1 Korintus 3:12 - En Taar Weru a nunuwu' é Tontemboan

¹² Awéan tou mangun am bawo im patuuran itu, maké mas, perak, kuma'pa watu permata wo awéan ka'i tou mangun am bawo im patuuran itu maké ing kayu, rukut, kuma'pa raami.

1 Korintus 3:12 ပူးပေါင်းရင်းမြစ်များ

Kisah Para Rasul 20:30

Lébé-lébé an uner iow in esa maai oka sé tou eng kumua in sususuien sé ra'ica wutul. Émaan éra in taniitu wosama' sé tou sé maémano a si Yesus ra'io ka'i maéman wo kumiit oka iséra.

Roma 16:17

Poo-poowku, sina'uenku kamu, mareti-retio mangé a sé tou sé masalé' mengaéma' ing kapetanéan, wo sé masalé' mengasélé'kow im paémanen é tou a si Amang Kasuruan. Séra mengasusui in sususuien sé membalinaan wo in sususuien wutul sé kinéréano miow. Anaé, tumayango mangé ai séra.

1 Korintus 3:11

Ampa'paan em patuuran si aitulir itu Siao si Yesus Kristus. Wo ra'ica wana mandé esake' tou e ro'na tumulir im patuuran walina.

1 Korintus 3:13

En tawoien é tou si esa wo si esa kaséréan oka an tutuw i Kristus maai sumawel. Ampa'paan asi endo itu, api oka e méma' in tinawoi é tou si esa wo si esa kaséré-séréan. En api oka e muji wo en tumuru' sé tinawoi éra itu loor kuma'pa ra'ica.

2 Korintus 2:17

Kami ra'ica meputé wo sé kinakelian tou sé mengakua in abar i Amang Kasuruan e mangéré ing kauntungan in esa. Em paangé-angén ami lekep en até, ampa'paan si Amang Kasuruan e rumu'du' icami. Wo si Amang Kasuruan in esa en suméré sapaoka icami makua in abar itu tanu ata-ata i Kristus.

2 Korintus 4:2

Ra'ica kiim ami iméma' in tawoien anio' maké ing kanaramen sé ipaene-enep wo sé kalawiin. Wo ra'ica kiim ami matawoi ang karapi imauwak wo mengasélé'kow in Taar i Amang Kasuruan. Taan sé ipakua ami andumoro' sé wutul an dior i Casuruan, wo in taniitu icami maarap wosama' pakasa in tou numilai sumama-sama' ai cami an dior i Amang Kasuruan iciit in até weresi éra.

Kolose 2:8

Mareti-retio mangé kamu, oréoka awéan en tumawér icamu in sususuien andumoro' ing katouan sé ra'ica wana torona wo ra'ica wutul. En sususuien éra itu ra'ica asi Kristus owo, taan mengatuuré' asi kanaramen é tou indior wo ka'i a sé roh sé makakawasa ing kayo'baan.

1 Timotius 6:3

Si séi masusui in sususuien walina wo maanggap in sususuien wutul i Apo'ta Yesus Kristus suméa', wo ka'i ra'ica makiit in sususuienta mengaapo',

2 Timotius 2:20

Am balé é tou siya', awéan pakakas-pakakas sé niéma' a mas, am pérak, ang kayu wo ka'i awéan sé niéma' an tana' pulut owo. Em pakakas sé niéma' a mas wo pérak papakén ang kasalé-salé'an wangko'. Wo em pakakas si niéma' ang kayu owo wo tana' pulut, papakénke' ang kasalé-salé'an teké' sé kanaramenke'.

2 Timotius 3:13

Taan sé tou léwo' wo sé tou mengauwak, séra itu makaléwo' oka. Séra mengauwak sé tou, taniitu ka'i wo sé tou walina maréng sumawel sumuli' muwak iséra.

2 Timotius 3:7

Sé wéwéné itu mangile-ngilek in susuian é tou walina, taan en até éra ra'ica kiim tumerima in sususuien wutul itu.

2 Timotius 4:3

Émaanmu waya en itu, ampa'paan asi esa endo mengangai sa, sé tou ra'io kiim luminga in sususuien wutul itu. Taan taré towan éra sé guru sé icasalé' éra e marui in até éra ang karapi i nunuwuun manam pengalingan.

Ibrani 13:9

Tioo kamu isélé'kow in sususuien sé membam-balinaan sé ra'ica meputé wo in sususuien i Kristus. Lébé loor en até miow keteren ampa'paan kamu asalo makawangén asi upus aitambér i Amang Kasuruan. Sé atoran andumoro' ing kakanen, mandé kiiten iow, en itu ra'ica méé katoronaan ai camu.

1 Petrus 1:7

Asé pangepé'an ituo e méé tuus sapaoka kamu uli-ulit maéman a si Casuruan. E mas ro'na maléwo' mandé niéma'o tulén tinunu an api. Em paémanen iow lumébé mai im bééna i mas, anaé musti ujin ka'i ing kelian pangepé'an wosama' makaketer akar kamu makéré oka i rarayo wo in sisiri' wo pengasiriin asi endo i Yesus Kristus mai sumawel.

Wahyu 2:14

Taan awéan piraan sé ra'ica icasalé'-Ku ai camu: An uner iow awéan sé makiit im pasusui i Bileam. Si Bileam masusui a si Balak tumambisa en tumawér sé tou Israel kuman ing kakanen sé ayumpero a sé opo-opo', wo mengabersina.

Wahyu 21:18

E ri'dir mésel itu niéma' am batu permata yaspis. Wo eng kota itu niéma' a mas tulén wo masélap tanuoka ing kaca eng kaweresina.

Wahyu 3:18

Ampa'paan in ituo, sina'uen-Ku kamu en tumeles mas a Yaku, si matuléno in api, wosama' kamu masiya'. Tumeleso karai kulo' a Yaku wosama' pakén iow wo ra'ica malawi' sérén é tou metangkol. Wo tumeleso solo eng kisu am beren wosama' kamu ro'na suméré.