1 Tesalonika 2:9 - En Taar Weru a nunuwu' é Tontemboan

⁹ Poo-poow, tantu kata'néiané' miow tambisa kami rumaméji menawo-nawoi endo wo em bengi en tumanggong ing kaperluan ang katouan ami in esa, wosama' kami ra'ica méé pamuléngen an esaan angé ai camu an tutuw ami makua in Abar Kaaruien i Amang Kasuruan ai camu.

1 Tesalonika 2:9 ပူးပေါင်းရင်းမြစ်များ

Lukas 18:7

Sa si akim si marapitke' itu ro'na méla im perkara i wéwéné balu itu, wopé'taré si Amang Kasuruan, tantu tawangen-Na oka sé tou sinisir-Nao in esa sé meki-kiupus ai Sia endo wo em bengi. Wo makala'us tawangen-Na wo ra'ica ipauré-uré.

Lukas 2:37

wo si penanaanna matéo anaé sia balu oka. Wo intarépé' en umurna walu ngapulu' epat ngata'uno. Sia ra'ica kawisa tumela'u im Balé Le'nas. Endo wo em bengi sia maapo' a si Amang Kasuruan ang karapi mapuasa wo masombayang.

Kisah Para Rasul 18:3

wo sia mento' am bitu ang karapi éra, ampa'paan en tawoien éra puté. Si Paulus tumawoi mewali-wali wo iséra maéma' in ténda.

Kisah Para Rasul 20:24

Taan ra'io pandungenku eng katouanku, asalo ro'na lekepenku en tawoien si aiwéé i Apo' Yesus a yaku eng kumua in Abar Kaaruien andumoro' in upus aitambér i Amang Kasuruan a sé cita in tou.

Kisah Para Rasul 20:31

Ampa'paan in ituo, mareti-retio mangé kamu. Musti pena'né-na'néi iow sapaoka ang kauré in telu ngata'un aku mewali-wali wo icamu, endo wo em bengi kamu pengasina'uenku si esa wo si esa akar en danona im berenku menii-niis.

Roma 1:1

En surat anio' a yaku owo, Paulus. Yaku anio' ata i Kristus Yesus si tinowao mamuali ruru'du'an-Na wo si sinisiro eng kumua in Abar Kaaruien i Amang Kasuruan.

Roma 15:16

Yaku mamuali ata maselewir a si Kristus Yesus e mengakua in Abar Kaaruien andumoro' i Yesus Kristus a sé tou ra'ica Yahudi. En tawoienku tanu in tawoien é imam si mengawéé i raragés, ampa'paan aku makawali sé tou ra'ica Yahudi a si Amang Kasuruan wosama' séra teriman-Na tanu raragés si casalé'-Na wo si line'naso i Roh Le'nas.

Roma 15:19

wo en tuu-tuus kakaya'kaan sé niéma'ku maké ing kawasa i Roh Le'nas. En Abar Kaaruien andumoro' i Yesus Kristus itu aicuakuo waya a sé tou, tumo'tolai an Yerusalem akar an Ilirikum.

1 Korintus 4:12

Kami matawoi ang karapi ing keter ami in esa torona ing katouan ami. Sa awéan tou mangawa'ba' icami, pekiupusen ami a si Amang Kasuruan eng kumamangai séra. Sa awéan tou maokoi icami, sarun ami ang karapi in talesen wo ra'ica suliin ami.

1 Korintus 9:15

Taan ra'ipé' sumangkum ako aku maké mandé esake' asé hak itu. Wo em pakasa en anio' aipaticku ra'ica ampa'paan i mangile-ngilek in hakku. Aweso taré aku maté, wo taré katalaan ing katirayoanku. Ampa'paan mamuali esa rarayo a yaku, sa aku makua in Abar Kaaruien andumoro' i Yesus Kristus ra'ica mangile-ngilek ai camu.

1 Korintus 9:18

Anaé, sa taniitu sapa en laasa kéréanku? En laasa kéréanku anio': yaku makawoo kumua in Abar Kaaruien andumoro' i Yesus Kristus wo ra'ica wana e méé laasa, wo aku ra'ica maké in hakku e mangilek in laasa e mengakua in Abar Kaaruien itu.

