1 Korintus 13:5 - En Taar Weru a nunuwu' é Tontemboan

⁵ Sia ka'i ra'ica mengaéma' sé ra'ica sumoma wo ra'ica maéré ing kasalé'- an in owakna in esa. Sia ra'ica taporak mae'bow wo ka'i ra'ica ipaéma'na an até eng kameséaan é tou walina.

1 Korintus 13:5 ပူးပေါင်းရင်းမြစ်များ

Matius 5:22

Taan icua-Ku ai camu, si séi si mae'bow a si poowna musti ukumen. Wo si séi e mengawa'ba' si poowna, musti isaru' an dior é Mahkamah Agama. Wo si séi ka'i e makua si poowna bodok, sia patus itiya' an api ra'ica mape'de-pe'del.

Matius 9:4

Taan kailekan i Yesus em pawero-weroten éra, wo icua-Na ai séra, “Kéitu réén kamu mawerot andumoro' sé léwo' an untep in até miow?

Markus 3:5

Téintengen-Na séra im baya sé an li'cir-Na ang karapi in e'bow. Sia matapé ampa'paan séra keté até. Wo icua-Na a si tou itu, “Yuluro mai eng kamamu.” Wo yulurna eng kamana wo asi témpo ituke' imasama'o eng kamana.

Lukas 7:39

An tutuw i tou Farisi si menot si Yesus suméré sapa e niéma' i wéwéné itu, sia kumua an untep in aténa tana'i, “Sa Sia uli-ulit nabi, tantu kailekan-Na si séi si wéwéné itumimboi ai Sia anio' wo tantu kailekan-Na sapaoka si wéwéné itu wéwéné menonou ang kamesé-meséaan.”

1 Korintus 10:24

Tioo awéan esaan ai camu mangéré kauntunganna in esa, taan esa wo si esa tou mangéré mangé kauntungan é tou walina.

1 Korintus 10:33

Menonouo mio' kaputéku. Raméjinku marui in até é tou am baya-waya. Yaku ra'ica mangéré ing kalooranku in esa, taan aku mangéré ing kalooran é tou keli wosama' séra ro'na lowiren.

1 Korintus 11:18

Kataré-taré em pinalingaku asé tou sapaoka an tutuw iow mengali'us i maapo' a si Amang Kasuruan, awéan kaperéndéran an uner iow akar kamu metané-tanéo. Wo sé pinalingaku itu werotenku awéan em butulna.

1 Korintus 12:25

Wo in taniitu sé an owakta itu ra'ica wana eng katerian, aweso taré séra membém-béan rékén esa wo sé walina.

1 Korintus 7:36

Taan sa si esa tuama mentantuano kumawéng wo si esa wéwéné, wo weroten i tuama itu ra'ica loor sa ra'ica kawéngenna si patunanganna itu, ampa'paan si wéwéné patunanganna itu ka'i makamatu'ao, wo sa si tuama itu masalé' awéan penanaan, aweso taré séra kumawéng. En itu ra'ica kamesé-meséaan.

2 Korintus 5:19

Si anioo en abar si ipakua ami: Si Amang Kasuruan iméma' sé tou ang kayo'baan meeluran wo Sia ampa'paan si Kristus si maté ang kayu salip. Niéma'-Na en itu ang karapi ra'ica mena'né-na'néi ing kamesé-meséaan éra. Wo yutus-Na kami eng kumua in abar ing kaeluran anio' a sé tou walina.

Galatia 5:13

Poo-poow, kamu tinowao i Amang Kasuruan mamuali tou sé ra'io ka'i pakakawasan in ukum Torat. Taan tioo pakén iow eng kaloasan itu imamuali alasan i menonou ang kamesé-meséaan. Taan aweso taré kamu si esa wo sé walina mensen-selewirano mangé ang karapi in upus.

Filipi 2:21

Sé tou walina asalo mangéré ing katoronaan éra in esa, em paérén éra ra'ica ing katoronaan i Yesus Kristus.

Filipi 4:8

Anaé, é poo-poow, icuaku mangé ai camu, pakasa sé paanggapen wutul i Amang Kasuruan, pakasa e rarayo wo in sisiri', pakasa sé ra'ica marapit, pakasa sé le'nas, pakasa sé loor, pakasa sé manam pengalingan, pakasa sé patus paangkaian im bawangko' wo patus iparayo, weroteno mangé sumama-sama' en itu.

2 Tesalonika 3:7

Ampa'paan kailekan iow in esa tambisa e musti kumiit ing katouan ami, ampa'paan an tutuw kita mewali-walipé', kami re'dem matawoi.

2 Timotius 2:10

Ampa'paan in iituo aku talesen mengawuléng ing kawenduan itu wosama' sé tou sinisiro i Amang Kasuruan ro'na maéman a si Kristus Yesus wo makéré ing kalowiran ang karapi i rarayo wo in sisiri' akar ing kauré-uré.

2 Timotius 4:16

An tutuw ing kataré-taré aku méla in owakku am pengadilan, ra'ica wana esaan angé asé tou en tumawang yaku. Pakasa in tou tumela'uo yaku. Taan pangilekenku a si Casuruan wosama' ra'ica ukumen-Na séra.

Yakobus 1:19

Poo-poow sé icaupusku! Musti ta'néien iow in andumoro' sé anio': Sa awéan tou ang karoro'an imaroma' lingan owo em pakuana. Tioo taporak manuwu' wo tioo taporak mae'bow.