1 Korintus 15:52 - En Taar Weru a nunuwu' é Tontemboan

⁵² En itu asalo mi'pit im beren tumarépé'anke'mai mamualio, an tutuw in téngén en terompét sosomoi. An tutuw i luminga in terompét itu, sé tou imatéo touen oka sumawel ang karapi in owak ra'ica ro'na materi, wo kita sé menonoué' roban oka.

1 Korintus 15:52 ပူးပေါင်းရင်းမြစ်များ

Matius 24:31

Wo iru'du'-Na oka sé malaékat-Na kumesot sumengo in trompét taténgé keli, wo ipapali'us-Na ai séra pakasa sé tou sé sinisir-Nao am bisa-wisake' asi kayo'baan anio' tumo'tol asi tempok in langit akar asi tempok in langit.

Yohanes 5:25

En ulitna icua-Ku mangé ai camu, awéan oka en témpona wo an témponao, sapaoka sé imatéo, luminga oka in suara i Toyaang i Amang Kasuruan, siituo en suara-Ku. Wo sé tou luminga in suara-Ku menonou oka.

Yohanes 5:28

Tioo kamu mangaya'ka' in aicua-Ku anio', ampa'paan maai oka en témpona pakasa en tou sé aicuburo luminga oka in suara-Ku,

1 Korintus 15:23

Taan esa wo si esa touen sumawel kumiit in urutan: kataré si Kristus si tinouo sumawel tanu jaminan ai cita. Wo an tutuw Sia maai sumawel, gilirano é tou-Na en touen.

1 Korintus 15:42

Taniitu ka'i e mamuali sa a sé tou imatéo an tutuw éra in touen sumawel. En owak si aicubur itu si owak ro'na mawuruk, taan si owak tinou sumawel, owak ra'ica kawisa maléwo'.

1 Korintus 15:50

Poo-poow, em peangé-angénku tana'i: en owakta intarépé' niéma' an enda wo an sama'na owo. Wo en owakta anio' sa, ra'- ica toro muntep ang kayo'baan weru i Amang Kasuruan. En owak si ro'na maté tanu si anio' ra'io ka'i pakénta ampa'paan a mangé mbitu ra'io wana ka'i e maté.

1 Tesalonika 4:15

Si Apo' Yesus in esa sumangkumo icumua sa Sia maai oka sumawel. Wo kita sé menonoué' an tutuw Sia maai sumawel, ra'ica icaangkai rior wo sé tou imatéo.

2 Petrus 3:10

Taan kawisa si Apo' Yesus maai sumawel ra'ica wana e makailek ampa'paan Sia maai tanuoka rombit. Wo asi endo itu en langit icatala oka parapiten in erut taténgé keli wo pakasa sé an langit makatunu-tunu oka, taniitu ka'i eng kayo'baan wo pakasa sé an untepna makaka'pu-ka'pu oka.

Wahyu 8:13

Wo kaséréanku awéan esa rajawali tuméléw rumangka-rangka' an langit. Wo linganku si rajawali itu mengangko-ngangko', “Icawangkur, icawangkur, icawangkuro sé tou sé maento' ang kayo'baan, ampa'paan awéané' telu malaékat walina sé sumengo oka in terompét éra.”

Wahyu 8:2

Wo sérénku sé pitu malaékat sé makatulung an dior i Amang Kasuruan, séra si esa wo si esa winéan esa terompét.