1 Timotius 4:16 - En Taar Weru a nunuwu' é Tontemboan

¹⁶ Ampa'paan ituo, téirano mangé sumama-sama' en owakmu wo ka'i téirano mangé sumama-sama' en sususuien wutul itu. Ico musti le'tek mengaéma' im pakasa in itu. Sa émaanmu waya en itu, ico lowiren i Amang Kasuruan ang karapi é tou sé mengalinga ai co.

1 Timotius 4:16 ပူးပေါင်းရင်းမြစ်များ

Markus 13:9

Anaé, matéi-téiro mangé kamu! Ampa'paan kamu tangkaan oka é tou wo isarakan éra an sidang agama wo pangkuren éra am balé paapo'an é agama Yahudi. Iwali éra kamu an dior i gubernur wo a sé kolano ampa'paan kamu makiit Yaku. Asi témpo ituo kamu ro'na kumua a sé tou keli andumoro' in Abar Kaaruien.

Lukas 21:34

Wo icua i Yesus, “Téirano mangé sumama-sama' en owak iow, tioo en até miow wuta ing kasalé-salé'an sé ra'io masoma wo mengele-ngelep akar i malangu wo tioo kamu maindé-indé' andumoro' ing kaperluan iow susur in endo. Sa kamu mengéma-ngéma'ke' tanu siitu, an tutuw si Toyaang i Tou maai sumawel, kamu ra'ipé' tu'tul. Ampa'paan si endo itu tumarépé'anke'mai, tanuoka in ta'kong ipatangka' sé binatang.

Kisah Para Rasul 26:22

Taan yaku tinawang i Amang Kasuruan, siituo aku menonoué' akar asi endo anio'. Wo intarépé' aku makatulung am bia'i e méé kasairian andumoro' si Yesus ai camu im baya, tou sé iparangka-rangka' kuma'pa tou sé ipawawa-wawa'. Pakasa sé aicuaku itu meputé sé aicuao i Musa wo sé nabi indior.

Kisah Para Rasul 6:4

Wo in taniitu, kami asaloka mengasombayang wo mengakua in Taar i Amang Kasuruan.”

Roma 11:14

Arapenku, ang karapi in tawoienku itu sé tou Israel sé esa taranak wo yaku manganat ai camu tou ra'ica Yahudi. Ang karapi in tumaniitu, arapenku aku ro'na lumowir piraan tou asé tou Israel.

Roma 16:17

Poo-poowku, sina'uenku kamu, mareti-retio mangé a sé tou sé masalé' mengaéma' ing kapetanéan, wo sé masalé' mengasélé'kow im paémanen é tou a si Amang Kasuruan. Séra mengasusui in sususuien sé membalinaan wo in sususuien wutul sé kinéréano miow. Anaé, tumayango mangé ai séra.

Roma 2:7

Sé tou le'tek mengaéma' sé loor sé masalé' makéré i rarayo wo in sisiri' wo ing katouan sé ra'ica maka'pu, séra wéan-Na oka ing katouan akar ing kauré-uré.

1 Korintus 1:21

Ampa'paan mandé tambisa eng kapinteran é tou ang kayo'baan, ra'ica makawoo makatuus si Amang Kasuruan sa asalo maké ing kapinteran in esa. Taan ampa'paan ing kapinteran i Amang Kasuruan, pinusé'-Nao en lumowir sé tou maéman ai Sia kumiit in abar ipakua-kua ami. En abar itu, paanggapen é tou ra'ica maéman a si Yesus, abar ra'ica wana torona.

1 Korintus 9:22

An tutuwku an uner é tou ra'ipé' keter em paémanen, émaanku ka'i en owakku meputé wo iséra, wosama' aku ro'na maakin iséra a si Kristus. Niéma'kuo en owakku meputé wo sé pakasa in tou sé paselewiranku wo lalan sapake' mangé en itu, émaanku, en lumowir piraan tou ai séra.

1 Korintus 9:27

Pelati-latinku wo kawasanku pakasa en owakku eng kumiit ing kasalé'an i Casuruan. Yaku méma' tanu siitu, wosama' aku ra'ica kaputé wo sé tou aicélong i Amang Kasuruan, taan aku makéré laasa kumawusai aku makua in Abar Kaaruien andumoro' i Yesus Kristus a sé tou.

Efesus 4:14

Wo in taniitu, kita ra'io ka'i kaputé é toyaang sé taporakké' pauwaken wo ipawali-walipé' i membam-balinaan sususuien é tou sé ra'ica wutul. Séra mengasélé'kow sé tou ang karapi in sususuien sé mengauwak.

