1 Tesalonika 3:3 - En Taar Weru a nunuwu' é Tontemboan

³ Wo in taniitu, mandé ka'i kamu niokoio, kamu kasake' maéman a si Yesus. Ampa'paan kailekano miow in esa sa sé tou maéman a si Yesus musti meta'up ing kawenduan.

1 Tesalonika 3:3 ပူးပေါင်းရင်းမြစ်များ

Lukas 21:12

Taan ra'ipé' mamuali waya en itu, kamu tangkaan owo wo okoien oka é tou. Wo isarakan éra oka kamu am balé-walé paapo'an é agama Yahudi en akimen wo yuntep am bui wo iwali éra oka ka'i a sé kolano wo a sé makakawasa ampa'paan kamu makiit Yaku.

Yohanes 16:2

Ampa'paan kamu ra'io ka'i iwéé é kikiiten é agama Yahudi maapo' am balé paapo'an éra. Lébé-lébé ka'i maai oka en témpona si séike' e maté icamu, pawerotenna ang karapi i méma' in taniitu niéma'nao eng kasalé'an i Amang Kasuruan.

Yohanes 16:33

Icua-Ku waya en itu ai camu, wosama' kéréan iow eng kaeluran ampa'paan meesao ang karapi-Ku. Ang kayo'baan anio' ipeta'up oka miow eng kawenduan, taan kete-ketereno mangé en até miow, ampa'paan kinala-Kuo waya eng kawasa ing kayo'baan anio'.”

Kisah Para Rasul 14:22

An tampa-tampa itu, si Paulus wo si Barnabas kumeter in até é tou maéman wo sumina'u iséra wosama' le'tek am paémanen. Wo icua i Paulus wo si Barnabas, “Sa kita masalé' mamuali tou i Amang Kasuruan si Kumawasa tanu Kolano, kita musti meta'up ing keli kawenduan.”

Kisah Para Rasul 2:25

Indior si Daud sumangkumo kumua in andumoro' i Yesus tana'i, ‘Kaséréanku si Casuruan tatap an diorku. Sia ang kakanku, ampa'paano in itu aku ra'ica wana kaindé'an.

Kisah Para Rasul 21:11

Sia mai ai cami wo indonna en tali si pakawe'ber am pinggang i Paulus. Wa'kesenna eng kama wo eng kécéina wo kumua, “Aicua i Roh Le'nas tana'i, ‘Si tou makaanu in tali anio', sia wa'kesen oka é tou Yahudi an Yerusalem wo isarakan éra oka a sé tou ra'ica Yahudi.’ ”

Kisah Para Rasul 21:13

Taan sinowatke' i Paulus, “Kéitu réén kamu maamé' taniitu? Kamu iméma'o in atéku mawendu. Sapake' e mamuali an Yerusalem, yaku tu'tulo, ra'ica im ba'kesenke' taan ka'i tu'tulo i maté ampa'paan i Apo' Yesus.”

Kisah Para Rasul 9:16

Ituru'-Ku oka ai sia sapaoka sia meta'up oka ing keli kawenduan ampa'paan kumiit Yaku.”

Roma 5:3

Wo ra'ica siituke', kita ka'i ro'na maaru-arui an tutuw eng kawenduan sangkumenta. Ampa'paan kailekanta sapaoka eng kawenduan itu méma' icita makatalesen,

1 Korintus 15:58

Ampa'paan in ituo é poo-poow sé icaupusku, keteren em paémanen iow wo ra'ica toro marua-rua wasa. Wo mare'de-re'dem an tawoien i Casuruan, ampa'paan kailekano miow sapaoka sé tinawoi iow an dior i Casuruan ra'ica wana si ra'ica wana en torona.

1 Korintus 4:9

Iciit yaku, kami sé ruru'du'an i Yesus, niéma'o i Amang Kasuruan mamuali tou ra'ica pengasiriin, kami tanuoka tou sé pinusé'o in ukumen patén an dior é tou keli wo pakasérén é tou ang kayo'baan wo sé malaékat.

Efesus 3:13

Ampa'paan in ituo pangilekenku kamu tioo mateké' en até iluminga andumoro' ing kawenduanku. Kamu ro'na tumirayo ampa'paan aku mawendu torona ing kalooran iow.

Filipi 1:28

Kamu ra'ica toro maindé' a sé tou sé mengasundur icamu. Sa kamu ra'ica maindé', kailekan éra oka sapaoka sérao sé ukumen patén wo icamuo sé lowiren oka i Amang Kasuruan.

Kolose 1:23

Ampa'paano in itu kamu musti le'tek maéman wo kasake' keter makatimboi asi Abar Kaaruien andumoro' si Yesus Kristus. Wo tioo itela'u miow em paarapen si an untep in Abar Kaaruien itu, si aiwééo ai camu wo liningao miow. Wo en Abar Kaaruien itu aicuao a sé pakasa é tou ang kayo'baan. Wo yaku Paulus mamuali tou mengaselewir eng kumua in Abar Kaaruien andumoro' i Yesus Kristus itu.

1 Tesalonika 5:9

Ampa'paan kita ra'ica sinisir i Amang Kasuruan in ukumen. Taan sinisir-Na kita e makéré ing kalowiran am paémanenta a si Yesus Kristus Apo'ta.

2 Tesalonika 1:4

Ampa'paan in itu, kami arui masisil a sé jamaat in andumoro' icamu, ampa'paan kamu kasake' maéman a si Yesus wo kasake' talesen mandé ka'i kamu mendam in okoi wo ing kawenduan.

2 Timotius 1:8

Anaé, ico ra'ica toro malawi' masairi in andumoro' i Apo'ta Yesus. Ico ka'i ra'ica toro malawi' mangaku sa aku karapimu ampa'paan aku intarépé' am bui. Yaku am bui ampa'paan maselewir a si Yesus Kristus. Ico ka'i musti sumangkum in okoi tanu yaku ampa'paan mengakua in Abar Kaaruien andumoro' i Yesus Kristus. An tutuw ko sumangkum in okoi, tantu si Amang Kasuruan méé mai kaketeran ai co.

1 Petrus 2:21

Ampa'paan in ituo, kamu tinowao i Amang Kasuruan e méma' in loor mandé' ka'i kamu meta'up ing kawenduan. Si Apo' Yesus imendamo ing kawenduan torona miow wo imééo im paandéan ai camu wosama' kiiten iow tanu si niéma'-Na.

Wahyu 2:10

Tioo kamu maindé-indé' ing kawenduan si musti pendamen iow. Awéan ai camu si téndél oka i kikiiten é sétang an untep im bui em pangepé'an. Wo pendamen iow oka eng kasusaan sangapulu' ngando eng kauréna. Taan kamu musti le'tek maéman a Yaku akar i maté, wo kamu wéan-Ku oka mahkota ing katouan.

Wahyu 2:13

Kailekan-Ku em paento'an iow, asi tampa pakakawasan i kikiiten é sétang. Taan kamu uli-ulit le'tek maéman a Yaku wo ra'ica sangkalen iow em paémanen iow a Yaku, mandé ka'i sinéré miow si Antipas sairi le'tek-Ku pinaté an dior iow asi tampa pakakawa- san i kikiiten é sétang.