1 Timotius 4:6 - En Taar Weru a nunuwu' é Tontemboan

⁶ Timotius, sa sé aisusuiku itu icuamu waya a sé poo-poow esa paémanen, ico imamualio ata maselewir in loor a si Kristus Yesus. Wo kete-ketereno mangé en atému ang karapi i nunuwu' i Amang Kasuruan si paémanenta wo karapi in sususuien wutul sé kiniitmuo mai akar intarépé'.

1 Timotius 4:6 ပူးပေါင်းရင်းမြစ်များ

Matius 13:52

Wo icua i Yesus ai séra, “Ampa'paan in itu, susur é makailek wutul in Torat sé tumerimao in sususuien andumoro' ing Kakolanoan in Sorga itu, séra ayandé tanu si makawalé cumesot ing kasiyaan weru wo si uré asi tampa pengaémaanna ing kasiyaan.”

Lukas 1:3

Pakasa sé kamamualian itu tini'tiro sumama-sama' tumo'tolai asi kataré. Kekawus in itu werotenku waya en itu loor ipatic kumiit wutul ing kamamualian itu torona i tuang,

Kisah Para Rasul 1:15

Asi makasa, sé poo-poow esa paémanen a si Yesus imaumung mewali-wali. Eng kakeli éra wona' sangaatus rua ngapulu' tou. Wo si Petrus tumulung an uner éra wo kumua,

Kisah Para Rasul 20:31

Ampa'paan in ituo, mareti-retio mangé kamu. Musti pena'né-na'néi iow sapaoka ang kauré in telu ngata'un aku mewali-wali wo icamu, endo wo em bengi kamu pengasina'uenku si esa wo si esa akar en danona im berenku menii-niis.

Kisah Para Rasul 20:35

Pakasa sé niéma'kuo itu, mééo esa tuus ai camu sapaoka ang karapi in tumawoi le'tek tanu siitu, ro'na sémbonganta sé tou lembi. Wo musti ta'néienta si aicua i Apo' Yesus in tana'i, ‘Lébé arui mengawéé wotaré mengaterima.’ ”

Roma 15:15

Mandé in taniitu, yaku ra'ica malawi' e matic piraan sina'u an surat anio' en ta'néi ai camu, ampa'paan si Amang Kasuruan tumambéro mai in tawoien anio' a yaku.

1 Korintus 4:17

Ampa'paan in ituo yutusku mangé si Timotius ai camu ampa'paan sia itu niéma'kuo tanu toyaangku in esa wo icaupusku, sia ka'i le'tek a si Casuruan. Mangéna oka ita'néi sumawel ai camu andumoro' tambisa eng katouanku makiit a si Kristus Yesus. Eng katouanku itu ipenusu-nusuikuo a sé jamaat am pakasa in tampa.

2 Korintus 11:23

Wo ipakua éra sapaoka séra sé tou maselewir si Kristus. Yaku maroma' tanuoka tou nganga', yaku mengaselewir asi Kristus ilumébé mai ai séra. Yaku matawoi ilumébé mai wo ing kare'dem éra, makakeli-keli ipauntep am bui, makakeli-keli pengaokoien, wo makakeli-keli matawio imaté.

2 Korintus 3:6

Siao e méma' icami makawoo imamuali maselewir sé makua in esa perjanjian weru a sé tou. Em perjanjian itu ra'ica an ukum sé aipatico indior, taan asi Roh i Amang Kasuruan owo. Ampa'paan en ukum aipatic itu sa ra'ica kiiten, makawali am papaté, taan e Roh i Amang Kasuruan mawéé ing katouan.

2 Korintus 6:4

Aituru'o ami sapaoka am baya-waya kami ata i Amang Kasuruan. Ampa'paan eng kawenduan, eng kasusaan wo ing kawenduan pinendam amio ang karapi in talesen,

Efesus 6:21

Si Tikhikus oka e maangé ai camu eng kumua in andumoro' ing katouanku wo sapa si niéma'ku, wosama' ro'na kakailekan iow andumoro' yaku. Sia poow si paupu-upusta wo sia tou le'tek mengaselewir si Casuruan.

Filipi 2:20

Ra'ica wana tou tanu si Timotius, si esa até wo esa wewerot wo yaku. Sia wutu-wutul mawéé rékén ing katoronaan iow.

Filipi 2:22

Taan kailekano miow eng kale'tekan i Timotius kinaujiano. Sia sumémbongo mai a yaku an tutuw imengua-ngua in Abar Kaaruien, tanu si esa toyaang masémbong a si amangna.

