1 Yohanes 1:2 - En Taar Weru a nunuwu' é Tontemboan

² En Taar si mengawéé ing katouan itu mewali-wali wo si Amang an sorga. Sia imayo wo sinéréo ami. Ampa'paan in itu aisairi ami wo icua ami ai camu andumoro' ing katouan akar ing kauré-uré.

1 Yohanes 1:2 ပူးပေါင်းရင်းမြစ်များ

Yohanes 1:18

Ra'ica wana tou en sumangkumo suméré si Amang Kasuruan, wayake' si Toyaang-Na Esa-esa. Sia meputé wo si Amang wo susut keli ai Sia. Siao en cumua ai cita andumoro' si séi si Amang Kasuruan itu.

Yohanes 1:4

En Taar itu palemboian ing katouan wo eng katouan itu si sendot en sumendot in até é tou.

Yohanes 10:28

Wo iwéé-Ku ai séra eng katouan akar ing kauré-uré, wo séra ra'ica iwaya-Ku maté akar ing kauré-uré. Wo ra'ica ka'i wana esaan tou e ro'na mandét iséra ang kama-Ku.

Yohanes 14:6

Wo icua i Yesus, “Yakuo en lalan maangé a si Amang Kasuruan, Yaku ka'i si mengakua in sususuien wutul andumoro' i Amang Kasuruan, wo Yaku ka'i si mengawéé mai ing katouan akar ing kauré-uré. Ra'ica wana esake' tou e maai a si Amang sa ra'ica ipakawali-Ku.

Yohanes 15:27

Wo icamu ka'i musti méé ing kasairian a sé tou walina andumoro' Yaku, ampa'paan kamu mewali-walio wo Yaku tumo'tolke' mai asi kataré.”

Yohanes 16:28

Yaku asi Amang owo, wo mai ang kayo'baan anio'. Wo intarépé' itela'u-Ku ka'i eng kayo'baan anio' wo maréng angé sumawel a si Amang-Ku.”

Yohanes 17:3

Si anioo eng katouan akar ing kauré-uré: Katuusan éra si Amang, si Amang Kasuruan si wayake' in esa wo wutul, wo makatuus Yaku si Yesus Kristus si ayutuso i Amang.

Yohanes 17:5

Wo intarépé', o Amang, émaano mai Aku iparayo-rayo wo pasiri-siriin an dior-Mu, ang karapi i rarayo wo en sisiri' si a Yakuo mewali-wali wo si Amang an tutuw eng kayo'baan anio' ra'ipé' niéma'.

Yohanes 19:35

Si tou en suméré ing kamamualian itu in esa, en icumua sapa en sinerénao, wo sé ipakuana itu wutul. Wo kailekanna sapaoka sia makua im butul wosama' percayaan iow.

Yohanes 21:14

Siituo ang kumatelu si Yesus mapaturu' in owak a sé murit-Na kekawus Sia tumou sumawel an uner é tou imaté.

Yohanes 3:13

Ra'ipé' wana esaan tou ka'i en sumangkumo imangé an sorga. Wayake' Yaku si Toyaang i Tou si mai an sorga owo, anaé Yakuo si makailek andumoro' sé an sorga.

Yohanes 7:29

Taan katuusan-Ku Sia, ampa'paan Aku mai ai Sia owo wo Siao e mutusai Yaku.”

Yohanes 8:38

Sapa en sinéré-Ku asi Amang-Ku, siituo en isusui-Ku ai camu. Taan kamu asaloke' mengéma-ngéma' in sapa si aisusui i amangmu.”

Kisah Para Rasul 1:22

tumo'tolai an tutuw i Yesus nibaptis i Yohanes akar Sia icaangkai angé an sorga tumela'u icita. Si tou itu musti mengasairi mewali-wali wo icita sapaoka si Yesus itumou sumawel asi papaté.”

Kisah Para Rasul 10:41

Ra'ica pakasa sé tou Yahudi e ro'na suméré Sia. Taan wayake' sé sairi sé sinisiro i Amang Kasuruan e ro'na suméré. Icamio sé sairi itu, sé icuman wo melep mewali-wali wo Sia, kekawus-Na tinou sumawel.

Kisah Para Rasul 2:32

Si Yesus anioo si tinou sumawel i Amang Kasuruan. Wo icamio im baya e mamuali sairi andumoro' in itu.

Kisah Para Rasul 3:15

Sia si Le'nas itu palemboian ing katouanta pinatéo miow taan Sia tinou sumawel i Amang Kasuruan an uner é tou imaté. Kamio e mamuali sairi sapaoka Sia tumou sumawel.

Kisah Para Rasul 5:32

Wo icamio e mamuali sairi andumoro' waya in itu, wo ka'i e Roh Le'nas si aiwéé i Amang Kasuruan a sé pakasa en tou sé le'tek ai Sia.”

