1 Tesalonika 3:12 - En Taar Weru a nunuwu' é Tontemboan

¹² Pangileken ami wosama' émaan i Casuruan kamu meupu-upusan asi esa wo si esa wo mengawe-ngawes ka'i eng kaupusan iow a sé tou, meputé icami mengaupus ai camu.

1 Tesalonika 3:12 ပူးပေါင်းရင်းမြစ်များ

Matius 22:39

Wo si ukum karua si puté wo siitu, ‘Mengaupus angé sé kakélému in tou meputé kamu mengaupus in owak iow in esa.’

Matius 7:12

Sapa sé icasalé' miow émaan é tou walina ai camu, tanu siituo si musti émaan iow a sé tou itu. Siituo en sususuien ang kitap Torat wo ang kitap é nabi.”

Lukas 17:5

Wo sé sangapulu' rua ruru'du'an itu kumua a si Apo' Yesus, “Guru, keterenai em paémanen ami!”

Roma 13:8

Tioo kamu mautang sapake' mangé a sé tou, taan aweso taré en utang iow itu utang i meupu-upusan a si esa wo sé walina. Ampa'paan si séike' e mengaupus sé kakélé tou, sia iméma'o im perénta-perénta an ukum Torat.

2 Korintus 9:10

Si Amang Kasuruan en tumu'tul in lulumbo torona i menganguma wo tumu'tul ing kakanen eng kanenta. Taniitu ka'i tu'tulen-Na wo émaan-Na oka makeli en lulumbo miow, wosama' kamu tatap mengéma-ngéma' im butul.

Galatia 5:22

Taan sé tou pakaakinen i Roh Le'nas, wuéna ing katouanna tanu sé anio': awéan upus, kaaruian, kaeluran, katalesenan, kasamaan in até, kalooran, kale'tekkan,

Galatia 5:6

Ampa'paan torona é tou sé meesao wo si Kristus Yesus, sia sinunat kuma'pa ra'ica sinunat en itu ra'ica penting. Em penting am bia'i em paémanen si aituru' ang karapi in upus a sé tou walina.

Filipi 1:9

Wo si anioo en sombayangku, wosama' en upus iow a si Amang Kasuruan wo sé kakélé tou makaawes, wo makaawes ka'i eng kakailekan wutul andumoro' si wisa si wutul wo si wisa si ra'ica wutul,

1 Tesalonika 2:8

Ampa'paan ing kaupusan ami ai camu, akar kami arui eng kumua in Abar Kaaruien i Amang Kasuruan ai camu. Wo ra'ica siituke,' kami ka'i arui e méé ing katouan ami ai camu, ampa'paan kamu uli-ulit icaupus ami.

1 Tesalonika 4:1

Poo-poow, aisusuio ami ai camu tambisa em peri mengaarui in até i Casuruan, wo kamu wutu-wutul menonouo tanu siitu. Wo intarépé' pangileken ami ai camu ang karapi ing kawasa i Apo' Yesus, wosama' kamu rumaméjipé' mangé menonou mengaarui si Amang Kasuruan.

1 Tesalonika 5:15

Wéanio' rékén, oréoka awéan si tou mengasuli' in léwo' a sé tou mengaéma' in léwo'. Taan musti rumaméji mangé kamu mengaéma' in loor a sé kara-karapi miow in esa wo ka'i a sé tou walina.

2 Tesalonika 1:3

Poo-poow, kami patus mengua-ngua i makapulu'sama' a si Amang Kasuruan ampa'paan icamu. Wo kami patus méma' in taniitu, ampa'paan em paémanen iow a si Yesus makaketero wo ka'i makaaweso eng kaupusan iow a sé tou walina.

Yakobus 1:17

Pakasa sé loor wo lekep, mai an dangka' owo, asi Amang an sorga. Siao e méma' waya sé mengasendot an langit. Sia ra'ica kawisa mawalina, ra'ica tanu in serap wo sé sumesendot, en sendotna ro'na mawalina.

2 Petrus 1:7

Wo menonou le'tek a si Amang Kasuruan musti awesan iow ka'i ang karapi i mengaupus a sé poo-poow esa paémanen. Wo asi mengaupus a sé poo-poow esa paémanen musti awesan iow ka'i ang karapi i mengaupus sé kakélé in tou.

2 Petrus 3:18

Taan aweso taré kamu makaawes mendam ing kamang aitambér i Amang Kasuruan, wo makalébéo makatuus si Yesus Kristus, Apo' wo si Lumolowirta. Ai Siake' pakasa e rarayo wo en sisiri' intarépé' akar ing kauré-uré. Ulit.