1 Petrus 2:5 - En Taar Weru a nunuwu' é Tontemboan

⁵ Kamu ka'i tanu im batu menonou itu. Ampa'paan in ituo iwééo mio' en owak iow pakén i Amang Kasuruan e mamuali paento'an-Na. Wo in taniitu kamu imamualio imam-imam le'nas e rumagés ing katouan iow a si Amang Kasuruan. Wo e raragés aiwéé miow itu tinerima-Na ampa'paano sé niéma' i Yesus Kristus ai cita im baya.

1 Petrus 2:5 ပူးပေါင်းရင်းမြစ်များ

Roma 12:1

Poo-poowku an esa paémanen! Ampa'paan si Amang Kasuruan itumuru'o ing kaupusan-Na ai cita, ampa'paano in itu sina'uenku kamu wosama' kamu méé in owak iow tanu raragés menonou, si le'nas wo ka'i si méma' in até-Na arui. Siituo em pengaapo' iow si mauli-ulit.

Roma 15:16

Yaku mamuali ata maselewir a si Kristus Yesus e mengakua in Abar Kaaruien andumoro' i Yesus Kristus a sé tou ra'ica Yahudi. En tawoienku tanu in tawoien é imam si mengawéé i raragés, ampa'paan aku makawali sé tou ra'ica Yahudi a si Amang Kasuruan wosama' séra teriman-Na tanu raragés si casalé'-Na wo si line'naso i Roh Le'nas.

1 Korintus 3:16

Ra'ipé' réén kailekan iow sapaoka kamu itu tanu Walé i Amang Kasuruan wo e Roh i Amang Kasuruan makaento' ai camu?

1 Korintus 3:9

Ampa'paan kami in dua sé matawoi mewali-wali wo si Amang Kasuruan wo kamu tanuoka in uma i Amang Kasuruan wo ka'i tanuoka im balé-Na.

1 Korintus 6:19

Musti kailekan iow sapaoka en owak iow itu paento'an i Roh Le'nas. E Roh Le'nas itu aiwéé i Amang Kasuruan mento' ai camu. En owak iow ra'ica anu miow in esa taan anu i Amang Kasuruan.

2 Korintus 6:16

Awéan réén em puténa walé i Amang Kasuruan wo im paapo'an é opo-opo'? Kita anio' walé paento'an i Amang Kasuruan si menonou. Si Amang Kasuruan in esa icumua: “Mento' oka Aku an uner éra wo menonou mewali-wali wo iséra. Yaku mamuali oka Amang Kasuruan éra, wo séra mamuali oka tou-Ku.”

Galatia 6:10

Ampa'paan in itu, ang karoro'anta winéané' témpo, mayoo émaanta sé loor a sé pakasa in tou, kataré-taré a sé poo-poowta an esa paémanen.

Filipi 1:11

Isombayangku ka'i wosama' pengéma-ngémaan iow sé nianggap wutul i Amang Kasuruan ampa'paan si Yesus Kristus imatawoi ang katouan iow. Wo in taniitu si Amang Kasuruan oka si parayo wo pasiriin.

Filipi 2:17

Tumo'tolke' mai asi kataré an tutuwku kumua in Abar Kaaruien ai camu, kamu mapercaya a si Apo' Yesus wo isumarakano ing katouan iow e maéma' ing kasalé'an-Na. Anaé, mandé ka'i aku ukumen patén ampa'paan in tawoienku e mengakua in Abar Kaaruien andumoro' i Yesus Kristus ai camu, en itu ra'ica sapa-sapa. Yaku kasake' kumua imakapulu'sama' a si Amang Kasuruan wo maaru-arui oka mewali-wali wo icamu.

Filipi 4:18

Pakasa eng kaperluanku kinakiitano, wo sé awéan a yaku ilumébéo asi paperlunku. Ampa'paan yaku tumerimao im patawang iow itu asi Epafroditus owo. En doit aiwéé miow itu meputé im paragés mawou manam si icasalé' i Amang Kasuruan si patus ai Sia.

