YEHEZKIEL 8:16 - Tanou Moonsoi Timugon

¹⁶ Ginio ra ibito' No aku ra liliut ralalom giu' ra Baloi ru Tuhan. Giu' no, mamaar ra kulobon subalan mongoi ra intok matulai, lolot ru altar am langgar, mokoondo' olo'-olo' ruo ngoopor am limo ngaulun ungkuyon. Tinalikuran nilo intok matulai no am kiminuku' ra tampilon sirangon koson sumamba ra mato ru orou ondo' sumirang.

YEHEZKIEL 8:16 ပူးပေါင်းရင်းမြစ်များ

1 RAJA'-RAJA' 8:29

Sindungi' noyo Baloi ti orou am rondom, intok ondo' pinili' Muno koson ra intok sambayangan Rirun. Rongogo' noyo aku paat ra aku tumingkuang ra intok ti am makiasi' Rirun.

2 RAJA'-RAJA' 16:14

Altar gangsa' ondo' patimpokon ra Tuhan pinabanta' ra lolot ru altar bagu no am Baloi ru Tuhan. Ginio ra binandingan ru Raja' Agas altar gangsa' no ra tampilon ralayo ru altar bagu no.

2 RAJA'-RAJA' 21:5

Giu' ra ruo liliut ra Baloi ru Tuhan, Raja' Manasi niayuk nambaal ra altar-altar koson intok sumamba ra bibiag-bibiag.

2 RAJA'-RAJA' 23:11

Namatir niayuk Raja' Josia ra ngaangai' kuda ondo' timpokon ra raja'-raja' ru Jiuda koson sumamba ra mato ru orou. Nonolob io ra ngaangai' kurita' kuda ondo' pakayon koson sumamba ra mato ru orou. (Kuliamos-kuliamos raginio binulian giu' ra liliut Baloi ru Tuhan, mamaar ra kulobon garabang, kalo maalur intor ra intok inayanan ri Natan Milik, sangulun pagawai maatang.)

2 RAJA'-RAJA' 23:5

Pinolonggo' ru Raja' Josia no ngaangai' imam ondo' linantik ru raja'-raja' Jiuda koson mampataak ra taak simbalui giu' ra altar-altar ru dewa giu' ra bandar-bandar Jiuda, am giu' ra intok-intok giu' ra liliut ru Jirusalim. Ngaangai' ru imam no nampataak ra taak simbalui ra Baal, mato ru orou, bulan, planit, am butitin-butitin.

2 TUNUNG RU BANSA' ISRAIL 29:6

Kinamatuaan takali kalo giminagaya' ra Tuhan, i Aki Kapuuno' takau. Binaal nilo atan ondo' kalo kasagain Nano. Inimpayan nilo Io am kalo nampalio ra intok ayanan Nano.

2 TUNUNG RU BANSA' ISRAIL 7:7

Patimpokon ru Raja' Salomo tampilon ra tatanga' ru liliut, iono giu' ra intok tampilon ra saang ru Baloi ru Tuhan. Giu' no nampataak io ra taak simbalui koson mapabansuk ra guang ru Tuhan, taak simbalui kaunaran, am lomok ru bibiag intor ra taak simbalui koson makibarakat ra Tuhan. Nampataak raja' ra ngaangai' no ra giu' no sabap ra altar gangsa' ondo' binaal nano boborok kaga' koson ra ngaangai' ru taak simbalui no.

JIRIMIA 2:27

Ngaangai' kau tauyuon. Akau no minindagu ra rondo' puun tataun koson ra ama' min am rondo' bulur koson ra ina' min. Baal ragitio masauk sabap ra nangiruan kau Raki' am kalo minatong Raki'. Kaa' paat ra akau makakapaganan, piawon min Aku koson mamayag ramuyun.

JIRIMIA 32:33

Nangiruan ilo Raki' kabalu' pana narayus Aku nangila' risilo, marara' ilo mangkirongog am marara' mangapu ra pangilaan.

JIRIMIA 44:17

Mambaal akai ra ngaangai' baal ondo' raguon mai. Mampataak akai ra taak simbalui ra dewi mai, Raja' Ruandu' ru Suruga'. Mampataak akai ra wain riso, koson ramon, kinamatuaan maili, raja' mai, am tingganai-tingganai mai maindalom mambaal raginio giu' ra bandar-bandar Jiuda am giu' ra ralan-ralan ru Jirusalim. Paat raginio mokoondo' akai ra masuang akanon; langkaya' akai am kalo mapagon.

JIRIMIA 7:18

Lalaing-lalaing nanimung ra luton, ungkuyon nampaang ra apui, am ruandu' nangutou ra tapung koson baalon ra kuui ra dewi ondo' ininggalanan nilo koson ra Raja' Ruandu' ru Suruga'. Nampataak ilo niayuk ra wain ra tuhan-tuhan ra bokon koson mapakaruol ra guang Kuno.

