1 Timotius 3:16 - En Taar Weru a nunuwu' é Tontemboan

¹⁶ Indior en sususuien wutul itu ra'ica kailekan é tou, taan intarépé' sé icaenep andumoro' in sususuien wutul sé ra'io cakua itu, winuka'o i Amang Kasuruan. Sé icaenep itu tana'i: “Si Yesus imayo wo mamualio tou, wo aituru' i Roh Le'nas sapaoka Sia itu wutul. Sia mapaturu'o in owak-Na a sé malaékat, wo en sisisilen andumoro' Sia itu icaseraro a sé bangsa. Wo Sia émanen é pakasa ing kayo'baan, wo Sia niangkaio mangé an sorga ang karapi i rarayo wo in sisiri'.”

1 Timotius 3:16 ပူးပေါင်းရင်းမြစ်များ

Matius 1:23

“En ulitna, si esa mangala'un maowa-owak oka wo itouna oka mai esa toyaang tuama wo ngaranan éra Sia Imanuel.” (En kaangéanna, Si Amang Kasuruan mewali-wali wo icita.)

Matius 13:11

Isowat i Yesus, “Si Amang Kasuruan imééo mai ing kamang tatambér ai camu e makailek in sususuien sé icaenepé' andumoro' ing Kakolanoan in Sorga, taan ai séra ra'ica.

Matius 28:2

Wo tumarépé'- anke'mai awéan pangéro' repet. Ampa'paan awéan esa malaékat i Casuruan tumumpa an sorga owo mai miléi im batu aipénet ing kubur itu wo sia lumukut am bawo im batu itu.

Matius 3:16

Kumawusai nibaptis, si Yesus makala'us kumesot an dano wo asi témpo ituke' en langit mawuka' wo kaséréan-Na e Roh i Amang Kasuruan tanuoka mombo tumumpa mai ai Sia.

Matius 4:11

Kekawus in itu, si Yesus itela'u i kikiiten é sétang. Wo sé malaékat mai en sumelewir Sia.

Markus 1:13

Eng kauré-Na an tana' kapayasan epat ngapulu' ngando wo pinangepé'an i kikiiten é sétang. Wo Sia mento' mewali-wali wo sé binatang sé ra'ica papiaran wo ka'i paselewiran é malaékat.

Markus 16:19

Makanuwu' mako si Apo' Yesus a sé murit-Na, Sia icaangkai angé an sorga wo lumukut ang kakan i Amang Kasuruan.

Markus 16:5

An tutuw éra muntep angé ang kubur, séra mangaya'ka' ampa'paan sérén éra ang kakan in tinekelan i mayat i Yesus awéan esa mangalitou mekarai ing kulo' makalukut.

Lukas 2:32

Wo Sia tanu in sendot si aiwéé i Amang Kasuruan en tumélang in até é tou walina wosama' séra ro'na mai a si Amang Kasuruan, wo ka'i en sendot itu e méma' sé tou-Mu Israel ro'na irayo é tou walina.”

Lukas 20:44

Anaé, sa si Daud in esa mengatuul si Kristus itu Tuangna, tambisa réén wo icuata Sia itu taranakna ka'i?”

Lukas 22:43

Wo awéan esa malaékat an sorga, mai mapaturu' in owakna a si Yesus e méé ing kaketeran ai Sia.

Lukas 24:4

Ang karoro'an éra i makatulung, séra tanuoka taré tou bingo ampa'paan memero-merot ing kinamamualian itu wo tumarépé'anke' mapaturu'o mai rua tou mekarai ing kulo' menéla-nélap, makatulung an duru éra.

Lukas 24:51

An tutuw Sia kumamang iséra, tumo'tolo Sia icaangkai angé an sorga akar imetalicur wo iséra.

Yohanes 1:14

Wo en Taar itu mamualio tou wo Sia mento' an unerta. Wo sinérétao eng kawangko'-Na itu, si tinerima-Nao asi Amang owo ampa'paan Sia Toyaang-Na in Esa-esa. Ampa'paan en Taar si mamualio tou itu, kinailekantao andumoro' in upus aitambér i Amang Kasuruan wo in sususuien wutul-Na.