Kolose 3:17

Wo sapake' mangé en émaan iow kuma'pa icua miow, émaano mangé waya en itu kumiit ing kasalé'an i Apo' Yesus, ang karapi i makua makapulu'sama' a si Amang Kasuruan, Amangta, ampa'paano i Yesus Kristus.

1 Timotius 3:15

sa aku icasomoi maai, en suratku anio' icateka' owo mangé ai co. Wo asi suratku anio', ro'nao kakailekanmu musti tumambisa eng katouan é tou maéman sé imuntepo am pamalé i Amang Kasuruan. Séra itu mamuali tuura wo totombol an esa walé. Tanu siituo sé jamaat-Na musti menonou, tanu tuura wo totombol in sususuien wutul itu.

Ibrani 3:6

Taan si Kristus le'tek tanu Toyaang si makakawasa am balé i Amang Kasuruan. Wo icitao em balé-Na itu sa timboianta wutu-wutul em paémanenta wo em paarapen si pengatirayota.

1 Petrus 2:9

Taan kamu anio' bangsa sé sinisiro i Amang Kasuruan, imam sé maselewir a si Amang Kasuruan si Colanota, bangsa sé line'nas-Nao wo ka'i mamuali anu-Na. Kamu im baya imamuali tanu siitu wosama' ro'na ipakua-kua miow a sé tou andumoro' sé kakaya'kaan sé niéma'o i Amang Kasuruan. Siao en tumowa icamu kumesot ang kariréimbengan wo muntep asi sendot-Na wangko'.

1 Petrus 4:11

Sa awéan tou tumerima ing kamang aitambér i Roh Le'nas eng kumua in taar i Amang Kasuruan a sé tou, musti icuana en itu kumiit in taar i Amang Kasuruan. Wo sa awéan tou tumerima ing kamang aitambér i Roh Le'nas en tumawang sé tou, musti émaanna en itu maké ing kaketeran asi Amang Kasuruan owo. Anaé, pakén iow sumama-sama' eng kamang aitambér i Roh Le'nas ai camu esa wo si esa wosama' asé pakasa sé niéma'o miow itu, sé tou ro'na rumayo wo sumiri' si Amang Kasuruan, ampa'paano i Yesus Kristus. Si Amang Kasuruan itu makaanu i rarayo wo in sisiri' wo ing kakawasaan akar ing kauré-uré! Ulit.

1 Petrus 4:17

Ampa'paan intarépé' an témponao pakasa in tou akimen i Amang Kasuruan wo eng kataré akimen-Na, sé tou-Na in esa. Wo sa kita sé tou-Na eng kataré akimen-Na, tambisa réén e mamuali sa a sé tou sé ra'ica maéman in Abar Kaaruien-Na?

Wahyu 1:6

Wo niéma'-Na kita mamuali tou-Na ang Kakolanoan-Na, wo mamuali imam-imam sé maselewir a si Amang Kasuruan, Amang-Na. A si Yesus Kristuske' e rarayo wo en sisiri', wo eng kakawasaan akar ing kauré-uré. Ulit.

Wahyu 20:6

Pakakamangen wo line'naso sé tou sé kataré-taré tinou sumawel! Em papaté karua ra'io kumawasa iséra. Taan séra mamuali oka imam-imam sé mengaselewir a si Amang Kasuruan wo a si Kristus, wo séra ka'i merénta oka mewali-wali wo Sia sangariwu ngata'un eng kauréna.

Wahyu 3:12

Si séi e muntung, émaan-Ku oka sia mamuali totombol am Balé Le'nas i Amang Kasuruan-Ku, wo sia mento' oka am bitu akar ing kauré-uré. Ipatic-Ku oka ka'i ai sia e ngaran i Amang Kasuruan-Ku, e ngaran ing kota i Amang Kasuruan-Ku Yerusalem weru. Wo eng kota itu itumpa oka mai i Amang Kasuruan an sorga owo. Wo ipatic-Ku oka ai sia e ngaran weru-Ku.

Wahyu 5:10

Séra itu niéma'-Muo mamuali esa kakolanoan, wo mamuali imam-imam i Amang Kasuruanta. Wo séra merénta oka tanu kolano ang kayo'baan.”