1 Timotius 6:16 - En Taar Weru a nunuwu' é Tontemboan

¹⁶ Siao ka'i si ra'ica kakawasaan im papaté. Sia menonou ang kasendotan wo sé tou ra'ica toro sumusut asi sendot itu. Wo ra'ipé' wana tou si sumangkumo suméré Sia. Siake' si patus siriin. Pakasa eng kawasa ai Sia akar ing kauré-uré. Ulit.

1 Timotius 6:16 ပူးပေါင်းရင်းမြစ်များ

Yohanes 1:18

Ra'ica wana tou en sumangkumo suméré si Amang Kasuruan, wayake' si Toyaang-Na Esa-esa. Sia meputé wo si Amang wo susut keli ai Sia. Siao en cumua ai cita andumoro' si séi si Amang Kasuruan itu.

Yohanes 14:9

Icua i Yesus a si Filipus, “Uréo keli Aku mewali-wali wo icamu, taan ko é Filipus ra'ipé' réén katuusanmu Aku? Si séike' en isuméréo Yaku, sia isuméréo si Amang-Ku. Kéitu réén ko kumua, ‘Ituru'o mai si Amang-Mu ai cami!’

Yohanes 6:46

Ra'ica wana tou en sumangkumo suméré si Amang. Aluar Yaku en isuméréo si Amang ampa'paan Aku mai asi Amang Kasuruan owo.

Yohanes 8:58

Isowat i Yesus ai séra, “En ulitna icua-Ku mangé ai camu, tutuw i Abraham ra'ipé' itumou, Yaku anio' awéano.”

Efesus 3:21

Si Amang Kasuruanke' si parayo wo pasiriin an uner é jamaat ampa'paan kita meesao wo si Yesus Kristus. Irayoo mangé Sia akar a sé tara-taranak akar ing kauré-uré. Ulit!

Filipi 4:20

Mayoo kita rumayo wo sumiri' si Amang Kasuruan, Amangta akar ing kauré-uré! Ulit.

Kolose 1:15

Si Kristus itu tanu paséréan pakasa im peri i Amang Kasuruan si ra'ica kaséréan. Si Kristus itu Toyaang-Na luluna si lébé penting asé pakasa sé niéma'-Na.

1 Timotius 1:17

Irayoo si Amang Kasuruan! Siao si Colanota akar ing kauré-uré. Sia awéan akar ing kauré-uré, Sia ra'ica kaséréan wo Sia wayake' in esa. Sia itu parayo-rayo wo pasiri-siriin akar ing kauré-uré. Ulit.

Ibrani 13:8

Si Yesus Kristus kasake' puté, indior, intarépé' wo akar ing kauré-uré.

Yakobus 1:17

Pakasa sé loor wo lekep, mai an dangka' owo, asi Amang an sorga. Siao e méma' waya sé mengasendot an langit. Sia ra'ica kawisa mawalina, ra'ica tanu in serap wo sé sumesendot, en sendotna ro'na mawalina.

1 Yohanes 1:5

Si anioo en abar sé liningao ami asi Toyaang-Na wo icua ami ai camu, tana'i: Si Amang Kasuruan itu sendot, wo ai Sia itu uli- ulit ra'ica wana kariréimbengan.

1 Yohanes 1:7

Taan sa kita menonou an sendot meputé ka'i wo Sia an sendot, tantu kita menonou imeesa wo sé tou walina. Wo pakasa eng kamesé-meséaanta wu'asan oka in enda' i Yesus Toyaang-Na.

1 Yohanes 4:12

Ra'ica wana tou mandé esake' en sumangkumo isumeré si Amang Kasuruan. Taan sa kita meupu-upusan, si Amang Kasuruan meesa wo icita wo en upus-Na lekep ang katouanta.

Yudas 1:25

Wayake' Sia in esa, si lumowir icita ampa'paano i Yesus Kristus Apo'ta. Sia em patus tumerima i rarayo wo in sisiri', ampa'paan ing kawangko'-Na wo ing kawasa-Na en tumu'tul wo merénta im baya-waya tumo'tolai indior, intarépé' wo akar ing kauré-uré. Ulit.

Wahyu 1:6

Wo niéma'-Na kita mamuali tou-Na ang Kakolanoan-Na, wo mamuali imam-imam sé maselewir a si Amang Kasuruan, Amang-Na. A si Yesus Kristuske' e rarayo wo en sisiri', wo eng kakawasaan akar ing kauré-uré. Ulit.

Wahyu 1:8

Si Amang Kasuruan icumua in tana'i, “Yaku anio' Alfa wo Omega, si awéano indior, si awéan intarépé' wo si maai sa, wo Yaku ka'i Si Makakawasa.”

Wahyu 21:3

Wo kalingaanku en suara taangko' keli am palukutan pasiri-siriin itu makua, “Séréno! Intarépé' em paento'an i Amang Kasuruan an unero é tou. Sia mai oka mento' mewali-wali wo iséra, wo séra mamuali oka tou-Na. Sia in esa mewali-wali oka wo iséra, wo mamuali Amang Kasuruan éra.

Wahyu 22:5

Wo ra'io ka'i wana wengi ang kota itu, wo séra ra'io ka'i maperlu in sendot in sosoloan wo en sendot i yéndo, ampa'paan si Amang Kasuruan in esa oka en sumendot iséra. Wo séra merénta oka tanu kolano akar ing kauré-uré.

Wahyu 4:11

“O, Kasuruan! O, Amang Kasuruan ami! Wayake' Ico em patus makéré in darayo, wo in sisiri' wo ing kawasa. Ampa'paan si Casuruan méma'o im baya-waya, wo ampa'paano ing kasalé'an-Mu pakasa en itu niéma'o wo awéan.”

Wahyu 7:12

Wo icua éra, “Ulit! Irayoo mangé si Amang Kasuruan! Toronake' Sia e rarayo wo en sisiri', eng kapinteran, wo i makapulu'sama', siri', kakawasaan, wo kaketeran akar ing kauré-uré! Ulit.”