1 Korintus 10:23 - En Taar Weru a nunuwu' é Tontemboan

²³ Poo-poow, awéan sé tou makua in tana'i, “Sapake' sé icasalé'ta ro'na émaanta.” En itu wutul, taan ra'ica pakasa sé icasalé'ta itu awéan en torona. “Ro'na émaanta sapake' sé icasalé'ta” taan ra'ica pakasa sé icasalé'ta itu ro'na méé ing kaketeran in até é tou.

1 Korintus 10:23 ပူးပေါင်းရင်းမြစ်များ

Roma 14:15

Wo sa eng kakanen si paanggapen i poow iow an esa paémanen itu ra'ica toro kanen, wo kanen iow an diorna, en itu niéma'o miow sia sumakit en até. Eng kaangéanna, kamu ra'io menonou kumiit ing kaupusan. Anaé, tioo kamu maéma' im paémanen i poow iow an esa paémanen icasélé'kow ampa'paano ing kakanen iow, ampa'paan si Kristus matéo torona ka'i sia.

1 Korintus 14:12

Tanu siituo ka'i kamu in esa, kamu irumaméjio makéré ing kamang tatambér i Roh Le'nas. Taan eng kumataré-taré kamu musti rumaméji maké ing kamang tatambér itu e méé ing kaketeran im paémanen a sé jamaat.

1 Korintus 14:17

Mandé ka'i en sombayang makua i makapulu'sama' a si Amang Kasuruan sé aicua miow itu loor keli, taan sé pakua miow itu ra'ica méé kaketeran am paémanen éra ampa'paan sé pengakua miow ra'ica kaangéan éra.

1 Korintus 14:26

Anaé é poo-poow, sapa eng kaangéan im pakasa in itu? An tutuw iow mali'us mewali-wali i maapo', awéan sé tou makantar ing kakantaren marayo si Amang Kasuruan, awéan sé tou masusui, awéan sé tou makua i nunuwu' i Amang Kasuruan, awéan sé tou maroma' mapaké i nunuwu' i roh, wo awéan ka'i sé matutur ing kaangéan i nunuwu' i roh itu. Musti émaan iow pakasa en itu en sumusui wo torona ing kalooran iow im baya.

1 Korintus 6:12

Awéan tou an uner iow makua, “Sapa-sapake' ro'na émaanku.” Taan sa aku, ra'ica pakasa sé pengaémaan é tou awéan torona. Anaé, mandé ka'i aku ro'na méma' in sapake' mangé, taan ra'ica kiimku en owakku kawasan in sapake' mangé itu.

1 Korintus 8:1

Poo-poowku, intarépé' icasalé'ku icua ai camu andumoro' ing kakanen iparagés a sé opo-opo'. Awéan sé tou makua in tana'i: “Kita im baya sé maéman makaileko andumoro' in itu.” Eng kakailekan tanu siitu mengaéma' icamu makatirayo, taan en upus ro'na méé ing kaketeran a sé tou walina.

1 Korintus 8:9

Taan kamu musti mareti-reti. Mandé ka'i ro'na kanen iow sé ayumper itu ampa'paan papercayan iow en itu ra'ica mamuali soal, taan tioo tumawér sé tou walina sé ra'ipé' keter em paémanen eng kuman ing kakanen itu. Paweroten éra ang karapi ing kuman sé ayumper itu, séra iméma'o ing kamesé-meséaan.

2 Korintus 12:19

Ang kauré miow maca in surat anio', weroten réén miow sapaoka kami asalo méla in owak an dior iow? Ra'ica tanu siitu! Kailekan i Amang Kasuruan sapaoka pakasa sé ipakua ami itu makiit ing kasalé'an i Kristus. Poo-poow sé icaupusku, sapa sé niéma' ami, en itu e méé ing kaketeran am paémanen iow.

Efesus 4:29

Tioo awéan nunuwu' sé ra'ica loor kumesot am ba'ba' miow. Taan manuwu'o mangé i nunuwu' sé loor eng kumeter in até é tou walina an tutuw im paperlun éra. E nunuwu' tanu siitu méé oka ing kamang a sé tou sé mengalinga in itu.

1 Tesalonika 5:11

Ampa'paan in ituo, mensin-sina'uano mangé kamu wo sé tou walina wo mengkeng-keterano mangé in até an esa paémanen, kaputé im pengaémaan iow akar intarépé'.

1 Timotius 1:4

Wo icua mangé ka'i ai séra wosama' ra'io toro mengasisil in sisisilen sé asalo niéma' é tou wo sisisilen andumoro' é apo-apo' sé aipatic taloso lambot. Pakasa en itu asaloke' méma' ing kaperéndéran wo ra'ica tumawang sé tou kumiit ing kasalé'an i Amang Kasuruan e makéré ing kalowiran.