1 Korintus 7:14 - En Taar Weru a nunuwu' é Tontemboan

¹⁴ Ampa'paan si tuama ra'ica maéman itu, sia patuso mamuali tou i Amang Kasuruan ampa'paan icumawéngo ang karapi i wéwéné si mamualio tou i Amang Kasuruan. Taniitu ka'i si wéwéné ra'ica maéman itu patuso mamuali tou i Amang Kasuruan ampa'paan kinawéngo i tuama si mamualio tou i Amang Kasuruan. Sa ra'ica taniitu sé toyaang éra tantu meputé wo sé toyaang ra'ica makatuus si Amang Kasuruan. Taan en ulitna sé toyaang éra ro'na mamuali tou i Amang Kasuruan.

1 Korintus 7:14 ပူးပေါင်းရင်းမြစ်များ

Kisah Para Rasul 10:23

Wo pangileken i Petrus wosama' séra mento' am bitu. Mando mai, si Petrus tumu'tul wo mangé mewali-wali wo sé telu tou itu. Awéan ka'i piraan poow sé maéman an Yope sé icumiit wo sia.

Roma 11:16

En andéanna tana'i, sa esa ngapokol roti kataré aiwééo a si Amang Kasuruan, pakasa e roti itu ka'i mamualio anu-Na. Wo sa en a'mut in tuura mamuali anu i Amang Kasuruan, em panga-pangana ka'i mamualio anu-Na.

1 Korintus 7:13

Taniitu ka'i sa awéan esa wéwéné maéman a si Kristus makapenanaan si ra'ica maéman a si Kristus, wo si penanaanna itu masalé' menonou mewali-wali wo isia, si wéwéné itu ra'ica toro metané wo si tuama penanaanna.

1 Timotius 4:5

Ampa'paan pakasa en itu line'nas in Taar i Casuruan wo in sombayangta.

Titus 1:15

A sé tou le'nas an dior i Casuruan, sapake' waya en émaanna le'nas. Taan sé tou najis wo sé ra'ica maéman a si Casuruan, em pawasan wo em pengaémaan éra ra'ica loor ampa'paan en até wo em bewerot éra najis.