1 Timotius 6:11 - En Taar Weru a nunuwu' é Tontemboan

¹¹ Taan ko é Timotius, ico tou i Amang Kasuruan, tumayango mangé ko asé pakasa ing kaléwo-léwo'an. Rumaméjio mangé ko kumiit sé anio': tioo mengarapit, mengaapo' mangé makiit ing kasalé'an-Na, le'tek maéman a si Yesus, mengaupus sé kakélé tou, talesen mengasaru ing kasusaan wo ko'kos en até.

1 Timotius 6:11 ပူးပေါင်းရင်းမြစ်များ

Roma 14:19

Ampa'paano in itu mayoo kita rumaméji mengaéma' andumoro' ing kaeluran wo membém-béan angé ing kaketeran im paémanen si esa wo si esa.

1 Korintus 10:14

Ampa'paan in ituo é poo-poow sé icaupusku, kamu tioo mengaapo' a sé opo-opo'.

1 Korintus 14:1

Poo-poow, musti raméjin iow mengaupus a sé tou walina. Musti raméjin iow ka'i makéré ing kamang tatambér asi Roh Le'nas owo, eng kataré-taré kamang tatambér makua in taar i Amang Kasuruan.

1 Korintus 6:18

Tumayango mangé i mengéma-ngema' in cabul! Eng kamesé-meséaan walina sé pengaémaan é tou, ra'ica wana eng kasiwakan an owakna. Taan si tou mengaéma' in cabul, sia méma'o ing kamesé-meséaan si awéan eng kasiwakan an owakna in esa.

1 Timotius 1:14

Wopé'ka'i, si Casuruanta tumambéro mai ing kamang si lumébé-lébéo a yaku. Niéma'-Na ka'i aku akar makawoo maéman a si Kristus wo ka'i ro'na mengaupus sé tou walina.

1 Timotius 4:12

Tioo iwayamu sé tou maepes im beren ai co ampa'paan ko wo'basé'. Taan émaano mangé en owakmu mamuali paandéan an uner é tou maéman, am pakanuwu'mu, am perimu, ang kaupusanmu a sé tou walina, ang kale'tekanmu wo ang kale'nasanmu a si Casuruan.

1 Timotius 5:10

wo kailekan ka'i é tou sapaoka sia matawoi in loor tanumai: pengaurusenna in sama' sé toyaangna, pengasungkulenna in sama' sé tou mengaai am baléna, pengaselewiranna in sama' sé tou maéman wo pengatawangenna sé tou ang kasusaan wo mengéma-ngéma' in loor a sé pakasa in tou.

1 Timotius 6:20

Timotius, musti téiranmu sumama-sama' waya sé aitoké i Casuruan ai co. Ra'ica toro kumiit memaa-maar sé ra'ica wana torona sé ra'- ica masiri' si Amang Kasuruan, wo ka'i tioo kumiit meindo-indoan roma' in andumoro' sé pakua é tou “kapinteran”, en ulitna siitu ra'ica kapinteran taan asalo meindo-indoan roma' andumoro' i nunuwu'.

2 Timotius 2:21

Taniitu ka'i wo sé tou maéman. Sa awéan tou mento' maéma' ing kaléwo-léwo'an, sia asalo pengapakén i Casuruan asé tawo-tawoien loor. Émaan i Casuruan en até i tou itu male'nas. Si Casuruan arui maké isia ampa'paan sia ka'i tu'tul mengaéma' pakasa in tawoien loor.

2 Timotius 2:22

Ampa'paan ituo, tumayango mangé ko asé kasalé-salé'an sé manaram pengaémaan é tou wo'bas. Taan ko rumaméji mangé mengaéma' in tana'i: Ra'ica mengarapit, lume'tek angé a si Casuruan, mengaupus angé sé kakélé in tou wo menonou angé elur wo sé kakélé tou. Émaano mangé waya en itu mewali-wali wo sé pakasa in tou sé maémano a si Casuruan ang karapi in até weresi.

2 Timotius 3:10

Taan ko é Timotius, makaileko sé aisusuiku, em periku, em pendirianku, tambisa aku maéman a si Yesus, eng katalesenanku, en upusku a sé tou wo eng kale'tekanku mengaéma' in tawoienku.

2 Timotius 3:17

Wo in taniitu, eng Kitap Le'nas itu méma' sé tou i Amang Kasuruan makawoo méma' im pakasa sé loor.

Ibrani 12:14

Rumaméjio menonou meelu-eluran ang karapi é pakasa in tou, wo rumaméji ka'i menonou le'nas. Ampa'paan sa si tou ra'ica menonou le'nas, sia ra'ica suméré si Amang Kasuruan sa.

1 Petrus 3:11

Sia musti menonou tumayang asé kaléwo-léwo'an wo mengaéma'o mangé sé loor. Sia ka'i musti rumaméji ang karapi i mauli-ulit e menonou meelu-eluran wo sé tou walina.