1 Korintus 13:2 - En Taar Weru a nunuwu' é Tontemboan

² Mandé ka'i aku tinambéranai ing kamang eng kumua in taar i Amang Kasuruan, makailek im pakasa sé paene-enep, makaanuo waya ing kakailekan, wo makaanu im paémanen lumeke-lekep e ro'na méra ing kuntung, taan sa aku ra'ica mengaupus sé tou walina, yaku uli-ulit ra'ica wana torona.

1 Korintus 13:2 ပူးပေါင်းရင်းမြစ်များ

Matius 13:11

Isowat i Yesus, “Si Amang Kasuruan imééo mai ing kamang tatambér ai camu e makailek in sususuien sé icaenepé' andumoro' ing Kakolanoan in Sorga, taan ai séra ra'ica.

Matius 17:20

Wo isowat i Yesus ai séra, “Kamu ra'ica makawoo musér si sétang itu ampa'paan kamu ra'ica mauli-ulit maéman. En ulitna icua-Ku mangé ai camu, sa kamu uli-ulit maéman, mandé em paémanen iow waya ka'i in sangatekic puté im batuna tumeki-tekic, kamu ro'na rumu'du' si kuntung anio', ‘Icaérao mangé!’, tantu eng kuntung itu icaéra oka. Anaé, pakasa ro'na émaan iow, sa kamu uli-ulit maéman. [

Matius 21:19

Wo an tembir in lalan sérén-Na awéan tuur in ara. Wo rurun-Na mangé e mengat im bua'na in ara itu, taan ra'ica kinéréan-Na, aluar in lalainake'. Wo icua-Na a si tuur itu, “Ico ra'io kawisa mua' akar ing kauré-uré!” Wo asi témpo ituke' en tuur in ara itu makala'us mapera.

Matius 21:21

Isowat i Yesus ai séra, “En ulitna icua-Ku mangé ai camu, sa kamu mercaya wo ra'ica marua-rua wasa, kamu ro'na iméma' tanu si niéma'-Ku asi tuur in ara itu. Wo ro'na ka'i peréntan iow si tolaina anio', ‘Icaangkaio wo icawangkilo mangé an ta'sic!’, tantu en itu mamuali oka.

Kisah Para Rasul 13:1

An jamaat Antiokhia, awéan piraan nabi wo awéan ka'i sé masusui in Taar i Amang Kasuruan. Séra itu si Barnabas, si Simeon si pengatuulen Wuring, si Lukius si tou Kirene, Menahem si pinewangko' mewali-wali wo si colano Herodes, wo ka'i si Saulus.

Roma 11:25

Poo-poow esa paémanen, icuaku ai camu sé icaenepé' wosama' kamu ra'ica matirayo. Si anioo em pawasan i Amang Kasuruan sé icaenepé' itu: Kelian sé tou Israel imamualio keté ro'kos taan séra mamuali taniitu ra'ica akar ing kauré-uré, taan akarke' i malekep eng kakelina é tou ra'ica Israel sé maéman a si Kristus sé aitantuo i Amang Kasuruan.

Roma 15:14

Poo-poowku an esa paémanen, uli-ulit percayanku sapaoka kamu iméma'o ing keli kalooran. Kamu ka'i kelio eng kakailekan andumoro' in sususuien i Amang Kasuruan, wo makawoo mensin-sina'uan si esa wo si esa.

Roma 16:25

Irayoo mangé si Amang Kasuruan! Siao e ro'na méma' im paémanen iow makaketer tanu en aituru' an Abar Kaaruien andumoro' i Yesus Kristus si pakua-kuaku. En Abar Kaaruien itu pengakuaku kiit in aituru' i Amang Kasuruan si paene-enep-Na tumo'tolai indior.

1 Korintus 11:4

Sa si esa tuama masombayang kuma'pa makua in taar i Amang Kasuruan an dior é tou keli wo makungkung in do'kos, sia suméroo si Kristus si capalana.

1 Korintus 12:28

An jamaat, awéan piraan tou sé aitantuo i Amang Kasuruan mamuali: kataré ruru'du'an, karua nabi, katelu guru. Wo ka'i winéanai kamang tatambér e maéma' sé kakaya'kaan, in sumama' sé tou, tumawang sé tou sé perlu tawangen, mamuali kikiiten wo ka'i maroma' a membam-balinaan nunuwu' i roh.

1 Korintus 13:1

Mandé ka'i aku ro'na maroma' ang karapi i membam-balinaan nunuwu' é tou wo ka'i nunuwu' é malaékat, taan sa aku ra'ica mengaupus sé tou walina, sé ipakuaku itu ra'ica wana torona, tanuoka téngéna in tambor wo in simbal taténgé keli.

1 Korintus 13:3

Wo mandé ka'i yéké- ékéku waya eng kasiyaanku a sé tou lengéi wo iwééku en owakku tunun, taan sa aku ra'ica wana upus a sé tou walina, pakasa en itu ra'ica wana torona a yaku.

