1 Korintus 4:6 - En Taar Weru a nunuwu' é Tontemboan

⁶ Poo-poowku sé maéman! Yaku matic andumoro'ku wo si Apolos torona ing kalooran iow. Paarapen ami, kamu ro'na suméré icami in dua tanu paandéan wo ro'na oka kaajaran iow sapa eng kaangéan é nunuwuun ang Kitap Le'nas anio', “Émaano sapa si aipatic ang Kitap Le'nas, tioo mengaéma' andumoro' sé walina sé pinéro ang Kitap Le'nas.” Wo in taniitu ra'ica wana ai camu en tumirayo si kikiiten iow wo mengawawa' si kikiiten walina.

1 Korintus 4:6 ပူးပေါင်းရင်းမြစ်များ

Kisah Para Rasul 18:24

Awéan esa tou Yahudi, makangaran Apolos. Sia tou Aleksandria. Sia icateka'pé' mai an Efesus wo sia pinter keli manuwu' wo makailek keli andumoro' ing Kitap Le'nas.

Kisah Para Rasul 19:1

An tutuw i Apolos ang Korintusé', si Paulus maya'o mangé an doo-roong an sangkum ing Galatia wo am Frigia wo icateka' an Efesus. Am bia'i, sia meta'up wo piraan tou sé maémano.

Roma 12:3

Ampa'paano si Amang Kasuruan itumambéro mai in upus-Na a yaku e mamuali ruru'du'an-Na, ampa'paan in ituo sina'uenku kamu im baya tana'i: Tioo kamu mengawerot andumoro' sé ilumébé mai asi patus paweroten iow. Taan weroteno mangé eng kawooan in owak iow sé isumoma, iciit im paémanen si aiwéé i Amang Kasuruan ai camu asi esa wo si esa.

1 Korintus 1:12

Em peangé-angénku tana'i: Awéan tou an uner iow sé makua, “Yaku makiit si Paulus”, awéan ka'i sé makua, “Yaku makiit si Apolos”, sé walina ka'i makua, “Yaku anio' makiit si Petrus” wo sé walina ka'i makua, “Yaku makiit si Kristus.”

1 Korintus 1:19

Ampa'paan ang Kitap Le'nas aipatic in tana'i, “Si tou awéan kapinteran, itala-Ku oka eng kapinteranna itu. Wo si tou pandéi, itala-Ku oka eng kapandéianna itu.”

1 Korintus 1:31

Anaé, ampa'paan pakasa sé niéma'o i Amang Kasuruan ai cita, kakailekantao sapa eng kaangéan si aicua ang Kitap Le'nas tana'i, “Si tou matirayo in owakna, musti tumirayo sapa sé niéma' i Casuruan ai sia.”

1 Korintus 13:4

Si tou mengaupus sé tou walina, sia itu talesen, loor en até, ra'ica kokanat, ra'ica marayo in owak, wo ra'ica tirayo.

1 Korintus 3:19

Ampa'paan sé paweroten é tou ang kayo'baan kapinteran, en itu paweroten bodok i Amang Kasuruan. Ang Kitap Le'nas aipatic in tana'i, “Awéan sé tou paweroten ing kayo'baan pinter, taan pinaké i Amang Kasuruan eng kapinteran éra itu eng kumala iséra.”

1 Korintus 3:21

Ampa'paano in itu, tioo kamu marayo-rayo si kikiiten iow. Ampa'paan em baya-waya cauntep ka'i sé kikiiten iow, aiwéé i Amang Kasuruan torona ing kalooran iow.

1 Korintus 5:2

Mandé ka'i an uner iow awéan tou maéma' ing kameséaan tanu siitu taan kamu tirayopé'. Si patus ai icamu, kamu musti masusa en até wo si tou maéma' ing kaléwo'an itu musti icesot iow an jamaat.

1 Korintus 5:6

Mandé ka'i awéan tou maéma' ing kamesé-meséaan an jamaat iow taan kamu marayopé' in owak. En itu ra'ica patus. Tantu kailekano miow si andéan anio': E ragi sangatekic ro'na méma' pakasa in adonan roti ruméis. Eng kaangéanna tana'i: mandé ka'i esake' tou an uner iow méma' ing kaléwo'an, sia itu ro'na tumawér pakasa in tou maéman walina akar kumiit méma' ing kaléwo'an.

1 Korintus 8:1

Poo-poowku, intarépé' icasalé'ku icua ai camu andumoro' ing kakanen iparagés a sé opo-opo'. Awéan sé tou makua in tana'i: “Kita im baya sé maéman makaileko andumoro' in itu.” Eng kakailekan tanu siitu mengaéma' icamu makatirayo, taan en upus ro'na méé ing kaketeran a sé tou walina.

