1 Korintus 7:34 - En Taar Weru a nunuwu' é Tontemboan

³⁴ Eng kasiwakanna em pakawerotna imaruao. Wo sé wéwéné si ra'ica wana penanaan wo sé mangala'un, memerot-meroto mangé andumoro' si Casuruan, wééo mangé en owak wo e mu'kur torona si Casuruan wosama' le'nas an dior-Na. Taan se wéwéné awéano penanaan memero-meroto mangé andumoro' ing kayo'baan, tumambisa sia marui si penanaanna.

1 Korintus 7:34 ပူးပေါင်းရင်းမြစ်များ

Yohanes 10:13

Si tou itu tumincas ampa'paan sia asalo pate'tekan, wo ra'ica pandungenna sé domba itu.

Roma 6:13

Wo tioo isarakan iow sé an owak iow mamuali pakakas eng kawasan ing kamesé-meséaan e méma' ing kaléwo-léwo'an. Taan isarakano mio' en owak iow a si Amang Kasuruan ampa'paan kamu ra'io pakakawasaan im papaté wo menonou ang katouan weru. Wo isarakano mio' pakasa sé an owak iow a si Amang Kasuruan em pakén torona méma' in sususuien wutul-Na.

1 Korintus 6:20

Ampa'paan kamu tinelesano i Amang Kasuruan ang kerapi in sosor em bééna siituo en enda' i Kristus. Ampa'paan ituo pakéno sumama-sama' en owak iow e rumayo wo sumiri' si Amang Kasuruan.

1 Korintus 7:33

Taan sé tuama awéano penanaan, memero-meroto mangé andumoro' ing kayo'baan tumambisa sia marui si penanaanna.

1 Korintus 7:35

Ipakuaku pakasa itu torona ing kalooran iow, ra'ica méro icamu méma' sapa en icasalé' miow. Taan icasalé'ku kamu méma' sé patus ai camu wosama' kamu ro'na kumiit si Casuruan ra'ica wana e makala-kala'.

2 Korintus 11:28

Wo aluar asé im pakasa itu, susur in endo aku mendam im pamuléngen in até mawerot ing kaadaan é pakasa in jamaat.

2 Korintus 8:16

Icua ami makapulu'sama' a si Amang Kasuruan, ampa'paan an até i Titus winéan-Nao mai ing kasalé'an wangko' en tumawang icamu, an até i Titus meputé wo si an até ami.

Filipi 1:20

En icasalé'ku wo em paarapenku wosama' aku ra'- ica papalawi' mengaéma' in tawoien si aiwéé i Amang Kasuruan. Wo em butulna en casalé'ku sapaoka intarépé' aku kasake' ra'ica maindé' mengakua andumoro' i Kristus kaputé indior. Anaé aku menonou kuma'pa maté ra'ica sapa-sapa, em penting keli si Kristus em parayo wo pasiriin am pakasa sé pengaémaanku.

1 Tesalonika 5:23

Pangileken ami a si Amang Kasuruan wosama' émaan-Na eng katouan iow male'nas. Siao ka'i méma' icita menonou ang kaeluran. Pangileken ami ka'i téiran-Na mai en owak, en até wo e mu'kur iow wosama' an tutuw si Apo'ta Yesus Kristus maai sumawel, kamu ra'ica wana kaséaan ampa'paan kamu ra'ica iméma' ing kameséaan sapa-sapa.

1 Timotius 3:5

Ampa'paan sa sia ra'ica makawoo en tumu'tul im pamaléna in esa, ra'ica kawisa ka'i sia ro'na tumu'tul sé jamaat i Amang Kasuruan!

1 Timotius 5:5

Si balu wéwéné si ra'ica wana toyaang wo ra'ica wana poyo' en suma'li, sia asalo mamangén a si Amang Kasuruan. Endo wo em bengi sia menomba-nombayang meki-kiupus a si Amang Kasuruan.

Titus 3:8

Pakasa e nunuwu' sé aicuaku anio' wutul wo loor wo awéan torona a sé pakasa in tou. Icasalé'ku icuamu waya en sususuien itu a sé tou maéman a si Amang Kasuruan wosama' séra uli-ulit rumaméji tumawoi loor.