1 Korintus 13:8

En upus itu awéan akar ing kauré-uré. Taan eng kamang tatambér e makua in taar i Amang Kasuruan icatala oka. Wo eng kamang tatambér maroma' i nunuwu' i roh catala oka. Wo sé kakailekan catala oka.

1 Korintus 14:29

Taniitu ka'i wo sé nabi, lébé loor wayake' in dua kuma'pa telu tou ai séra eng kumua in taar i Amang Kasuruan wo sé tou walina oka manilai sapa em ipakua éra itu.

1 Korintus 14:39

Ampa'paano in itu é poo-poowku, rumaméjio mauli-ulit wosama' kamu ro'na tambéranai ing kamang makua i nunuwu' i Amang Kasuruan, wo tioo pengapéron sé tou tinambéranai ing kamang maroma' i nunuwu' i roh.

1 Korintus 14:4

Si tou maroma' ang karapi i nunuwu' i Roh, sia itu asalo mawéé kaketeran in owakna in esa. Taan si tou makua in taar i Amang Kasuruan, sia itu mawéé kaketeran a sé jamaat.

1 Korintus 15:51

Wéé mio' sumama-sama' an dékén! Awéan sé icaenepé' en aicuaku ai camu: ra'ica pakasa icita e maté, taan en owakta im baya mawalina.

1 Korintus 16:22

Si tou ra'ica mengaupus si Apo' Yesus, sia itu tenan ing kutuk. Maranata!

1 Korintus 4:1

Poo-poow, anggapeno mai kami tou sé matawoi maselewirke' a si Kristus, sé tinokéan makua in abar andumoro' im pawasa-wasan i Amang Kasuruan en lumowir sé tou. Em pawasa-wa- san itu ra'ipé' kailekan é tou walina.

1 Korintus 7:19

Ampa'paan sinunat kuma'pa ra'ica sinunat sé rua itu ra'ica penting. Em penting sia makiit im perénta i Amang Kasuruan.

1 Korintus 8:4

Wo andumoro' ing kuman ing kakanen sé airagéso a sé opo-opo', kailekanta: sé opo-opo' ra'ica wana ang kayo'baan, wo si Amang Kasuruan wayake' in esa ra'ica wana walina.

2 Korintus 12:11

Yaku rumayoo in owakku in esa tanuoka sé tou bodok. Taan kamuo sé ilumesé' akar aku méma' tanu siitu. En ulitna icamuo si musti mengarayo yaku tanu siitu. Ampa'paan mandé ka'i aku anio' ipakua é tou ra'ica makailek in sapa-sapa, taan am baya-waya yaku ra'ica kaindoan é ruru'du'an wangko' itu.

Galatia 5:16

Si anioo em peangé-angénku: Kamu musti menonou kumiit ing kasalé'an i Roh Le'nas. Wo in taniitu kamu ra'ica menonou oka kumiit ing kasalé'an in owakmu in esa.

Galatia 5:22

Taan sé tou pakaakinen i Roh Le'nas, wuéna ing katouanna tanu sé anio': awéan upus, kaaruian, kaeluran, katalesenan, kasamaan in até, kalooran, kale'tekkan,

Galatia 6:3

Ampa'paan sa awéan tou mawerot en owakna in esa penting, taan en ulitna sia itu tou ra'ica penting, eng kaangéanna sia itumowoo an owakna in esa.

Efesus 3:4

Sa binacao miow si aipaticku itu, ro'nao kaangéan iow sapa sé kinailekankuo andumoro' im pawasa-wasan i Amang Kasuruan andumoro' i Kristus.

Efesus 6:19

Wo ipengasombayang angé ka'i aku, wosama' an tutuwku i rumoma' wéan i Amang Kasuruan aku nunuwu' isumoma, akar ra'io wana eng kaindé'anku ing kumua in Abar Kaaruien en andumoro' i Yesus Kristus. En Abar Kaaruien itu indior ra'ipé' aicua a sé pakasa en tou, taan intarépé' aicuao ai séra.

Kolose 1:26

En Taar-Na itu indior aicaenepé' asé im pakasa é tou maatu-atus ngata'un eng kauréna, taan intarépé' aipapaturu'o i Amang Kasuruan a sé tou le'nas.

1 Timotius 3:16

Indior en sususuien wutul itu ra'ica kailekan é tou, taan intarépé' sé icaenep andumoro' in sususuien wutul sé ra'io cakua itu, winuka'o i Amang Kasuruan. Sé icaenep itu tana'i: “Si Yesus imayo wo mamualio tou, wo aituru' i Roh Le'nas sapaoka Sia itu wutul. Sia mapaturu'o in owak-Na a sé malaékat, wo en sisisilen andumoro' Sia itu icaseraro a sé bangsa. Wo Sia émanen é pakasa ing kayo'baan, wo Sia niangkaio mangé an sorga ang karapi i rarayo wo in sisiri'.”

1 Yohanes 4:8

Taan si séi si ra'ica mengaupus, sia ra'ica makatuus si Amang Kasuruan ampa'paan si Amang Kasuruan ituo e makaanu in upus.