Yohanes 13:3

Kailekan i Yesus pakasa eng kawasa aiwééo mai i Amang-Na ai Sia. Kailekan-Na ka'i Sia mai asi Amang Kasuruan owo wo maréng oka ai Sia.

Yohanes 15:26

Taan yutus-Ku oka ai camu si Matawang asi Amang owo. Siao si Roh Le'nas si maali icamu asi sususuien wutul andumoro' i Amang Kasuruan. An tutuw-Na i maai, Sia méé oka ing kasairian andumoro' Yaku.

Yohanes 16:28

Yaku asi Amang owo, wo mai ang kayo'baan anio'. Wo intarépé' itela'u-Ku ka'i eng kayo'baan anio' wo maréng angé sumawel a si Amang-Ku.”

Yohanes 17:5

Wo intarépé', o Amang, émaano mai Aku iparayo-rayo wo pasiri-siriin an dior-Mu, ang karapi i rarayo wo en sisiri' si a Yakuo mewali-wali wo si Amang an tutuw eng kayo'baan anio' ra'ipé' niéma'.

Yohanes 20:12

Sérénna awéan rua malaékat sé mekarai ing kulo', makalukut asi tampa winetaan owo i mayat i Yesus. Si esa an duru in do'kos wo si esa an duru ing kécéi.

Yohanes 6:62

Sa ra'ica icasalé' miow, tumambisa réén sa sérén iow Aku Toyaang i Tou icaangkai angé an tampa-Ku owo?

Kisah Para Rasul 1:19

Pakasa é tou an Yerusalem makailek sapa e mamuali a si Yudas, akar en tana' itu ningaranan éra maké i nunuwu' éra in esa, ‘Akeldama’, eng kaangéanna ‘Tana' in Enda'.’

Kisah Para Rasul 10:34

Wo tumo'tolo si Petrus rumoma', “En ulitna intarépé'o kailekanku sa si Amang Kasuruan itu ra'ica mengasisir tou.

Kisah Para Rasul 14:27

Icatéka' mangé an Antiokhia, towan éra sé jamaat e maumung. Wo sisil éra in dua pakasa sé niéma' i Amang Kasuruan ai séra. Sisil éra ka'i tambisa si Casuruan muka' in lalan akar sé tou ra'ica Yahudi ro'na maéman a si Yesus.

Kisah Para Rasul 20:28

Ampa'paan in ituo, musti téiran iow sumama-sama' en owak iow in esa wo sé jamaat si aiwéé i Roh Le'nas en téiran iow. Téiran iow sé jamaat i Amang Kasuruan tanu si gembala matéir sé domba-Na. Sé jamaat itu mamuali anu i Amang Kasuruan ampa'paan linowir-Na séra in enda'-Na in esa.

Roma 10:12

E nunuwu' i Amang Kasuruan itu torona im pakasa é tou, ampa'paan sé tou Yahudi wo sé tou walina puté waya. Si Casuruan wayake' in esa, Sia itu Kasuruan é pakasa sé tou. Wo pakasa en tou sé mekiupus ai Sia kamangen-Na oka ang karapi i lumébé-lébé.

Roma 10:18

Taan wuéienku: Ra'ipé' réén sumangkum ako sé tou Israel luminga in Abar Kaaruien andumoro' i Yesus Kristus? Tantu séra sumangkumo luminga. Ampa'paan ang Kitap Le'nas aipatic in tana'i, “En suara é tou mengakua in abar, imakaro am pakasa ing kayo'baan, wo e nunuwu' éra imakaro a sé im pakasa é tou.”

Roma 16:25

Irayoo mangé si Amang Kasuruan! Siao e ro'na méma' im paémanen iow makaketer tanu en aituru' an Abar Kaaruien andumoro' i Yesus Kristus si pakua-kuaku. En Abar Kaaruien itu pengakuaku kiit in aituru' i Amang Kasuruan si paene-enep-Na tumo'tolai indior.

