sususuien wutul, ampa'paan en sususuien wutul ra'ica an aténa. Casalé'na mengatowo ampa'paan in ituo em peri aselina. Sia kotowo wo palemboian waya in towo.

Roma 3:10

Tanu in aipatic ang Kitap Le'nas tana'i, “Ra'ica wana tou e nianggap wutul, mandé esake'.

Roma 3:23

Pakasa en tou iméma'o ing kamesé-meséaan, akar séra ra'ica makéré im bagéan a rarayo wo in sisiri' i Amang Kasuruan.

1 Korintus 3:18

Sa kamu mengawerot in owak iow awéan kapinteran, kamu imuwako in owak iow in esa, ampa'paan eng kapinteran papakén iow itu asalo makiit im pakawerot é tou ang kayo'baan wo eng kapinteran ituo e modok icamu. Aweso taré kamu ra'ica mapaké ing kapinteran makiit im pakawerot ing kayo'baan wosama' an dior i Amang Kasuruan kamu uli-ulit awéan kapinteran.

Galatia 6:3

Ampa'paan sa awéan tou mawerot en owakna in esa penting, taan en ulitna sia itu tou ra'ica penting, eng kaangéanna sia itumowoo an owakna in esa.

1 Timotius 6:5

meindo-indoan roma', mawasa-wasa sé ra'ica loor wo ra'io makailek in sususuien wutul. Pawerotenna sa sia mengaapo' a si Amang Kasuruan, sia ro'na masiya'.

2 Timotius 3:13

Taan sé tou léwo' wo sé tou mengauwak, séra itu makaléwo' oka. Séra mengauwak sé tou, taniitu ka'i wo sé tou walina maréng sumawel sumuli' muwak iséra.

Yakobus 1:22

Tioo kamu asaloke' mengalinga in Taar i Casuruan, taan musti pengaémaan iow. Sa en Taar itu ra'ica pengaémaan iow, en itu meputéke' kamu imuwako in owak iow in esa.

Yakobus 1:26

Sa si tou maanggap sia maapo' makiit ing kasalé'an i Casuruan, taan sia ra'ica matéir im ba'ba'na, sia itu imuwako in owakna in esa. Em pakaapo'na itu ra'ica wana torona.

Yakobus 3:2

Kita im baya mengaéma' ing kaséaan am baya-waya. Si tou makawoo tuméir im ba'ba'na akar ra'ica suméa' rumoma', sia itu tou lekep si ro'na kumawasa waya in owakna.

2 Petrus 2:13

Wo sé guru ra'ica wutul itu makéré oka ing kawenduan tanu pepe'dis asi kaléwo-léwo'an sé niéma' éra. Mandé ka'i endo, icasalé' éra mengaéma' sé andumoro' ing kasalé'an in owak éra in esa sé ra'ica wutul. Séra itu tanuoka noo wo seringa sa séra lumukut kuman mewali-wali wo icamu, ampa'paan em peri éra karican oka mai.

1 Yohanes 1:10

Sa icuata sapaoka kita ra'ica kawisa mako méma' ing kamesé-meséaan, en itu meputéo icuata Sia itu kotowo wo en Taar-Na ra'ica an atéta.

1 Yohanes 1:6

Sa icuata sapaoka kita menonou meesao wo Sia taan eng katouanta ang kariréimbenganné', kita itumowoo wo ra'ica mengaéma' in sususuien wutul.

1 Yohanes 2:4

Si séi si mengakua, “Katuusanku si Amang Kasuruan” taan ra'ica mengakiit im perénta-Na, sia itu kotowo wo en sususuien wutul ra'ica an aténa.

1 Yohanes 4:20

Sa awéan tou kumua, “Yaku mengaupus si Amang Kasuruan,” taan icasuutna si poowna, sia itu tumowoo. Ampa'paan si séike' si ra'ica mengaupus si poow pakasérénna, tantu ra'ica kawisa sia mengaupus si Amang Kasuruan si ra'ica kaséréanna.

2 Yohanes 1:2

Icaupus ami kamu ampa'paan en sususuien wutul itu an atétao wo en sususuien itu kasake' ai cita akar ing kauré-uré.

3 Yohanes 1:3

Arui keli aku ampa'paan awéan poow maéman imai méé kasairian a yaku sapaoka ko tatap le'tek a si Amang Kasuruan wo pengaémaanmu ka'i en sususuien wutul itu.