1 Petrus 4:10 - En Taar Weru a nunuwu' é Tontemboan

¹⁰ Kamu si esa wo si esa itumerimao ing kamang aitambér i Roh Le'nas, anaé musti pakén iow sumama-sama' eng kamang aitambér itu en sumelewir sé kakélé tou.

1 Petrus 4:10 ပူးပေါင်းရင်းမြစ်များ

Matius 20:28

En itu meputé wo si niéma' i Toyaang i Tou. Sia maai ang kayo'baan anio' ra'ica maai selewiran é tou taan en sumelewir sé tou wo méé in owak-Na in esa en tumu'bus ing kamesé-meséaan é tou keli.”

Matius 24:14

Wo en Abar Kaaruien andumoro' ing Kakolanoan in Sorga ipakua-kua oka am bisa-wisa asi kayo'baan anio', e mamuali kasairian a sé pakasa é tou. Kumawus in itu maayo en endo kaka'puan ing kayo'baan.”

Matius 24:21

Ampa'paan asé endo itu awéan kawenduan wangko' sé ra'ipé' kawisa imamuali tumo'tolke' mai eng kayo'baan anio' niéma' akar intarépé'. Wo ra'io kawisa ka'i mamuali.

Matius 24:45

“Si séi si ata le'tek wo pandéi, tantu sia angkaien i tuangna mamuali kikiiten é kakéléna ata am balé i tuang itu. Wo sia tokéan i tuangna e méé kanen a sé kakéléna ata an oraso ing kuman.

Matius 25:17

Taniitu ka'i si ata tinokéana rua talenta. Sia ka'i mangé mangkér, wo en untungna ka'i rua talenta.

Matius 25:44

Wo isowat éra oka ai Sia in tana'i, ‘Kawisao réén sérén ami si Tuang maarem kuma'pa maré'om kuma'pa tanu sakéi an doong ami kuma'pa ra'ica mekarai kuma'pa sumakit kuma'pa an untep im bui wo ra'ica mai ami sérén?’

Markus 10:45

Ampa'paan si Toyaang i Tou ka'i maai ang kayo'baan anio', ra'ica maai en selewiran é tou taan mai en sumelewir sé tou wo méé in owak-Na in esa en tumu'bus ing kamesé-meséaan é tou keli.”

Lukas 12:42

Wo isowat i Yesus ai séra maké in andéan, “Si séi réén si ata le'tek wo pandéi si angkaien oka i tuangna mamuali kikiiten asé ata walina sé matawoi am baléna, wosama' sia méé kanen a sé ata itu an orasnao ing kuman?

Lukas 19:13

An tutuwna ra'ipé' mangé, towanna owo sé sangapulu' atana wo wéanna makélé esa mina. Wo icuana ai séra, ‘Pakéno en doit anio' e mangkér akar aku maréngai sumawel.’

Lukas 8:3

Wo awéan ka'i si wéwéné makangaran Yohana penanaan i Khuza. Si Khuza anio', kikiiten mengaurus in doit i colano Herodes. Wo awéan ka'i si Susana wo keli sé wéwéné walina. Séra mengaselewir a si Yesus wo sé murit-Na mapaké ing kasiyaan éra.

Roma 15:25

Taan, intarépé' aku ang karoro'an i maangé an Yerusalem e maali in sumbangan a sé tou le'nas a mangé mbitu.

Roma 15:27

Séra méma' in taniitu ang karapi in arui en até. Wo séra patus tumawang sé poo-poow lengéi an Yerusalem itu, ampa'paan séra sé tou ra'ica Yahudi makéréo kamang luminga in Abar Kaaruien andumoro' i Yesus Kristus asé tou Yahudi owo an Yerusalem. Anaé, sé tou ra'- ica Yahudi patus sumuli' ing kaloo-looran é tou Yahudi ang karapi iméé sapa em paperlun éra.

1 Korintus 15:10

Taan ampa'paan in upus si aitambér i Amang Kasuruan, yaku ro'na mamuali ruru'du'an tanu intarépé'. Wo en upus si aitambér i Amang Kasuruan itu uli-ulit awéan wuéna. Sé tinawoiku lumébé mai asé im pakasa é ruru'du'an. En itu ra'ica ampa'paan ing kaketeranku in esa, taan ampa'paano in upus aitambér i Amang Kasuruan mewali-wali wo yaku.