JIRIMIA 8:2

Kuayan no sala' ka timungon am lobongon poyo, kaa' koson polosoon ra tana' koson ra pampalabung. Bungul-bungul nilo makulipatak ra matuug ru sinda mato ru orou, sila' am butitin ondo' tagamin, intok mangandoi ayuk, sambaan am pakituluan nilo.

YEHEZKIEL 10:3

Paat ra io sumubol, kirub-kirub no tatanga' migor giu' ra tampilon rabugus ra Baloi ru Tuhan, am liliut ra ralalom natikop ra gaun.

YEHEZKIEL 11:1

Ambiluo ri Aki Kapuuno' nangkayang raki' am nagibit raki' ra kulobon garabang sirangon ra Baloi ru Tuhan. Giu' no nakakito aku ra ruo ngoopor am limo ngaulun ungkuyon nakaaya' i Jaajanya anak ri Ajur am i Pilatia anak ri Binaya, ruo ngaulun tingganai ru bansa'.

YEHEZKIEL 23:35

Gitio noyo ragu ru Tuhan Raja', “Sabap ra nakalilian kono Raki' am niayuk nanalikur Raki', mansaan kou ra kaimbalaan kinibit ru guang malaai am kandoi mantalan ra inan muno.”

YEHEZKIEL 23:39

Namatoi ilo ra anak-anak Kuno koson pataakon koson ra taak simbalui ra sinungkalalaing, am paat ra orou raginio niayuk minatong ilo ra Baloi Kuno am jinamalan!

YEHEZKIEL 40:28

Kopongo raginio, nagibit ungkuyon no raki' siminubol ra liliut ralalom nansail ra kulobon garabang rabugus. Nanuku' io ra kulobon garabang no, am gayo no nogondo' ra gayo ru kulobon-kulobon garabang giu' ra tampilon ra liwar.

YEHEZKIEL 40:6

Kopongo raginio minongoi io ra kulobon garabang tumingkuang ra sirangon. Nagaloi io ra tukar ru kulobon garabang, am giu' ra rasawat ru tukar no nanuku' io ra tataun ru kulobon, pila' nano 3 ngamito.

YEHEZKIEL 43:5

Nangkayang Ambiluo ru Tuhan raki' am nagibit raki' ra liliut ralalom. Giu' no nakakito aku ra Baloi ru Tuhan natikop ra sinda katulayan ru Tuhan.

YEHEZKIEL 43:8

Raja'-raja' nilo nambaal ra tataun pangiing am lugu' ru kulobon ra istana nilo giu' ra kiing ru kulobon am lugu' ru kulobon ra Baloi Kuno, saboi rondo' ayuk timbok nokololot risilo intor Raki'. Jinamalan nilo inggalan Kuno ondo' matulai ra ngaangai' binaal nilo ondo' makauyuyu'. Ginio ra namuso Aku risilo sabap ra siminangit Aku kaga'.

YEHEZKIEL 45:19

Imam pana musiti' mangalap ra raraa' intor ra taak simbalui koson mangampun ra tula no, am papiiron boo ginio ra lugu'-lugu' kulobon Baloi ru Tuhan, kaapat-apat pisuk ru altar, am lugu'-lugu' ru kulobon garabang ondo' mongoi ra liliut ralalom.

YEHEZKIEL 46:1

Indagu Tuhan Raja', “Kulobon garabang sirangon ondo' tumingkuang ra liliut ralalom musiti' angabin buoi onom ngoorou mangandoi. Kaa' paat ra orou Sabat am Pangiantakan Sila' Bagu, kulobon garabang no musiti' ukabin.

YEHEZKIEL 7:23

Titikop pagun mataliajou; pagun natikop ra pampatayan, am bandar-bandar nototop ra kalaatan.

YEHEZKIEL 8:15

Pangkuot Io, “Okou ulun mapandai matoi, nakakito kou kia raginio? Makakito kou poyo ra baal-baal ondo' makauyuyu' poyo.”

JOIL 2:17

Imam-imam ondo' mangandoi ayuk ra Tuhan giu' ra lolot ru altar am langgar ra tingganai Baloi ru Tuhan, musiti' mantangi' am makiasi' koson ragitio, “Pakaasi' no ra ulun Muno, iou Tuhan. Pai' polosoo' bansa' ra bokon magasab am mangiis ramon am mindagu, ‘Ati kia i Aki Kapuuno' min?’ ”

SAGULION 17:3

am niayuk susuban ru Tuhan sabap ra ilo siminamba am nangandoi ra tuhan-tuhan ra bokon, kapoam ra mato ru orou, kapoam ra sila', kapoam ra bibiag-bibiag.

SAGULION 4:19

Pai' kaambi' koson sumamba am mangandoi ra ondo' makito giu' ra limbowon, iono mato ru orou, sila' am butitin. Nanaak noyo Tuhan, Aki Kapuuno' mino ra kuliamos raginilo ra ngaangai' bansa' ra bokon ra sambaan.