1 Tesalonika 3:2 - En Taar Weru a nunuwu' é Tontemboan

² wo si Timotius poowta an esa paémanen, yutus ami mangé ai camu. Sia itu kara-karapita matawoi a si Amang Kasuruan e mengakua in Abar Kaaruien andumoro' i Yesus Kristus. Yutus ami si Timotius maangé e méé ing kaketeran an até miow wosama' em paémanen iow a si Yesus makaketer.

1 Tesalonika 3:2 ပူးပေါင်းရင်းမြစ်များ

Kisah Para Rasul 16:1

Si Paulus mangé ka'i an Derbe wo melala'us an Listra. A mangé mbitu, awéan esa tou makangaran Timotius, sia anio' tou makiit a si Yesus. Si inangna tou Yahudi si maémano a si Yesus wo si amangna tou Yunani.

Kisah Para Rasul 16:5

An tutuw é jamaat luminga in atoran itu, em paémanen éra a si Yesus makaketero. Wo susur in endo, sé tou maéman a si Yesus mengawe-ngawes eng kakeli.

Kisah Para Rasul 18:5

An tutuw i Silas wo si Timotius mai a Makedonia owo, endo wo em bengi si Paulus makua in taar i Amang Kasuruan a sé tou Yahudi. Ipakuana sapaoka si Yesus itu Mesias si aijanjio i Amang Kasuruan indior.

Roma 16:21

Si Timotius katawoiku am bia'i méé ka'i mai in siri' ai camu. Taniitu ka'i sé kakéléku tou Yahudi si Lukius, Yason wo si Sosipater méé ka'i mai in siri' ai camu.

1 Korintus 3:10

Si Amang Kasuruan tumambéro mai in upus-Na a yaku akar aku si tou e makailek wutul im bangunan tumuliro im pandasi enté', wo sé tou walina mawangun am bawo im pandasi itu. Taan si esa wo si esa tou musti méé rékén sumama-sama' tumambisa sia mangun am bawo im pandasi patuuran itu.

1 Korintus 4:17

Ampa'paan in ituo yutusku mangé si Timotius ai camu ampa'paan sia itu niéma'kuo tanu toyaangku in esa wo icaupusku, sia ka'i le'tek a si Casuruan. Mangéna oka ita'néi sumawel ai camu andumoro' tambisa eng katouanku makiit a si Kristus Yesus. Eng katouanku itu ipenusu-nusuikuo a sé jamaat am pakasa in tampa.

2 Korintus 1:1

En surat anio' a yaku owo, Paulus si mamuali ruru'du'an i Yesus Kristus kumiit ing kasalé'an i Amang Kasuruan. En surat anio' aipaticku mewali-wali wo si Timotius poowta an esa paémanen. En surat anio' aicirim ami a sé jamaat i Amang Kasuruan ang Korintus, wo ka'i a sé tou le'nas an Akhaya.

2 Korintus 1:19

Ampa'paan si Yesus Kristus, Toyaang i Amang Kasuruan, ra'ica icumua “én” kekawus in itu “ra'ica”. Si Kristus ituo si ayabar i Silas, Timotius wo yaku ai camu. An untep i Kristus asaloke' awéan “én”.

2 Korintus 2:12

An tutuwku icateka'o mangé an Troas eng kumua in Abar Kaaruien andumoro' i Yesus Kristus, kinaséréankuo sapaoka si Amang Kasuruan imuka'o in lalan a yaku en sumelewir am bitu.

2 Korintus 2:13

Taan aku ra'ica makaaté in sama', ampa'paan a mangé mbitu aku ra'ica meta'up wo si poowta Titus. Anaé, aku mapermisi a sé tou asi tampa itu wo mangé a Makedonia.

2 Korintus 8:23

Si Titus karapiku matawoi en sumémbong ai camu. Wo sé rua poow itu, sé mangé ang karapina, séra sé tou ayutus é jamaat wo sé marayo wo masiri' si Kristus ang karapi im pakaselewir éra.

Filipi 1:25

Percayanku kamu maperlupé' yaku, anaé aku tatapke' mento' ang kayo'baan anio' mewali-wali wo icamu im baya wosama' kamu makaketer wo makaarui am paémanen a si Kristus.

Kolose 1:1

En surat anio' a yaku owo Paulus si mamuali ruru'du'an i Kristus Yesus kumiit ing kasalé'an i Amang Kasuruan wo ka'i asi Timotius poowta.

Kolose 1:7

Pakasa en Abar Kaaruien andumoro' i Yesus Kristus itu, kinailekan iow asi Epafras owo si karapi ami maselewir si caupus ami. Sia le'tek mengaselewir asi Kristus torona ing kalooran iow.

Kolose 4:12

Si Epafras méé ka'i mai in siri' ai camu. Sia esaan an jamaat iow wo ata i Yesus Kristus. Kamu penomba-nombayangna wosama' em paémanen iow a si Kristus Yesus makaenté-enté' tanu tou wangkoo wosama' kamu ka'i wutu-wutul makailek sapa waya sé icasalé' i Amang Kasuruan.

Kolose 4:9

Sia maangé oka mewali-wali wo si Onesimus si poow icaupusta wo le'tek. Si Onesimus esaan an jamaat iow. Séra in dua oka eng kumua ai camu pakasa sé mamuali am bia'i.

1 Tesalonika 3:13

Pangileken ami a si Casuruan eng kumeter in até miow wosama' en até miow ra'ica wana kaséaan wo le'nas an dior i Amang Kasuruan si Amangta, an tutuw i Yesus Apo'ta maai sumawel mewali-wali ang kerapi é tou le'nas-Na.

1 Tesalonika 3:5

Ampa'paan in ituo ayutus ami si Timotius ai camu ampa'paan kami ra'io makatang sa ra'io luminga in abar andumoro' icamu. Icasalé'ku makéré abar, sapaoka kamu maémané' a si Yesus kuma'pa ra'io. En icaindé'ku oréoka kamu katawérano i kikiiten é sétang wo ra'io maéman a si Yesus. Sa wutu-wutul mamuali taniitu, ra'- ica wana en torona sé tinawoi ami indior.

2 Tesalonika 2:17

Pekiupusen ami a si Amang Kasuruan wo a si Yesus Kristus, Apo'ta e méé mai ing kaketeran wo ing kaincayaan an até miow wosama' kawooan iow méma' im pakasa sé loor wo manuwu' in andumoro' sé loor.