1 Petrus 2:9 - En Taar Weru a nunuwu' é Tontemboan

⁹ Taan kamu anio' bangsa sé sinisiro i Amang Kasuruan, imam sé maselewir a si Amang Kasuruan si Colanota, bangsa sé line'nas-Nao wo ka'i mamuali anu-Na. Kamu im baya imamuali tanu siitu wosama' ro'na ipakua-kua miow a sé tou andumoro' sé kakaya'kaan sé niéma'o i Amang Kasuruan. Siao en tumowa icamu kumesot ang kariréimbengan wo muntep asi sendot-Na wangko'.

1 Petrus 2:9 ပူးပေါင်းရင်းမြစ်များ

Matius 4:16

Sé tou sé menonou ang kariréimbengan isuméréo in Sendot wangko', wo séra sé maento' an tampa si kinawasa im papaté, ai séra mantango mai en Sendot.”

Matius 5:16

Tanu siituo ka'i wo icamu, en sendotmu musti tumélang an dior é tou wosama' sérén éra em pengaémaanmu loor wo marayo-rayo si Amangmu an sorga.”

Lukas 1:79

en sumendot in até é tou sé menonoué' ang kariréimbengan wo sé tou menonoué' ang kaindé'an. Wo mai-Na oka akinen kita kumiit in lalan maangé asi katouan wuta ing kaeluran.”

Yohanes 17:19

Wo isarakan-Ku eng katouan le'nas-Ku en sumelewir si Amang. Niéma'-Ku en itu torona ing kalooran éra, wosama' séra ka'i ro'na sumarakan in owak en sumelewir si Amang kumiit in sususuien wutul-Mu.

Kisah Para Rasul 20:28

Ampa'paan in ituo, musti téiran iow sumama-sama' en owak iow in esa wo sé jamaat si aiwéé i Roh Le'nas en téiran iow. Téiran iow sé jamaat i Amang Kasuruan tanu si gembala matéir sé domba-Na. Sé jamaat itu mamuali anu i Amang Kasuruan ampa'paan linowir-Na séra in enda'-Na in esa.

Kisah Para Rasul 26:18

e mangé muka' im bewerot éra wosama' séra ra'io ka'i menonou ang kariréimbengan taan menonou ang kasendotan, wo ka'i séra ra'io pakakawasan i kikiiten é sétang taan pakakawasan i Amang Kasuruan. Wo in taniitu ampa'paan séra maéman a Yaku, eng kamesé-meséaan éra makéré oka kaampungan wo makéré oka ka'i bagéan si aitantuo i Amang Kasuruan a sé tou sé line'nas-Na.’

Kisah Para Rasul 26:28

Wo icuana a si Paulus, “Paulus, tawio émaanmu aku mamuali tou Krésten asi témpo ra'ica uré anio'!”

Roma 9:24

Wo icitao sé tou tinowa-Nao en tumerima i rarayo wo in sisiri' itu, anaé ra'ica sé tou Yahudike' taan ka'i sé tou ra'ica Yahudi.

1 Korintus 3:17

Sa awéan tou luméwo' im Balé i Amang Kasuruan, sia léwoon-Na oka. Ampa'paan em Balé i Amang Kasuruan le'nas wo icamuo em Balé i Amang Kasuruan.

Efesus 1:14

E Roh Le'nas ituo e imamuali jaminanta sapaoka ulit terimanta oka waya sé aijanjio i Amang Kasuruan a sé tou-Na. An tutuw itu iwekar-Na oka kita asé pakasa ing kaléwo'an ing kayo'baan anio'. Anaé, mayoo irayota si Amang Kasuruan ampa'paan ing kawangko'-Na.

Efesus 1:6

Ampa'paan in ituo, irayoo mangé si Amang Kasuruan, ampa'paan tinambéran-Nao mai in upus wangko' ai cita sé meesa wo si Yesus Kristus, Toyaang si paupu-upus-Na keli.

Efesus 3:21

Si Amang Kasuruanke' si parayo wo pasiriin an uner é jamaat ampa'paan kita meesao wo si Yesus Kristus. Irayoo mangé Sia akar a sé tara-taranak akar ing kauré-uré. Ulit!