Roma 16:26

Taan intarépé', ampa'paano im perénta i Amang Kasuruan si menonou akar ing kauré-uré, si paene-enep-Na itu aituru'o wo aicuao a sé im pakasa in suku maké ing kitap-kitap sé aipatico é nabi, wosama' séra maéman wo le'tek a si Amang Kasuruan.

Roma 3:4

Tantu émaan-Na! Ampa'paan si Amang Kasuruan itu wutul, wo pakasa en tou kotowo. Tanu en aipatic ang Kitap Le'nas andumoro' i Amang Kasuruan in tana'i, “Pakasa sé aicua-Mu wutul. An tutuw Ko in akimen, tantu Ico muntung.”

Roma 8:3

En ukum Torat ra'ica kawisa lumowir icita, ampa'paan kita makiit in ukum Torat si ra'ica kaémaanta. Taan niéma'o i Amang Kasuruan si ra'ica kaémaan in ukum Torat. Sia mutuso mai si Toyaang-Na in esa ang kayo'baan anio' mamuali tou tanu iméma'o ing kamesé-meséaan wo imaté e mekar sé tou iméma' ing kamesé-meséaan. Wo ampa'paan im papaté i Toyaang-Na itu, kinala-Nao eng kawasa ing kamesé-meséaanta in tou.

Roma 9:5

Séra itu taranak é apo-apo' é tou Israel. Si Kristus ka'i taranak éra, sa iciit in owak. Siao si Amang Kasuruan si makakawasa am baya-waya, wo iparayo-rayo akar ing kauré-uré. Ulit!

1 Korintus 15:47

Si tou kataré-taré niéma' an tana' owo. Taan si Kristus si tou karua, Sia itu a mangé en sorga owo.

1 Korintus 2:7

Sé ipakua ami itu kapinteran asi Amang Kasuruan owo. Eng kapinteran itu ra'ipé' kailekan é tou wo aicaenepé', taan en itu tinu'tulo i Amang Kasuruan an tutuw eng kayo'baan anio' ra'ipé' niéma' wosama' kéréanta em bagéan asi rarayo wo in sisiri'-Na.

2 Korintus 1:19

Ampa'paan si Yesus Kristus, Toyaang i Amang Kasuruan, ra'ica icumua “én” kekawus in itu “ra'ica”. Si Kristus ituo si ayabar i Silas, Timotius wo yaku ai camu. An untep i Kristus asaloke' awéan “én”.

Galatia 2:8

Ampa'paan Sia si mééo ing kaketeran a si Petrus e mamuali ruru'du'an eng kumua in Abar Kaaruien andumoro' i Yesus a sé tou Yahudi, Sia ka'i e mééo ing kaketeran a yaku mamuali ruru'du'an eng kumua in Abar Kaaruien a sé tou ra'ica Yahudi.

Galatia 4:4

Taan asi oras aitantuo i Amang Kasuruan, yutus-Na si Toyaang-Na ang kayo'baan. Si Toyaang-Na tumou asi esa wéwéné wo menonou le'tek mengaéma' in ukum Torat tanu tou Yahudi.

Efesus 1:9

Intarépé' em pawasa-wasan itu aicua-Nao ai cita kumiit ing kasalé'an-Na, siituo si pawasan indior si pakaenepé' a sé tou. Wo em pawasa-wasan-Na itu pinusé'-Nao lekepen oka i Kristus.

Efesus 6:19

Wo ipengasombayang angé ka'i aku, wosama' an tutuwku i rumoma' wéan i Amang Kasuruan aku nunuwu' isumoma, akar ra'io wana eng kaindé'anku ing kumua in Abar Kaaruien en andumoro' i Yesus Kristus. En Abar Kaaruien itu indior ra'ipé' aicua a sé pakasa en tou, taan intarépé' aicuao ai séra.

