1 Korintus 9:21 - En Taar Weru a nunuwu' é Tontemboan

²¹ Taniitu ka'i, an tutuwku mewali-wali wo sé tou ra'ica Yahudi, sé ra'ica makiit in ukum Torat, émaanku eng katouanku meputé wo iséra. Émaanku taniitu wosama' ro'na akinenku sé tou ra'ica Yahudi a si Kristus. Anaé, aku ra'ica toro ipeputé tanu tou sé ra'ica makiit im perénta-perénta i Amang Kasuruan, taan aku uli-ulit maéma' im perénta i Kristus.

1 Korintus 9:21 ပူးပေါင်းရင်းမြစ်များ

Kisah Para Rasul 15:28

Niénano i Roh Le'nas wo niénano ka'i ami, sa kamu ra'ica sangali in sunaten kuma'pa kumiit in ukum si aisusuio i Musa. Ampa'paan in ituo, kami asalo rumu'du' icamu eng kumiit in atoran anio':

Kisah Para Rasul 16:4

Am bawayaan éra imali'ci-li'cir asi esa kota mangé ang kota walina, si Paulus wo si Silas makua in atoran-atoran sé niéma' é ruru'du'an wo sé penatua an Yerusalem, wosama' sé jamaat ro'na kumiit in atoran itu.

Kisah Para Rasul 21:25

Taan andumoro' é tou ra'ica Yahudi sé maémano, séra kinirimano ami surat andumoro' sé pinusé' amio. Em pinusé' ami itu tana'i: séra ra'ica toro kuman ing kakanen sé ayumpero a sé opo-opo', ra'ica toro kuman in enda' kuma'pa kuman sé binatang imaté ampa'paan kinisel, wo ra'ica toro mengabersina.”

Roma 2:12

Sa sé tou ra'ica Yahudi méma' ing kamesé-meséaan taan séra ra'ica makailek in ukum Torat, séra makéré oka ukuman ra'ica iciit in atoran-atoran an ukum Torat. Wo sé tou Yahudi sé makailek in atoran-atoran an ukum Torat wo mengaéma' ing kamesé-meséaan, séra ukumen oka iciit in atoran-atoran an ukum Torat.

Roma 2:14

Sé tou ra'ica Yahudi, séra ra'ica makailek in ukum Torat. Taan sa émaan éra tanu en aiperénta an ukum Torat ampa'paan ing kasalé'an éra in esa, en itu itumuru' sapaoka en até éra makaileko si wisa si ro'na émaan wo si wisa si ra'ica toro émaan, mandé ka'i en ukum Torat itu ra'ipé' kailekan éra.

Roma 7:22

An untep in atéku, icasalé'ku keli méma' in ukum i Amang Kasuruan,

Roma 7:25

Makapulu'sama' a si Amang Kasuruan ampa'paan Siao en lumowir yaku ampa'paano i Yesus Kristus Apo'ta. Anaé tana'i, en atéku masalé' kumiit in ukum i Amang Kasuruan, taan en owakku pakakawasané' ing kamesé-meséaan.

Roma 8:4

Niéma' i Amang Kasuruan in taniitu wosama' kita mamuali tou wutul, meputé ing kasalé'an-Na sé aipatic an ukum Torat. Wo kita ro'na menonou makiit ing kasalé'an i Roh-Na, ra'ica kumiit ing kasalé'an in owakta.

Galatia 3:2

Sowateno mai em buwuéienku anio': Ampa'paan in sapa réén kamu tumerima i Roh Le'nas? Ampa'paan mengaéma' in ukum Torat kuma'pa luminga in Abar Kaaruien wo maéman a si Kristus?

Galatia 6:2

Sa awéan an uner iow meta'up ing kawenduan, mensén-sémbongano mangé kamu tumanggong im pamuléngen itu! Wo in taniitu kamu icumiito in ukum i Kristus andumoro' i meupu-upusan.

Ibrani 8:10

Taan intarépé', si anioo em perjanjian si émaan-Ku oka ang karapi é tou Israel, asé endo mengangai sa. Iweta'-Ku oka en ukum-ukum-Ku a ngaas éra, wo ipatic-Ku oka en itu an untep in até éra. Yaku mamuali oka Amang Kasuruan éra, wo séra mamuali oka tou-Ku.