1 Korintus 3:10

Si Amang Kasuruan tumambéro mai in upus-Na a yaku akar aku si tou e makailek wutul im bangunan tumuliro im pandasi enté', wo sé tou walina mawangun am bawo im pandasi itu. Taan si esa wo si esa tou musti méé rékén sumama-sama' tumambisa sia mangun am bawo im pandasi patuuran itu.

1 Korintus 4:7

Si séi réén iméma' icamu lumébémai wo sé tou walina? Awéan réén sé mamualio anu miow wo ra'ica asi Amang Kasuruan owo? Pakasa sé anu miow itu asi Amang Kasuruan owo, sa taniitu kéitu réén kamu marayo-rayo in owak tanuoka kéndo' sé mamualio anu miow itu ra'ica aiwéé i Amang Kasuruan?

2 Korintus 6:1

Ampa'paan kami matawoi mewali-wali wo si Amang Kasuruan, pekiupusen ami imauli-ulit ai camu wosama' tioo paepesen iow im beren en upus aitambér i Amang Kasuruan si tinerimao miow itu.

2 Korintus 9:1

En ulitna ra'io sangali ipaticku ai camu andumoro' in doit tatawang en tumawang sé tou le'nas lengéi an Yerusalem.

Efesus 3:8

An uner im pakasa é tou le'nas, yakuo si wawa' keli, taan ampa'paan in upus aitambérai itu, yaku sinisiro eng kumua a sé tou ra'ica Yahudi andumoro' ing kawangko' i Kristus si ra'io ka'i cakua,

Efesus 4:11

Wo Siao en tumambérai ing kamang a sé tou. Awéan tou sé aitantu-Na mamuali ruru'du'an, mamuali nabi, mamuali tou mengakua in Abar Kaaruien andumoro' i Yesus Kristus, mamuali gembala é jamaat wo ka'i guru.

2 Timotius 1:18

Kailekanmu wutul ka'i sapaoka sia tatap mengatawang yaku an Efesus. Ampa'paan in ituo pekiupusenku a si Casuruan wosama' asi endo kaka'puan ing kayo'baan si endo i Casuruan makim sé tou, iwéé-Na mai eng kaupusan-Na a si Onesiforus.

Titus 1:7

Sé mengatilik an jamaat en tawoienna mengatu'tul sé jamaat i Amang Kasuruan, sia musti menonou ra'ica wana e ro'na méé kaséaan, ra'ica tirayo, ra'ica tae'bow, ra'ica lalangun, ra'ica tampenokolen wo ra'ica ata in doit.

Ibrani 6:10

Ampa'paan si Amang Kasuruan itu ra'ica marapit, ra'ica ilupa-Na sapa sé tinawoio miow torona Sia. Wo ra'ica ilupa-Na ka'i eng kaupusan ipaturu' miow ai Sia an tutuw iow matawang sé tou le'nas indior akar intarépé'.

1 Petrus 5:10

Taan eng kawenduan si pendamen iow itu ra'ica uré. Kekawus in itu, émaan oka i Amang Kasuruan em paémanen iow makaleke-lekep wo émaan-Na oka en até miow makaketer wo émaan-Na ka'i kamu mauli-ulit maéman ai Sia. Ampa'paan Sia itu Amang Kasuruan si palemboian waya ing kamang aitambér wo itumowao icamu maéman a si Kristus, wosama' kamu kumiit mendam i rarayo wo en sisiri'-Na akar ing kauré-uré.

1 Petrus 5:12

En surat kolek anio' aipaticku ai camu wo sinémbongan i Silas, si nianggapkuo poowku an esa paémanen. Sia itu le'tek am paémanen wo ro'na papercayan. Aipaticku en surat anio' en sumina'u wo méé kaincayaan ai camu wosama' ro'na percayan iow sapaoka sé aipaticku anio' uli-ulit abar wutul andumoro' ing kamang aitambér i Amang Kasuruan ai camu. Wo eng kamang itu musti timboian iow i mauli-ulit.