1 Korintus 9:4

Ra'ica réén wana hak aku wo si Barnabas, e makéré kakanen wo elepen asi wuéna in tawoien ami?

2 Korintus 11:27

Yaku ra'ica mento' menawo-nawoi akar i makepé, yaku makakeli-keli ra'io matekel, ra'io makan, ra'ica maelep, makakeli-keli ka'i ra'io wana kakanen, kautingan ampa'paan eng karai ra'ica maawes.

2 Korintus 11:9

Wo an tutuwku lengéi an uner iow, ra'ipé' kawisa mako aku sumusa mandé esake' tou ai camu. Pakasa sé paperlunku tinu'tul é poo-poow an esa paémanen sé imai a Makedonia owo. Tinéiranku sumama-sama' en owakku wosama' aku ra'ica mamuali pamuléngen iow an sapa-sapaanke', wo émaanku oka melala'us tanu siitu.

2 Korintus 6:5

kami papangkuren, yuntep am bui, pinaémbong éra imokoi. Wo kami ra'ica mento' menawo-nawoi, sumangkum ra'ica itumekel wo ka'i ra'ica icuman.

Filipi 4:16

Wo an tutuwku an Tesalonika icamu lébéo imakasa icumirim mai im patawang ing kaperluanku.

1 Tesalonika 1:3

Susur ami sumombayang a si Amang Kasuruan Amangta, pena'né-na'néien ami em pakaselewir iow ampa'paan kamu maéman a si Yesus. Kata'néian ami tambisa kamu maselewir a sé tou walina ampa'paan séra icaupus iow. Kata'néiané' ami mandé ka'i kamu talesen meta'up ing kawenduan, pengaraméjin iow mengaéma' sé loor ampa'paan maara-arapke' a si Yesus Kristus Apo'ta.

1 Tesalonika 2:2

Kailekan iow ka'i, an tutuw ami ra'ipé' mai ai camu, kami niokoio wo aiséroo an Filipi. Taan mandé ka'i in taniitu kami tinawango i Amang Kasuruan wosama' kami ra'ica wana eng kaindé'an eng kumua in Abar Kaaruien-Na ai camu.

1 Tesalonika 2:6

Kami ka'i ra'ica kawisa mangéré i rarayo ai camu kuma'pa a sé tou walina. En ulitna, kami ruru'du'an i Kristus ro'na mangilek sapa-sapake' ai camu im baya.

1 Tesalonika 3:10

Endo wo em bengi kami menomba-nombayang wosama' kami ro'na meta'up sumawel wo icamu. Wo susuian ami oka kamu en lumekep sé ra'ipé' lekep am paémanen iow.

1 Timotius 1:11

En sususuien wutul itu aipatic an Abar Kaaruien andumoro' i Yesus Kristus, si asi Amang Kasuruan wangko' owo si patus parayo. Wo en Abar Kaaruien itu aitokéo a yaku en icua.

1 Timotius 4:10

Siituo imangémai kita rumaméji mauli-ulit re'dem mengaselewir a si Amang Kasuruan. Kita méma' in taniitu ampa'paan kita asaloke' mamangén a si Amang Kasuruan si menonou. Sia itu si méé mai ing kalowiran a sé pakasa in tou, lébé-lébépé' ka'i a sé tou maéman.

1 Timotius 5:5

Si balu wéwéné si ra'ica wana toyaang wo ra'ica wana poyo' en suma'li, sia asalo mamangén a si Amang Kasuruan. Endo wo em bengi sia menomba-nombayang meki-kiupus a si Amang Kasuruan.

2 Timotius 1:3

Endo wo em bengi ipasombayangku wo mengakua i makapulu'sama' a si Amang Kasuruan ampa'paano ico. Pengakuaku i makapulu'sama' a si Amang Kasuruan si pengaselewirenku ang karapi in até weresi meputé wo im pengaémaan é apo-apo'ta indior.