1 Petrus 4:16 - En Taar Weru a nunuwu' é Tontemboan

¹⁶ Taan sa kamu okoien ampa'paan tou Krésten, kamu ra'ica toro malawi'. Aweso taré kamu rumayo wo sumiri' si Amang Kasuruan ampa'paan kamu patuulen makiit si Kristus.

1 Petrus 4:16 ပူးပေါင်းရင်းမြစ်များ

Kisah Para Rasul 11:26

Wo sia meta'up wo si Saulus, kumawus in itu iwalina si Saulus an Antiokhia. Séra in dua mento' mewali-wali wo sé jamaat a mangé mbitu sangata'un eng kauréna. Séra ka'i mengasusui a sé tou keli andumoro' i Yesus. An Antiokhia anioo sé tou makiit in sususuien i Yesus kumataré-taré patuulen Krésten.

Kisah Para Rasul 26:28

Wo icuana a si Paulus, “Paulus, tawio émaanmu aku mamuali tou Krésten asi témpo ra'ica uré anio'!”

Kisah Para Rasul 28:22

Taan kami in esa masalé' luminga ai co andumoro' in sususuien é golongan Nasrani itu. Kailekan ami am bisa-wisa awéan sé tou makélong in sususuien itu.”

Kisah Para Rasul 5:41

Wo itela'u é ruru'du'an itu en sidang Mahkamah Agama ang karapi in arui ampa'paan weroten éra sapaoka séra nianggapo i Amang Kasuruan patus meta'up ing kawenduan ampa'paan i ngaran i Yesus.

Filipi 1:20

En icasalé'ku wo em paarapenku wosama' aku ra'- ica papalawi' mengaéma' in tawoien si aiwéé i Amang Kasuruan. Wo em butulna en casalé'ku sapaoka intarépé' aku kasake' ra'ica maindé' mengakua andumoro' i Kristus kaputé indior. Anaé aku menonou kuma'pa maté ra'ica sapa-sapa, em penting keli si Kristus em parayo wo pasiriin am pakasa sé pengaémaanku.

Filipi 1:29

Ampa'paan kamu tinambérano mai ing kamang i Amang Kasuruan ra'ica asaloke' maéman a si Kristus taan ka'i imawendu ampa'paan maéman ai Sia.

2 Timotius 1:12

Ampa'paan aku makua in Abar Kaaruien itu, akar sangkumku eng kawenduan am bui anio'. Taan aku ra'ica malawi', ampa'paan kailekanku si Apo' Yesus si paémanenku. Émanenku Sia awéan kawasa en tuméir in tawoien si aitoké-Na a yaku akar asi endo kaka'puan ing kayo'baan.

Yakobus 2:7

Séra itu ka'i maojat i Ngaran i parayo-rayo wo pasiri-siriin, taan asi Ngaran ituo, kamu imamuali anu i Amang Kasuruan.

1 Petrus 2:12

Em peri miow musti loor an dior é tou sé ra'ica makatuus si Amang Kasuruan. Mandé ka'i patudun éra kamu tou léwo', sérén éra oka sé pengaémaan iow loor wo in taniitu séra rumayo wo sumiri' oka si Amang Kasuruan, an tutuw maai en endo-Na sa.

1 Petrus 4:11

Sa awéan tou tumerima ing kamang aitambér i Roh Le'nas eng kumua in taar i Amang Kasuruan a sé tou, musti icuana en itu kumiit in taar i Amang Kasuruan. Wo sa awéan tou tumerima ing kamang aitambér i Roh Le'nas en tumawang sé tou, musti émaanna en itu maké ing kaketeran asi Amang Kasuruan owo. Anaé, pakén iow sumama-sama' eng kamang aitambér i Roh Le'nas ai camu esa wo si esa wosama' asé pakasa sé niéma'o miow itu, sé tou ro'na rumayo wo sumiri' si Amang Kasuruan, ampa'paano i Yesus Kristus. Si Amang Kasuruan itu makaanu i rarayo wo in sisiri' wo ing kakawasaan akar ing kauré-uré! Ulit.

1 Petrus 4:14

Pakakamangeno kamu, sa kamu iparoros é tou ampa'paan makiit si Kristus, ampa'paano e Roh i rarayo wo in sisiri'-Na ai camuo. Siituo si Roh i Amang Kasuruan.

1 Petrus 4:19

Wo in taniitu, sa awéan tou niokoi ampa'paan en itu kasalé'- an i Casuruan, sia musti mengéma-ngéma' im butul wo sumarakan in owakna a si Casuruan si méma' sia. Sia ro'na papercayan ampa'paan Sia mengema-ngéma' sapa si aijanji-Na.