1 Tesalonika 2:16 - En Taar Weru a nunuwu' é Tontemboan

¹⁶ Séra itu rumaméji mengala-ngala' icami wosama' kami ra'ica toro kumua in taar i Amang Kasuruan a sé tou ra'ica Yahudi, émaan éra sé tou itu ra'ica malowir. Wo in taniitu eng kamesé-meséaan éra mengawe-ngaweso akar ra'io icakua. Wo intarépé' eng kae'bowan i Amang Kasuruan itumenao iséra.

1 Tesalonika 2:16 ပူးပေါင်းရင်းမြစ်များ

Matius 12:45

Wo mangéna uwasen sé pitu roh walina sé lumébémai eng kaléwo' wo isia. Wo séra muntep wo mento' am bitu. Sumiwak angé em peri i tou itu lumébéomai eng kaléwo'na asi cataré. Taniitu ka'i e mamuali a sé tou léwo' anio'.”

Matius 23:32

Anaé, lekepeno mio' taré eng kaléwo'an sé aito'tolo é apo-apo' miow indior itu.

Matius 24:14

Wo en Abar Kaaruien andumoro' ing Kakolanoan in Sorga ipakua-kua oka am bisa-wisa asi kayo'baan anio', e mamuali kasairian a sé pakasa é tou. Kumawus in itu maayo en endo kaka'puan ing kayo'baan.”

Matius 24:6

Wo kalingaan iow oka en téngéna im perang, wo en abar andumoro' im perang. Taan mandé in taniitu mareti-retio wo tioo kamu maindé'. Pakasa en itu musti mamuali, taan ra'ipé' an orasna ing kaka'puan ing kayo'baan.

Matius 3:12

E ni'u ipataap ang kama-Nao. Weresin-Na oka em papisian im béné' wo umungen-Na em béné' loor am paumungan, taan sé wéné' pesel tunun-Na oka an api si ra'ica mape'de-pe'del.”

Markus 16:16

Si séi e maéman a Yaku wo baptisen, sia malowir oka. Taan si séi si ra'- ica maéman a Yaku, makéré oka in ukuman.

Kisah Para Rasul 13:45

Taan an tutuw sérén é kikiiten é tou Yahudi sé tou keli itu, en até é kikiiten itu manganat keli. Anaé pakasa sé ipakua i Paulus wo si Barnabas, ipakélong wo ka'i paroros éra.

Kisah Para Rasul 13:50

Taan sé tou Yahudi sé cumélong in Taar i Amang Kasuruan itu, séra memaso-maso' in léwo' a sé wéwéné sé mengaapo' a si Amang Kasuruan sé awéan pengaru wo ka'i a sé kikiiten ang kota itu. Wo okoien éra si Paulus wo si Barnabas wo yusér éra en tumela'u in sangkum itu.

Kisah Para Rasul 14:19

Wo asi témpo itu mayo sé tou Yahudi a mangé en Antiokhia wo an Ikonium owo. Séra memaso-maso' in léwo' a sé tou keli itu akar si Paulus wangkilen éra im batu wo wésoon éra icesot ang kota, ampa'paan paweroten éra sia imatéo.

Kisah Para Rasul 14:2

Taan awéan tou Yahudi sé ra'ica kiim mercaya in aicua i Paulus wo si Barnabas, séra memaso-maso' in léwo' sé tou ra'ica Yahudi wosama' icasuut éra sé poo-poow esa paémanen itu.

Kisah Para Rasul 14:5

Eng kasiwakanna, sé tou Yahudi wo sé tou ra'ica Yahudi mewali-wali wo sé kikiiten éra meesa. Séra rumaméji e mokoi wo mangkil im batu a si Paulus wo si Barnabas.

Kisah Para Rasul 17:13

Taan an tutuw kailekan é tou Yahudi sé an Tesalonika owo sapaoka si Paulus makua ka'i in taar i Amang Kasuruan am Berea wo séra mangé am bitu e memaso-maso' in léwo' a sé tou am bitu akar sé tou keli ra'io makaaté in sama'.

Kisah Para Rasul 19:9

Taan awéan piraan tou ra'ica kiim tumerima in sususuien i Paulus ampa'paan séra keté até. Wotaré ipemaa-maar éra in léwo' an dior é tou keli andumoro' im basa i Amang Kasuruan en lumowir sé tou iméma' ing kamesé-meséaan. Ampa'paano in itu itela'u i Paulus séra wo towanna sé tou maéman a si Yesus kumesot am balé paapo'an é agama Yahudi. Wo susur in endo sia maroma' ang karapi é tou am pakuliaan, si ningaranan Tiranus.

