1 Timotius 5:1 - En Taar Weru a nunuwu' é Tontemboan

¹ Timotius! Ico tioo tarepet masina'u a si tuama matu'a mai ai co. Aweso taré' sina'uenmu mangé in sama' sia tanu ko manuwu' a si amangmu. Wo a sé mangalitou, pasina'uenmu mangé in sama' séra tanu ko manuwu' a si tuarimu in esa.

1 Timotius 5:1 ပူးပေါင်းရင်းမြစ်များ

Matius 23:8

Taan kamu, tioo masalé' im patuulen éra ‘guru’! Ampa'paan si Guru miow wayake' in esa wo icamu im baya mepoow.

Kisah Para Rasul 14:23

Wo séra in dua sumisir sé penatua torona é jamaat itu. Séra sumombayang wo muasa en sumarakan sé penatua itu a si Casuruan si paémanen éra.

Kisah Para Rasul 15:4

Icateka' mangé an Yerusalem, séra sinungkul é jamaat, é ruru'du'an wo sé penatua ang kota itu ang karapi in arui en até. Wo isisil éra in dua a sé tou itu, andumoro' im pakasa sé niéma'o i Amang Kasuruan ai séra in dua.

Kisah Para Rasul 15:6

Kekawus in itu, sé ruru'du'an wo sé penatua mali'us e mepaar andumoro' im perkara itu.

Kisah Para Rasul 20:17

Anaé, an tutuw i Paulus a Miletus, sia rumu'du' tou mangé tumowa sé penatua é jamaat an Efesus wosama' mai a Miletus.

Roma 13:7

Ampa'paan in ituo wérano sapa si patus wéran iow a sé pakasa in tou. Wérano mangé em pajak a sé pemerénta sa kamu musti mér im pajak, wo wérano mangé en cukai sa kamu musti mér in cukai. Wo pengalingan angé sé tou sé patus pengalingan iow, wo pengasiriin angé sé tou sé patus pengasiriin iow.

Galatia 6:1

Poo-poow, sa si esa tou an uner iow kinakailekan méma' ing kaséaan, kamu sé menonou pakaakinen i Roh Le'nas, musti akinen iow si tou itu an lalan wutul ang karapi ing ko'kos en até. Wo téirano en owak iow in esa wosama' ra'ica katawéran im pangepé'an kaputé i tou méma' ing kaséaan itu.

1 Timotius 5:17

Sé penatua an jamaat sé mengaéma' in tawoienna ang karapi in loor, séra itu patus pasiri-siriin makarua lumepet. Wopé'ka'i sé re'dem makua in Taar i Casuruan wo masusui a sé jamaat.

1 Timotius 5:2

Taniitu ka'i wo sé wéwéné sé matu'a mai ai co. Musti sina'uenmu mangé in sama' séra tanu ko manuwu' a si inangmu in esa. Wo sé mangala'un, sina'uenmu mangé ka'i séra ang karapi ing kale'nasan in atému tanu ko manuwu' a si tuarimu in esa.

Titus 2:2

Sina'uenmu mangé sé tuama matu'a wosama' makawoo tumang in owak, makaperi loor akar pasiriin é tou, mapaké ing kapinteran asi Casuruan owo, tatapke' maéman a si Casuruan, mengaupus sé kakélé tou wo talesen mengasaru ing kawenduan.

Titus 2:6

Taniitu ka'i wo sé mangalitou, sina'uen angé séra wosama' makakawoo tuméir in owak am baya-waya.

Yakobus 3:17

Taan si tou awéan kapinteran asi Amang Kasuruan owo itu, tana'i: Kataré sia menonou ang karapi in até weresi wo masalé' meelu-eluran wo sé tou, sama' a sé tou, téés, wuta ing kaupusan a sé tou wo mengéma-ngéma' andumoro' sé loor, ra'ica marapit wo ra'ica punek.

Yakobus 5:14

Sa awéan esaan angé ai camu sumakit, aweso taré sia tumowa sé penatua an jamaat, wosama' isombayang éra wo kisun éra in solo sia maké i ngaran i Casuruan.

1 Petrus 5:1

Yaku ka'i penatua an jamaat kaputé miow. Yaku anio' sairi an tutuw i Kristus pengaokoien. Wo an tutuw i Kristus maai sumawel ang karapi i rarayo wo in sisiri'-Na, yaku icauntep asé tou sé makéré oka bagéan asi rarayo wo in sisiri' si ituru' oka itu. Anaé, sina'uenku kamu sé penatua katawoiku:

2 Yohanes 1:1

En surat anio' a yaku owo si penatua an jamaat. Ipaticku en surat anio' a si inang si sinisir i Amang Kasuruan, wo ka'i a sé toyaang i inang sé icaupusku kumiit in sususuien wutul i Amang Kasuruan. Wo ra'ica yakuke' e mengaupus icamu, taan pakasa in tou sé makailek in sususuien wutul mengaupus camu.

3 Yohanes 1:1

En surat anio' a yaku owo penatua an jamaat. En surat anio' aipaticku ai co é poowku Gayus si uli-ulit icaupusku.

Wahyu 4:4

Wo an li'cir im palukutan pasiri-siriin itu awéan ka'i rua ngapulu' epat palukutan pasiri-siriin walina. Wo asé palukutan pasiri-siriin itu, makalukut rua ngapulu' epat matu'a sé mekarai ing kulo' wo an do'kos éra awéan mahkota mas.