1 Tesalonika 5:3 - En Taar Weru a nunuwu' é Tontemboan

³ Awéan en orasna sé tou eng kumua in tana'i, “Eng katouanta arui wo elur, ra'ica toro maindé-indé'.” Taan tumarépé'anke'mai séra tenan oka ing kawenduan meputé wo ing kawenduan si pinendam i wéwéné an tutuw i makéré toyaang. Sé tou itu ra'ica wana en icawekar asi kawenduan itu.

1 Tesalonika 5:3 ပူးပေါင်းရင်းမြစ်များ

Matius 23:33

Éi camu tou léwo', eng kaléwo' miow meputé wo si ula' rumacu-racung, ampa'paan kamu taranak é tou léwo'. Tumambisa kamu ro'na icawekar an ukuman in api ra'ica mape'de-pe'del akar ing kauré-uré?

Yohanes 16:21

Sa si esa wéwéné tawio makéré toyaang, sia mawendu ampa'paan an témponao itouna si toyaang. Taan kekawusna i makéré toyaang, ra'io ka'i pena'né-na'néienna eng kawenduan itu. Sia arui keli ampa'paan si esa tou aitounao ang kayo'baan.

Kisah Para Rasul 13:41

‘Wéanio' rékén sumama-sama', éi camu sé menéro-néro' an tutuw in luminga in Taar-Ku! Sérén oka miow eng kamamualian sé ra'io icakua sé émaan-Ku oka an jaman iow, akar kamu mangaya-ngaya'ka' wo maté. Kamu maté oka ampa'paan kamu ra'ica mercaya, mandé awéan tou mai sumisil waya in itu ai camu.’ ”

2 Tesalonika 1:9

Séra makéré oka ukuman asi Casuruan owo akar ing kauré-uré. Séra yusér i Casuruan tayang an dior-Na wo ra'io ka'i suméré ing kawangko' ing kawasa-Na.

Ibrani 12:23

Kamu imayo ka'i am paumungan é toyaang luluna i Amang Kasuruan, e ngaran éra aipatico an sorga. Wo kamu meta'up ka'i wo si Amang Kasuruan, si maakim waya sé tou, wo meta'up ka'i wo sé roh é tou sé nianggap wutul i Amang Kasuruan, sé niéma'o makaleke-lekep.

Ibrani 2:3

Sa taniitu, tambisa réén kita? Kita ra'ica toro icawekar an ukuman, sa ra'ica wéanta rékén en abar andumoro' ing kalowiran si lébé pentingai wo in taar itu. Ampa'paan si Apo' Yesus in esa eng kataré-taré makua in abar andumoro' ing kalowiran itu, wo sé tou kataré-taré iluminga in itu, aicuao éra en abar itu ai cita akar kakailekanta sapaoka en abar itu wutul.

2 Petrus 2:4

Sé malaékat indior sé mengaéma' ing kamesé-meséaan ra'ica ampungan i Amang Kasuruan, taan iténdél-Na séra an api si ra'ica mape'de-pe'del akar ing kauré-uré. Séra yuntep ang kepal rarem wo riréimbeng en se'sek am bitu akar asi endo Sia mai makim pakasa in tou.