1 Timotius 5:14 - En Taar Weru a nunuwu' é Tontemboan

¹⁴ Ampa'paan ituo icasalé'ku sé balu wéwéné wo'basé' wosama' séra masalé'pé' kawéngen sumawel. Sa séra kawéngené' sumawel, séra ro'napé' makéré toyaang wo murus im pamalé éra in esa. Wo in taniitu si kikiiten é sétang ra'- ica wana témpo e maké sé tou e muruk i ngaranta tou maéman.

1 Timotius 5:14 ပူးပေါင်းရင်းမြစ်များ

Roma 14:13

Ampa'paano in itu tioo kita membém-béané' ing kaséaan si esa wo si esa. Taan aweso taré kamu rumaméjio ra'ica mengaéma' in andumoro' sé ro'na tumawér sé poo-poow an esa paémanen katawéran wo icasélé'kow.

2 Korintus 11:12

Sapa em pinengaéma'ku intarépé' si ra'ica tumerima in tatawang ai camu pengéma-ngémaanku oka. Wo in taniitu sé ruru'du'an wangko' itu ra'io toro ka'i rumayo in owak wo kumua em pengaémaan éra meputé wo sé niéma' ami.

1 Timotius 2:8

Ampa'paano in itu, icasalé'ku wosama' am bisa-wisake' sé tuama mengasombayang angé ang karapi in até weresi a si Casuruan, ra'ica ang karapi in e'bow wo meindoan roma'.

1 Timotius 4:3

Pengasusui éra a sé tou ra'ica toro kumawéng, wo ra'ica toro ka'i kuman sé piraan kakanen sé ra'ica toro kanen. En ulitna pakasa eng kakanen niéma'o i Amang Kasuruan ro'na kanen. Wo sé tou maéman sé makaileko in sususuien wutul, sa séra kuman, kumua owo mangé makapulu'sama' a si Amang Kasuruan wo ro'nao kuman.

1 Timotius 5:11

Taan sé balu wéwéné wo'basé' sé ra'ipé' imangé in enem ngapulu' ngata'un, ra'ipé' toro daftar en tawangen. Ampa'paan sa séra kinawasao ing kasalé'an in owak si ra'ica wutul, tantu séra masalé'pé' kawéngen sumawel wo ra'io mengaselewir a si Kristus,

1 Timotius 6:1

Awéan sé ata maémano a si Yesus, séra itu musti mengasiri' si tuang éra. Wo in taniitu, sé tou sé ra'ica maéman a si Yesus ra'ica wana alasan e mojat i ngaran i Amang Kasuruan wo ka'i in sususuienta.

Titus 2:5

Wo ka'i pasusuian angé sé inang-inang wo'bas itu wosama' menonou maké ing kapinteran asi Casuruan owo, menonou le'nas an dior i Casuruan, re'dem maelur im pamalé, loor en até wo le'tek a si penanaanna. Sa séra mengaéma' in taniitu, en Taar i Amang Kasuruan ra'ica ojaten é tou.

Titus 2:8

An tutuw ko masusui, musti pakénmu sé nunuwu' wutul wo sumoma wosama' ko ra'ica iséro' é tou. Wo in taniitu sé kaséké'mu malawi', ampa'paan ra'ica wana en andumoro' sé ra'ica loor ai cita sé ro'na ipemaa-maar oka éra.

Ibrani 13:4

Pakasa in tou musti sumiri' ing kawéng wo sé mempenanaan musti le'tek esa wo si esa. Ukumen oka i Amang Kasuruan sé tou sundal wo sé tou mabersina.