1 Korintus 7:17 - En Taar Weru a nunuwu' é Tontemboan

¹⁷ Aweso taré si esa wo si esa tou melur ing katouan in esa tanu si aitantuo i Amang Kasuruan ai sia, si katouanna maéman a si Kristus an tutuw tinowa i Amang Kasuruan. Si anioo em pasusuiku am pakasa in jamaat.

1 Korintus 7:17 ပူးပေါင်းရင်းမြစ်များ

Matius 19:12

Awéan tou ra'ica icakawéng ampa'paan ketounake' mai tanuo siitu. Awéan ka'i ra'ica icakawéng ampa'paan niéma' é tou walina akar mamuali tanu siitu. Awéan ka'i sé ra'ica icumawéng ampa'paan kasalé'anna in esa, wosama' séra ro'na maké in témpo éra en sumelewir si Amang Kasuruan. Si tou makawoo tumerima in sususuien-Ku anio', lébé loor terimana en itu.”

1 Korintus 10:32

Kamu musti menonou tanu siitu akar ra'ica émaan iow sé tou walina méma' ing kameséaan, sia tou Yahudi, tou ra'ica Yahudi, kuma'pa sé tou maéman a si Kristus an jamaat-jamaat i Amang Kasuruan.

1 Korintus 11:16

Taan sa awéan tou sumangkal sapa sé aicuaku anio', sia kuananku in tana'i: kami wo sé jamaat i Amang Kasuruan am bisa-wisa makaanu ing kanaramen tanu si aicuaku itu. Ra'ica wana walina.

1 Korintus 11:34

Sa awéan tou maarem, sia musti kuman owo am baléna. Sa émaan iow tanu siitu, em paesaan iow ra'ica makawali mai ukuman asi Amang Kasuruan. Andumoro' sé walina, elurenku oka sa aku maai.

1 Korintus 14:33

Ampa'paan si Amang Kasuruan ra'ica masalé' ing kalicokoan, taan en icasalé'-Na kaeluran.

1 Korintus 16:1

Intarépé', en icuaku andumoro' in doit pali'usen si casalé' miow iwéé a sé tou le'nas an Yerusalem. Icasalé'ku wosama' kamu kumiit sapa sé aituru'kuo a sé jamaat ang Galatia.

1 Korintus 4:17

Ampa'paan in ituo yutusku mangé si Timotius ai camu ampa'paan sia itu niéma'kuo tanu toyaangku in esa wo icaupusku, sia ka'i le'tek a si Casuruan. Mangéna oka ita'néi sumawel ai camu andumoro' tambisa eng katouanku makiit a si Kristus Yesus. Eng katouanku itu ipenusu-nusuikuo a sé jamaat am pakasa in tampa.

1 Korintus 7:18

En tuusna tana'i: Sa awéan tou sinunato wo sia towan i Amang Kasuruan e maéman a si Kristus, sia tioo rumaméji tumala in tuus sunat an owakna. Wo sa awéan tou sé ra'ipé' sinunat wo sia towan i Amang Kasuruan torona maéman a si Kristus, sia ra'io sangali mapasunat.

1 Korintus 7:24

Anaé, é poo-poow, tambisake' eng katouan iow an tutuw tinowa i Amang Kasuruan e maéman a si Kristus, menonou mangé tanu siitu an dior i Amang Kasuruan.

1 Korintus 7:7

En ulitna lébé icasalé'ku woo pakasa en tou meputé wo yaku. Taan si Amang Kasuruan itumambéro mai ing kamang a sé tou esa wo si esa ra'ica pineputé, si esa winéanai sia'i, sé walina ka'i winéanai siitu.

2 Korintus 11:28

Wo aluar asé im pakasa itu, susur in endo aku mendam im pamuléngen in até mawerot ing kaadaan é pakasa in jamaat.

2 Korintus 8:18

E maangé ra'ica si Tituske' in esa, yutus ami ka'i si esa poowta maéman mewali-wali wo sia maangé ai camu. Si poowta itu parayo-rayo am pakasa in jamaat ampa'paan en tawoienna makua in Abar Kaaruien andumoro' i Yesus Kristus.

Galatia 1:22

Akar asi témpo itu sé jamaat maéman a si Kristus an Yudea ra'ipé' kawisa isuméré ing gioku.

1 Tesalonika 2:14

Poo-poow! Kamu niokoio é tou esa suku wo icamu an Tesalonika. Wo in taniitu kamu meputéo wo sé tou Yahudi an Yudea sé maémano a si Apo' Yesus Kristus, séra niokoi ka'i é tou éra in esa.

2 Tesalonika 1:4

Ampa'paan in itu, kami arui masisil a sé jamaat in andumoro' icamu, ampa'paan kamu kasake' maéman a si Yesus wo kasake' talesen mandé ka'i kamu mendam in okoi wo ing kawenduan.