1 Korintus 9:23

Niéma'ku en owakku tanu siitu wosama' mengeli-ngeli sé tou maéman in Abar Kaaruien andumoro' i Kristus. Asi Abar Kaaruien ituo aku ro'na makéré ing kamang asi Casuruan mewali-wali wo sé tou walina.

2 Korintus 10:12

Tantu kami ka'i ra'ica brani ipeputé kuma'pa méma' in owak ami kaputé é tou marayo in owak in esa. En ulitna séra bodok ampa'paan séra mengaukurke' in owak éra mengapaké in ukuran in esa. Pengapeputé éra en owak éra ang karapi in owak in esa.

2 Korintus 10:15

Kami ra'ica mengatirayo in tawoien sé niéma' é tou walina an tampa sé ra'ica aitantu ai cami. Taan paarapen ami sapaoka an tutuw em paémanen iow makaketer, makaawes ka'i kamu marayo icami ampa'paan en tinawoi ami an uner iow an sangkum im patawoian si aitantuo i Amang Kasuruan.

2 Korintus 10:7

Séréno sapa sé an dior iow. Sa tou maéman sapaoka sia anu i Kristus, sia in esa ka'i musti merot icami anu i Kristus kaputéna.

2 Korintus 11:4

Ampa'paan kamu pakasérén talesenke' tumerima si esa tou mai wo masusui ai camu andumoro' in sususuien si ra'ica meputé wo sé ipasusui ami andumoro' i Yesus. Wo kamu ka'i tumerima i roh si ra'ica meputé wo i Roh Le'nas kuma'pa Abar Kaaruien si wutu-wutul ra'ica meputé wo in abar kaaruien si sumangkumo tinerima miow ai cami.

2 Korintus 12:19

Ang kauré miow maca in surat anio', weroten réén miow sapaoka kami asalo méla in owak an dior iow? Ra'ica tanu siitu! Kailekan i Amang Kasuruan sapaoka pakasa sé ipakua ami itu makiit ing kasalé'an i Kristus. Poo-poow sé icaupusku, sapa sé niéma' ami, en itu e méé ing kaketeran am paémanen iow.

2 Korintus 12:20

Em ipaindé-indé'ku sapaoka an tutuw aku maai ai camu kéréanku kamu ra'ica tanu im pinaarapku, wo kaséréan iow ka'i aku ra'ica tanu si paarapen iow. Ipaindé-indé'ku oréoka awéan sé mengindo-indoan roma', mengkanatan, mengkae'bowan, mengawerotke' in owakna in esa, mengaroros, memaa-maar a sé tou andumoro' sé raica wutul, mengatirayo wo mengalicoko.

2 Korintus 12:6

Sa woo aku masalé' rumayo in owakku in esa, yaku ra'ica tou bodok, ampa'paan em pakuaku sé wutul. Taan aku tumang in owak wo ra'ica tumirayo sé aipapaturu itu, ampa'paan ra'ica casalé'ku kamu en numilai yaku ilumébé wo in sapa sé sinéréo miow kuma'pa sé liningao miow a yaku.

2 Korintus 4:15

Icami mendamo mai waya ing kawenduan itu asaloke' ing kalooran iow. Icami talesen masaru ing kawenduan itu wosama' en upus aitambér i Amang Kasuruan makakeli en tou imendam. Wo in taniitu makakelio sé tou makua i makapulu'sama' a si Amang Kasuruan, akar Sia iparayo-rayo wo pasiri-siriin.

Kolose 2:18

Anaé, tioo en laasa ing katouan iow itu léwoon in sususuien in tou si maturu' kéndo' ko'kos en até wo maapo' a sé malaékat wo mengatirayo andumoro' im papaturu'an sé aipapaturu' ai sia wo ka'i mengarangka' in owak ang karapi ra'ica wana alasan ampa'paan asalo imawero-werot ing kasalé'an ing kayo'baan.

1 Tesalonika 1:5

Kailekan ami en itu ampa'paan asi makasa kami mangé ai camu an Tesalonika e mangé kumua in Abar Kaaruien andumoro' i Yesus Kristus. An tutuw itu kami ra'ica asaloke' maké i nunuwu' ami, taan ang karapi ing kawasa i Casuruan wo ang karapi i Roh Le'nas si méma' icamu uli-ulit mercaya in Abar Kaaruien andumoro' i Yesus Kristus itu. Wo sinéréo ka'i miow em peri ami. Anaé, kailekano miow sapaoka en Abar Kaaruien itu wutul.

2 Timotius 2:10

Ampa'paan in iituo aku talesen mengawuléng ing kawenduan itu wosama' sé tou sinisiro i Amang Kasuruan ro'na maéman a si Kristus Yesus wo makéré ing kalowiran ang karapi i rarayo wo in sisiri' akar ing kauré-uré.