Kolose 4:17

Wo icuao mangé a si Arkhipus, “Tawoieno mangé en tawoien si aiwéé mai i Casuruan ai co akar ing kumawus.”

1 Tesalonika 2:16

Séra itu rumaméji mengala-ngala' icami wosama' kami ra'ica toro kumua in taar i Amang Kasuruan a sé tou ra'ica Yahudi, émaan éra sé tou itu ra'ica malowir. Wo in taniitu eng kamesé-meséaan éra mengawe-ngaweso akar ra'io icakua. Wo intarépé' eng kae'bowan i Amang Kasuruan itumenao iséra.

1 Timotius 1:3

An tutuwku maangém a Makedonia, pangilekenku ko mentoo mio' an Efesus. Am bitu ko ro'na sumina'u sé tou masusui in sususuien ra'ica wutul, wosama' yento' érao masusui in sususuien sé ra'ica wutul itu.

1 Timotius 4:15

Émaanmuo mangé mauli-ulit pakasa sé aicuaku. Wo in taniitu kaséréan é tou ko awéan kalébéan maurus sé jamaat.

1 Timotius 4:6

Timotius, sa sé aisusuiku itu icuamu waya a sé poo-poow esa paémanen, ico imamualio ata maselewir in loor a si Kristus Yesus. Wo kete-ketereno mangé en atému ang karapi i nunuwu' i Amang Kasuruan si paémanenta wo karapi in sususuien wutul sé kiniitmuo mai akar intarépé'.

2 Timotius 2:10

Ampa'paan in iituo aku talesen mengawuléng ing kawenduan itu wosama' sé tou sinisiro i Amang Kasuruan ro'na maéman a si Kristus Yesus wo makéré ing kalowiran ang karapi i rarayo wo in sisiri' akar ing kauré-uré.

2 Timotius 3:14

Taan musti timboienmu sumama-sama' en sususuien wutul itu sé tinerimamuo wo si paémanenmu. Ampa'paan kailekanmuo im butul sé tou isumusuio ai co indior anaé séra ro'na émanenmu.

2 Timotius 4:2

icuamuo mangé en Taar i Casuruan a sé tou, loor kuma'pa ra'ica loor en orasna, ko musti tu'tul e mengua-ngua in Taar itu. Sina'ueno mangé sé tou mengaéma' ing kameséaan, romaan angé séra ang karapi wuta ing katalesenan an tutuw ko mengasusui iséra.

Titus 1:9

Séra ka'i musti tou wutu-wutul makiit in sususuien wutul si sususuien aisusuio ai séra. Wo in taniitu kawooan éra maké in sususuien wutul itu en sumina'u sé tou wo ka'i makawoo rumondor im bewerot é tou sé masundur in sususuien itu.

Titus 2:15

Éi Titus, musti isusuimu waya en itu a sé tou maéman. Sina'uen angé séra wosama' émaan éra waya en itu wo romaanmu sé tou mengaéma' ing kaséaan. An tutuw ko mengasusui, mengasina'u wo mengaroma', émaanmu waya en itu maké ing kawasa i Casuruan wosama' ko pasiri-siriin wo pengalingan é tou. Tioo iwayamu sé tou maepes im beren ai co.

Titus 2:7

Wo ko é Titus, em perimu musti mengaéma' in loor wosama' ko ro'na mamuali paandéan é tou. Sa ko sumusui, mengasusui angé ang karapi i makakii-kiit wo rondor en até.

Filemon 1:19

Yaku Paulus, kamakuo in esa e matic in anio': “Yaku oka en tumu'bus pakasa in utang i Onesimus.” Wo ra'io sangali ita'néiku sapaoka ko awéan utang a yaku e makawali ico makéré ing katouan weru an tutuw ko mamualio tou maéman.

Ibrani 12:15

Mareti-retio mangé oréoka awéan esaan ai camu kumélong in upus aitambér i Amang Kasuruan. Ampa'paan sa awéan tou tanu siitu, sia mamuali tanu in tinanem racung an uner iow akar méma' ing kasusaan wo en racungna luméwo' sé tou keli.

Ibrani 13:9

Tioo kamu isélé'kow in sususuien sé membam-balinaan sé ra'ica meputé wo in sususuien i Kristus. Lébé loor en até miow keteren ampa'paan kamu asalo makawangén asi upus aitambér i Amang Kasuruan. Sé atoran andumoro' ing kakanen, mandé kiiten iow, en itu ra'ica méé katoronaan ai camu.

Yakobus 5:20

Ta'néien iow en anio': Si tou e makin sumawel si tou meséa' tumela'u in lalan sélé'kow, niéma'nao e mu'kur i tou itu lowiren oka am papaté wo niéma'nao eng kamesé-meséaan i tou itu niampungan.