Filipi 3:16

Em penting keli kita menonou kiit asé sapa sé kinéréantao akar intarépé'.

Kolose 2:19

En ulitna si tou tanu siitu ra'ica mengamangén asi Kristus si capala é pakasa in tou. Si Kristus itu tanu ro'kos si mengatu'tul waya in owak sé pineesa i no'at wo im buku-wuku, wosama' en owak-Na makaketer kumiit ing kasalé'an i Amang Kasuruan.

Kolose 3:16

Wo iwayao e nunuwu' i Kristus kasake' an até miow ang karapi i mawuta-wuta akar kamu si esa wo si esa ro'na mensun-susuian wo mensin-sina'uan ang karapi wuta ing kapinteran asi Amang Kasuruan owo. Wo icantaro mangé e mazmur, kakantaren rarayoan wo kakantaren rohani wo mawéé mangé i makapulu'sama' a si Amang Kasuruan si lumembo mai an até miow.

Kolose 4:7

Pakasa en abar andumoro' yaku am bia'i, icua oka i Tikhikus ai camu. Sia poow si caupusta, ata le'tek si re'dem matawoi wo ka'i karapi ami e maselewir si Casuruan.

1 Tesalonika 3:2

wo si Timotius poowta an esa paémanen, yutus ami mangé ai camu. Sia itu kara-karapita matawoi a si Amang Kasuruan e mengakua in Abar Kaaruien andumoro' i Yesus Kristus. Yutus ami si Timotius maangé e méé ing kaketeran an até miow wosama' em paémanen iow a si Yesus makaketer.

1 Timotius 1:10

torona ka'i é tou mengacabul, sé tuama mengacabul a sé kakéléna tuama, sé mapu'is in tou en wangkér émaan ata, sé kotowo, sé tou mengasairi in towo wo ka'i sé tou makélong in sususuien wutul.

1 Timotius 4:16

Ampa'paan ituo, téirano mangé sumama-sama' en owakmu wo ka'i téirano mangé sumama-sama' en sususuien wutul itu. Ico musti le'tek mengaéma' im pakasa in itu. Sa émaanmu waya en itu, ico lowiren i Amang Kasuruan ang karapi é tou sé mengalinga ai co.

1 Timotius 6:3

Si séi masusui in sususuien walina wo maanggap in sususuien wutul i Apo'ta Yesus Kristus suméa', wo ka'i ra'ica makiit in sususuienta mengaapo',

2 Timotius 1:6

Indior aku maroo ing kama an do'kosmu wo si Amang Kasuruan tumambérai ing kamang ai co. Ampa'paano in itu ita'néiku ai co wosama' re'dem maké in tatambér si aiwééo i Amang Kasuruan ai co.

2 Timotius 3:10

Taan ko é Timotius, makaileko sé aisusuiku, em periku, em pendirianku, tambisa aku maéman a si Yesus, eng katalesenanku, en upusku a sé tou wo eng kale'tekanku mengaéma' in tawoienku.

2 Timotius 4:3

Émaanmu waya en itu, ampa'paan asi esa endo mengangai sa, sé tou ra'io kiim luminga in sususuien wutul itu. Taan taré towan éra sé guru sé icasalé' éra e marui in até éra ang karapi i nunuwuun manam pengalingan.

Titus 2:1

Taan ko é Titus, tioo ko meputé wo iséra! Musti susuianmu sé tou kumiit in sususuien wutul.

1 Petrus 2:2

Aweso taré kamu mamualio tanuoka si toyaang si makatoué' wo meré'o-ré'om en sumusu asi inangna, kamu ka'i musti meré'o-ré'- om melep si wutu-wutul susu si nunuwu' i Amang Kasuruan. Ang karapi kamu imelep in itu em paémanen iow a si Amang Kasuruan makawangkoo akar kamu malowir,

2 Yohanes 1:9

Si tou ra'io ka'i makiit in sususuien i Kristus wo makiit oka in sususuien walina, sia itu ra'ica makaanu si Amang Kasuruan. Taan si tou makiit in sususuien i Kristus, sia itu makaanu si Amang wo ka'i si Toyaang.

Yudas 1:5

Pakasa en itu kinailekano miow, taan icasalé'ku ita'néi ai camu andumoro' si anio': Indior linowiro i Amang Kasuruan sé tou Israel kumesot an tana' Mesir, taan kekawus in itu, patén-Na en tou sé ra'ica maéman ai Sia.