Kolose 1:23

Ampa'paano in itu kamu musti le'tek maéman wo kasake' keter makatimboi asi Abar Kaaruien andumoro' si Yesus Kristus. Wo tioo itela'u miow em paarapen si an untep in Abar Kaaruien itu, si aiwééo ai camu wo liningao miow. Wo en Abar Kaaruien itu aicuao a sé pakasa é tou ang kayo'baan. Wo yaku Paulus mamuali tou mengaselewir eng kumua in Abar Kaaruien andumoro' i Yesus Kristus itu.

Kolose 1:27

Wo Sia masalé' kumua a sé tou-Na sapaoka sé icaenepé' itu uli-ulit loor wo wangko' asé pakasa in tou sé ra'ica Yahudi. Sé ipakaenep itu tana'i, si Kristus an atéo miow, eng kaangéanna kamu awéan paarapen makéré im bagéan asi rarayo wo in sisiri' asi Amang Kasuruan owo.

Kolose 1:6

Wo en Abar Kaaruien itu aicaseraro am bisa-wisa ang kayo'baan wo em buéna kinaséréano ang katouan é tou. Taniituo ka'i wo icamu, tumo'tolai kamu luminga in Abar itu wo wutu-wutul makailek in upus aitambér-Na, kamu kinamango i Amang Kasuruan.

Kolose 2:2

Yaku rumaméji tanu siitu wosama' en até éra kaiboran wo meesa ang kaupusan akar séra makasiya' ang kakailekan andumoro' sé wutul wo uli-ulit maéman. Wo in taniitu kakailekan éra oka em pawasan i Amang Kasuruan sé indior icaenepé'. Em pawasan-Na itu tumuru' a si Kristus.

2 Tesalonika 1:10

Pakasa en itu mamuali oka an tutuw i Apo' Yesus imayo sumawel. Sia maai oka wo irayo é tou le'nas-Na wo siriin waya é tou maéman. Kamu ka'i icauntep ai séra ampa'paan kamu maémano in abar si aicuao ami.

2 Tesalonika 2:7

Si tou luméwo-léwo' itu mato'tolo matawoi taan maene-enepé' ampa'paan awéané' en itumang. Taan awéan en orasna si menanang sia itu patén.

1 Timotius 3:9

Séra musti menonou ang karapi in até weresi wo uli-ulit makiit in sususuien si aituru'o i Casuruan.

Ibrani 1:3

Asi Toyaang-Na ituo ro'na kaséréanta e rarayo wo in sisiri' i Amang Kasuruan, Siao em paséréan im peri wo ing kawasa i Amang Kasuruan in esa, Siao ka'i e makatéir im pakasa sé ang kayo'baan ang karapi in Taar-Na si wuta ing kawasa. Wo Siao ka'i e meresi ing kamesé-meséaan é tou, kekawus in itu Sia mangé an sorga wo lumukut ang kakan i Amang Kasuruan si Makakawasa, asi tampa irumangka-rangka'.

Ibrani 12:2

Am papekowaan anio', mayoo kiitenta ang karapi im beren si asalo makatéinteng angé a si Yesus, ampa'paan Siao si maakin im paémanenta a si Amang Kasuruan wo si makawali im paémanenta makaleke-lekep. Sia talesen pengaokoien akar maté ang kayu salip, ra'ica pandungen-Na em pengaroros ampa'paan kailekan-Na sapaoka makasangkum ako im pakasa in itu awéan kaaruian si aitu'tulo ai Sia. Intarépé' Sia makalukut ang kakan im palukutan pasiri-siriin i Amang Kasuruan.

Ibrani 7:7

Ra'ica wana tou e ro'na sumangkal sapaoka si tou wawa' kinamang i tou si rumangka'mai.

Ibrani 8:1

Si penting keli asé im pakasa sé pepaarenta anio', sapaoka kita makaanu Imam Wangko' si ra'io cakua si makalukut ang kakan im palukutan pasiri-siriin i Amang Kasuruan si Mangko-wangko' an sorga.