Filipi 3:14

Wo aku menéro-néron akar in angéan ing ka'karan e makéré in laasa an sorga. Torona in ituo si Amang Kasuruan itumowao icita sé meesao wo si Kristus Yesus.

Kolose 1:13

Kita aiwekaro i Amang Kasuruan asi kawasa ing kariréimbengan wo yéra-Na ang Kakolanoan i Toyaang-Na si caupus-Na keli.

2 Timotius 1:9

Aiwéé-Nao eng kalowiran ai cita wo tinowa-Na kita wosama' menonou le'nas kumiit ing kasalé'an-Na. Niéma'-Na waya en itu ra'ica ampa'paan kita maéma' ing kaloo-looran, taan ampa'paan pinewasa-Nao indior. An tutuw eng kayo'baan anio' ra'ipé' niéma'-Na, Sia mawasao tumambérai in upus-Na ai cita in tou ampa'paan i Kristus Yesus.

Titus 2:14

Aiwéé-Nao en owak-Na mamuali raragés en tumu'bus waya ing kaléwo-léwo'anta wo émaan-Na kita mamuali tou-Na le'nas wo re'dem mengaéma' in loor.

1 Petrus 1:2

Icamu sinisir i Amang Kasuruan, Amangta, tumo'tolke' mai indior kumiit im pawasa-wasan-Na. Wo kamu niéma' i Roh Le'nas mamuali le'nas wosama' kamu le'tek maéma' ing kasalé'an i Yesus Kristus wo eng kamesé-meséaan iow ka'i weresin-Na ang karapi in enda'-Na. Pekiupusenku a si Amang Kasuruan wosama' émaan-Na mai eng katouan iow elu-elur wo méé mai ing kamang si kumeli-keli ai camu.

1 Petrus 2:5

Kamu ka'i tanu im batu menonou itu. Ampa'paan in ituo iwééo mio' en owak iow pakén i Amang Kasuruan e mamuali paento'an-Na. Wo in taniitu kamu imamualio imam-imam le'nas e rumagés ing katouan iow a si Amang Kasuruan. Wo e raragés aiwéé miow itu tinerima-Na ampa'paano sé niéma' i Yesus Kristus ai cita im baya.

1 Petrus 4:11

Sa awéan tou tumerima ing kamang aitambér i Roh Le'nas eng kumua in taar i Amang Kasuruan a sé tou, musti icuana en itu kumiit in taar i Amang Kasuruan. Wo sa awéan tou tumerima ing kamang aitambér i Roh Le'nas en tumawang sé tou, musti émaanna en itu maké ing kaketeran asi Amang Kasuruan owo. Anaé, pakén iow sumama-sama' eng kamang aitambér i Roh Le'nas ai camu esa wo si esa wosama' asé pakasa sé niéma'o miow itu, sé tou ro'na rumayo wo sumiri' si Amang Kasuruan, ampa'paano i Yesus Kristus. Si Amang Kasuruan itu makaanu i rarayo wo in sisiri' wo ing kakawasaan akar ing kauré-uré! Ulit.

Wahyu 1:6

Wo niéma'-Na kita mamuali tou-Na ang Kakolanoan-Na, wo mamuali imam-imam sé maselewir a si Amang Kasuruan, Amang-Na. A si Yesus Kristuske' e rarayo wo en sisiri', wo eng kakawasaan akar ing kauré-uré. Ulit.

Wahyu 20:6

Pakakamangen wo line'naso sé tou sé kataré-taré tinou sumawel! Em papaté karua ra'io kumawasa iséra. Taan séra mamuali oka imam-imam sé mengaselewir a si Amang Kasuruan wo a si Kristus, wo séra ka'i merénta oka mewali-wali wo Sia sangariwu ngata'un eng kauréna.

Wahyu 5:10

Séra itu niéma'-Muo mamuali esa kakolanoan, wo mamuali imam-imam i Amang Kasuruanta. Wo séra merénta oka tanu kolano ang kayo'baan.”