Roma 8:3

En ukum Torat ra'ica kawisa lumowir icita, ampa'paan kita makiit in ukum Torat si ra'ica kaémaanta. Taan niéma'o i Amang Kasuruan si ra'ica kaémaan in ukum Torat. Sia mutuso mai si Toyaang-Na in esa ang kayo'baan anio' mamuali tou tanu iméma'o ing kamesé-meséaan wo imaté e mekar sé tou iméma' ing kamesé-meséaan. Wo ampa'paan im papaté i Toyaang-Na itu, kinala-Nao eng kawasa ing kamesé-meséaanta in tou.

Galatia 4:4

Taan asi oras aitantuo i Amang Kasuruan, yutus-Na si Toyaang-Na ang kayo'baan. Si Toyaang-Na tumou asi esa wéwéné wo menonou le'tek mengaéma' in ukum Torat tanu tou Yahudi.

1 Timotius 3:16

Indior en sususuien wutul itu ra'ica kailekan é tou, taan intarépé' sé icaenep andumoro' in sususuien wutul sé ra'io cakua itu, winuka'o i Amang Kasuruan. Sé icaenep itu tana'i: “Si Yesus imayo wo mamualio tou, wo aituru' i Roh Le'nas sapaoka Sia itu wutul. Sia mapaturu'o in owak-Na a sé malaékat, wo en sisisilen andumoro' Sia itu icaseraro a sé bangsa. Wo Sia émanen é pakasa ing kayo'baan, wo Sia niangkaio mangé an sorga ang karapi i rarayo wo in sisiri'.”

2 Timotius 1:10

Wo intarépé' aituru'-Nao eng kaupusan-Na ai cita wo en lalanna, iwéé-Na mai ai cita si Yesus Kristus, si Lumolowirta. Sa si tou maéman in Abar Kaaruien andumoro' si Yesus Kristus, em papaté ra'ica kumawasa si tou itu taan makéré oka ing katouan akar ing kauré-uré.

Titus 1:2

Ra'ipé' niéma' i Amang Kasuruan eng kayo'baan, Sia ijumanjio sapaoka Sia méé oka mai ing katouan akar ing kauré-uré a sé im pakasa in tou. Wo en janji-Na itu tantu mamuali, ampa'paan Sia ra'ica kawisa tumowo. Wo ampa'paano im paarapen in janji e makéré ing katouan akar ing kauré-uré siituo em patuuran im pasusuiku a sé tou maéman.

1 Petrus 5:1

Yaku ka'i penatua an jamaat kaputé miow. Yaku anio' sairi an tutuw i Kristus pengaokoien. Wo an tutuw i Kristus maai sumawel ang karapi i rarayo wo in sisiri'-Na, yaku icauntep asé tou sé makéré oka bagéan asi rarayo wo in sisiri' si ituru' oka itu. Anaé, sina'uenku kamu sé penatua katawoiku:

1 Yohanes 1:1

En surat anio' andumoro' in Taar si mengawéé ing katouan. En Taar anio' awéano asi kataré-taré si liningao wo sinéréo ami in esa. Wo tinimboiano ami ka'i ing kama ami in esa.

1 Yohanes 2:25

Wo si anioo en aijanji-Nao in esa ai cita: kita menonou oka akar ing kauré-uré.

1 Yohanes 3:5

Kailekan iow sapaoka si Yesus imayo en tumu'bus ing kamesé-meséan, wo ai Sia ra'ica wana kamesé-meséaan.

1 Yohanes 3:8

Taan si séi si mengéma-ngéma'pé' ing kamesé-meséaan, sia itu anu i kikiiten é sétang, ampa'paan si kikiiten é sétang itu tumo'tolke' mai indior mengéma-ngéma' ing kamesé-meséaan. Taan si Toyaang i Amang Kasuruan maai en tumeri im pakasa sé pengaémaan i kikiiten é sétang.

1 Yohanes 4:14

Wo sinéréo ami in esa wo sinairi ami sa si Amang imutuso si Toyaang-Na mai lumowir ing kayo'baan anio'.

1 Yohanes 4:2

Uluren tana'i wosama' ro'na kakailekanta sapaoka e Roh itu Roh i Amang Kasuruan kuma'pa ra'ica: Si tou mangaku sa si Yesus Kristus maai ang kayo'baan mamuali tou, si tou itu makaanu i Roh asi Amang Kasuruan owo.

1 Yohanes 5:11

Eng kasairian itu icumua in tana'i: Si Amang Kasuruan imééo mai ing katouan akar ing kauré-uré ai cita, wo eng katouan akar ing kauré-uré itu kéréanta ampa'paan maéman a si Toyaang-Na.

1 Yohanes 5:13

Aipaticku waya en itu ai camu sé maéman a si Toyaang i Amang Kasuruan, wosama' kakailekan iow sa kinéréano miow eng katouan akar ing kauré-uré.

1 Yohanes 5:20

Kailekanta ka'i sa si Toyaang i Amang Kasuruan imayo wo mééo ing kakailekan ai cita wosama' katuusanta si Amang Kasuruan si Wutul. Wo kita menonou meesao wo si Amang Kasuruan si Wutul itu, ampa'paan kita esa wo si Toyaang-Na Yesus Kristus. Si Yesus itu Kasuruan si Wutul wo Siake' e méma' sé tou ro'na menonou akar ing kauré-uré.