1 Petrus 1:12

Aicuao i Amang Kasuruan a sé nabi sapaoka sé ipakua éra itu ra'ica torona in owak éra in esa, taan torona miow intarépé'. Sé pakua éra itu, siituo en Abar Kaaruien andumoro' i Yesus Kristus. Wo intarépé' awéan sé tou kinawasa i Roh Le'nas an sorga owo, séra ituo sé tou makua in Abar Kaaruien itu ai camu. Sé malaékat ka'i masalé' makailek andumoro' ing kalowiran sé aicuao ai camu.

1 Petrus 1:20

Si Kristus sinisiro i Amang Kasuruan an tutuw eng kayo'baan anio' ra'ipé' niéma'. Wo matawio ing kaka'puan ing kayo'baan anio', Sia imayo ang kayo'baan wosama' kamu im baya ro'na makéré ing kalowiran an ukuman ing kamesé-meséaan.

1 Petrus 1:21

Ampa'paan e niéma' i Kristus ituo, kamu maéman a si Amang Kasuruan, Siao en tumou sumawel si Kristus an unér é tou imaté wo ka'i méma' si Kristus iparayo-rayo wo pasiri-siriin. Wo in taniitu em paémanen iow wo em paarapen iow toronake' i Amang Kasuruan.

1 Petrus 3:18

Ampa'paan si Kristus imatéo wayake' imakasa en tumu'bus ing kamesé-meséaanta. Sia ra'ica wana kaséaan, taan Sia imaté torona icita sé mengéma-ngéma' ing kamesé-meséaan, wosama' kita ro'na ipakawali-Na mangé a si Amang Kasuruan. Sia pinaté an tutuw-Na imamuali Tou, taan Sia tinou sumawel i Roh Le'nas.

1 Petrus 3:22

Intarépé' si Yesus Kristus imangém an sorga wo lumukut ang kakan i Amang Kasuruan. Wo pakasa sé malaékat, pakasa sé makakawasa wo pakasa ing kaketeran, pakasa in itu an darem ing kakawasaan-Na.

1 Yohanes 1:2

En Taar si mengawéé ing katouan itu mewali-wali wo si Amang an sorga. Sia imayo wo sinéréo ami. Ampa'paan in itu aisairi ami wo icua ami ai camu andumoro' ing katouan akar ing kauré-uré.

1 Yohanes 3:5

Kailekan iow sapaoka si Yesus imayo en tumu'bus ing kamesé-meséan, wo ai Sia ra'ica wana kamesé-meséaan.

1 Yohanes 3:8

Taan si séi si mengéma-ngéma'pé' ing kamesé-meséaan, sia itu anu i kikiiten é sétang, ampa'paan si kikiiten é sétang itu tumo'tolke' mai indior mengéma-ngéma' ing kamesé-meséaan. Taan si Toyaang i Amang Kasuruan maai en tumeri im pakasa sé pengaémaan i kikiiten é sétang.

Wahyu 17:5

An tuintungna pinatican esa ngaran eng kaangéanna ayenepé'. En aipatic tana'i, “Yaku si Babel wangker, inang im pakasa é wéwéné sundal, palemboian im pakasa é léwo' ang kayo'baan.”

Wahyu 17:7

Wo icua i malaékat a yaku, “Kéitu réén ko mangaya-ngaya'ka'? Isisilku oka ai co eng kaangéanna sé aicaenepé' andumoro' i wéwéné wo si binatang pakasakéanna si binatang pitu en do'kos wo sangapulu' en sungé.”

Wahyu 7:9

Kekawus in itu, sérénku ka'i sangareru' tou sé ra'io karékénan eng kakelina. Séra itu asé im pakasa im bangsa, in suku, i negara, wo i nunuwu'. Séra makatulung an dior im palukutan pasiri-siriin wo an dior i Toyaang i Domba itu. Séra mekarai ing kulo' wo eng kama éra makatimboi in lala-lalaina im palem.