Kisah Para Rasul 21:21

Taan pinalinga érao ka'i andumoro' sé ipasusuimu a sé pakasa é tou Yahudi sé maento' an uner é bangsa walina, sapaoka séra nomoo makiit in ukum Torat. Wo aicuamu kiné, sapaoka sé toyaang nomoo sunaten wo ka'i nomoo menonou makiit ing kanaramenta.

Kisah Para Rasul 23:12

Asi mamoondo mai sé tou Yahudi meesa wo sumumpa in owak sapaoka séra ra'ipé' kiim kuman wo melep, sa ra'ipé' imaté si Paulus.

Kisah Para Rasul 24:9

Kekawus i Tertulus kumua in taniitu, énan ka'i é tou Yahudi walina sapaoka en aicuana itu wutul.

Kisah Para Rasul 25:2

A mangé mbitu, sé kikiiten é imam wo sé tou Yahudi sé pasiri-siriin mai meta'up wo isia eng kumua in tuduan éra a si Paulus.

Kisah Para Rasul 25:7

Icateka' mangé si Paulus am bitu, pakasa sé tou Yahudi sé an Yerusalem owo, tumulung lumi'cir isia. Wo icua éra a si gubernur kelian tuduan uter andumoro' si Paulus. Taan pakasa em ipatudu éra ai sia itu ra'ica wana tuus.

Kisah Para Rasul 4:12

Si Yesuske' e ro'na lumowir sé tou. Ampa'paan ra'ica wana ngaran walina ang kayo'baan anio' e ro'na lumowir sé tou.”

Kisah Para Rasul 9:23

Lumangkoio im piraan ngando, sé tou Yahudi meroma' mawasa in léwo' e maté si Saulus.

1 Korintus 10:33

Menonouo mio' kaputéku. Raméjinku marui in até é tou am baya-waya. Yaku ra'ica mangéré ing kalooranku in esa, taan aku mangéré ing kalooran é tou keli wosama' séra ro'na lowiren.

Galatia 5:11

Poo-poow, awéan sé tou makua sapaoka aku masusuié' andumoro' in sunat a sé tou ra'ica Yahudi wosama' séra musti sunaten iciit in ukum Torat. Taan em pakua éra itu ra'ica wutul. Sa em pasusuiku tanu siitu, yaku ra'ica okoien é tou Yahudi. Wo sa aku masusuié' andumoro' in sunat, ra'ica iméma' sé tou Yahudi mae'bow mandé ka'i aku masusui andumoro' ing kepaté i Yesus ang kayu salip.

Efesus 3:13

Ampa'paan in ituo pangilekenku kamu tioo mateké' en até iluminga andumoro' ing kawenduanku. Kamu ro'na tumirayo ampa'paan aku mawendu torona ing kalooran iow.

Efesus 3:8

An uner im pakasa é tou le'nas, yakuo si wawa' keli, taan ampa'paan in upus aitambérai itu, yaku sinisiro eng kumua a sé tou ra'ica Yahudi andumoro' ing kawangko' i Kristus si ra'io ka'i cakua,

1 Tesalonika 1:10

Pengasisil éra ka'i en andumoro' tambisa kamu mengento-ngento' si Toyaang i Amang Kasuruan maai a mangé en sorga owo. Siao si Yesus, si tinou-Na sumawel am papaté. Si Yesus itu ka'i en lumowir icita sé maéman ai Sia an ukuman i Amang Kasuruan sa.

2 Tesalonika 2:10

Sia itu maké i membam- balinaan em pakauwak léwo' sé tou akar i maka'pu. Sé tou itu ang karoro'ano im pepaté-patén ampa'paan séra ra'ica masalé' luminga in sususuien wutul asi Amang Kasuruan owo in andumoro' i Apo' Yesus wo ra'ica kiim lowiren.

1 Timotius 2:4

wo icasalé'-Na ka'i wosama' pakasa in tou malowir wo makailek in sususuien wutul.

Ibrani 6:8

Taan, sa en tana' itu asalo pengatowan ing kuung wo rukut tutunéan, en tana' itu ra'ica wana torona. Wo en tana' itu matawio icutuk i Amang Kasuruan, ang kasomoianna pakatunu-tunun.

Wahyu 22:11

Si séi si maéma' in léwo', iwayao mio' sia mengéma-ngéma' in léwo'. Si séi si maéma i najis, iwayao mio' sia mengéma-ngéma' i najis. Si séi si mengéma' im butul, iwayao mio' sia mengéma-ngéma' im butul. Si séi si le'nas, iwayao mio' sia menonou angé le'nas.”