YEHEZKIEL 5:12 - Tanou Moonsoi Timugon

¹² Sampitalu ra mamagun muno matoi sabap ra maruol am bitilan giu' ra ralalom ru bandar, sampitalu matoi motobok ru ilang giu' ra liwar bandar, am sampitalu poyo pantutuliaron Ku ra ngaangai' intok am ilowon Ku ra ilang.

YEHEZKIEL 5:12 ပူးပေါင်းရင်းမြစ်များ

JISAYA 1:24

Ginio ra, ragino rongogo' noyo Tuhan Ondo' Maayo Kaga' Kuasa', i Aki Kapuuno' ru Israil mindagu, “Pantula' Kuno, balasin Takamin. Akau pana kalo boo mantipagon Raki'.

JIRIMIA 13:24

Pantutuliaron kau ru Tuhan koson ra rami ondo' siabin ru angin intor ra tana' kaagisan.

JIRIMIA 14:12

Kabalu' pana mampali ilo, marara' Aku mampalio ra golok nilo ra makiindangan; am kabalu' pana mampataak ilo ra taak simbalui koson mapabansuk ra guang Kuno am taak simbalui koson paringkuanangan Raki', kalo maansayan Aku risilo. Kaa' pusoon Ku ilo ra pangayawan, bitilan am maruol tumapik.”

JIRIMIA 15:2

Amon ru mangkuot ilo rirun ra intok musiti' ilo mongoi, taamo' koson ragitio, ‘Indagu Tuhan, ulun ondo' inaru' matoi sabap ra maruol, polosoon noyo ilo matoi sabap ra maruol! Ulun ondo' inaru' matoi ralalom pangayawan, polosoon noyo ilo matoi ralalom pangayawan! Ulun ondo' inaru' ra matoi sabap ra bitilan, polosoon noyo ilo matoi ra bitilan! Ulun ondo' inaru' masauk ra ulun rinakop, polosoon noyo ilo auton koson ra ulun rinakop!’

JIRIMIA 15:9

Ina' ondo' napusaan ra tulu' ngaulun anak nano ikab-ikab am malausan, koson riso mato ru orou nokotolop noyo buoi ru matawang; inasaban io am tinauyu'. Manusub Aku ra pantula' min mamatoi ra ulun ondo' lakat poyo naayag ra gino ngai' min. Aku, Tuhan nakaindagu noyo.”

JIRIMIA 21:9

Moonong ulun ondo' mayan giu' ra ralalom ru bandar matoi sabap ra pangayawan kapoam bitilan kapoam maruol tumapik. Kaa' mingkual ilo koson makirakop ra ulun Babilonia ondo' tatanga' mamulunsar ra bandar ti maayag am kalo potoyon.

JIRIMIA 24:10

Mamparatong Aku ra pangayawan, bitilan, maruol tumapik risilo saboi ra ngaangai' nilo matoi, am kolondo' ulun ondo' matatang ra pagun ondo' tinaakan Ku risilo am kinamatuaan nilo.”

JIRIMIA 42:22

Ginio ra karaa' noyo: matoi kau ralalom pangayawan, kapoam sabap ra bitilan, kapoam maruol tumapik ra pagun ondo' kasagaan min mayan.”

JIRIMIA 44:27

Tutunon Ku maa' raginio kalo makasugut kau; maaru' mapuso kau. Akau ngaangai' matoi, ralalom ru pangayawan kapoam sabap ra maruol tumapik, saboi kolondo' sangulun pana ramuyun maayag.

JIRIMIA 9:15

Ginio ra rongogo' noyo ondo' baalon Kuno, Tuhan Ondo' Maayo Kaga' Kuasa', i Aki Kapuuno' ru Israil: Mangani' Aku ra ulun Kuno ra tutuu' mapait koson akanon am tuuwo koson inumon.

JIRIMIA 9:16

Pantutuliaron Ku ilo ra bansa'-bansa' ondo' kalo nauligan nilo kapoam kinamatuaan nilai. Mangator Aku ra saujor koson mamulunsar risilo saboi ra Aku mamuso risilo ra malingon.”

YEHEZKIEL 12:14

Ngaangai' ulun giu' ra istana nano pantutuliaron Ku, ulun-ulun mambibilin am ulun magalung ayuk riso. Ilowon am potoyon Ku ilo.

YEHEZKIEL 14:17

“Kapoam maaru' lair porotongon Ku pangayawan ra pagun ti am mangator ra kinandoi koson mamuso ra ulun am poyo bibiag.

YEHEZKIEL 14:19

Amon ru porotongon Ku maruol tumapik ra pagun ti, ulun am poyo bibiag matoi sabap ra Aku sumangit.

YEHEZKIEL 14:21

Gitio noyo ragu ru Tuhan Raja', “Porotongon Ku apat ukuman ondo' moporos kaga' ra Jirusalim koson mamuso ra ulun am poyo bibiag. Ukuman no pangayawan, bitilan, bibiag masigo am maruol tumapik.

YEHEZKIEL 16:42

Aku pana mokororo' am sangit Kuno sumalui. Kalo boo sumangit kapoam maingot Aku.

YEHEZKIEL 21:22

Panah ondo' makatatandu' ra ‘Jirusalim’ butuson ru kalindu' pamiris nano. Baal ragitio makaarati' ra raja' musiti' manuntur ra tataun-tataun panukul giu' ra kulobon garabang, mambaal ra rinding masawat ru pagawangan am mangkali ra parit-parit.

YEHEZKIEL 24:13

Okou Jirusalim, jinamol kou ru binaal muno ra mantalan ra inan. Kabalu' pana kuminam Aku mampapasau rirun, kaa' magulayun kou majamol. Kalo mapasau kou saguli' saboi ra okou makaliman ra ngaangai' kinoporos ru sangit Kuno.

YEHEZKIEL 33:27

“Posoboyo' ragu pampakaraan intor Raki', Tuhan Raja' risilo. Sabap ra Aku, i Aki Kapuuno' ondo' naayag, ulun ondo' minayan giu' ra intok nalunsai ra bandar-bandar no potoyon. Ilo ondo' minayan giu' ra kampung akanon ru bibiag masigo. Ilo ondo' nansibuni giu' ra gunung am giu' ra luang batu matoi sabap ra maruol tumapik.

YEHEZKIEL 36:19

Ukumin Ku ilo nogondo' koson ra baal ru kaayagan nilo am paliso nilo, am pantutuliaron Ku boo ilo giu' ra pagun-pagun ra bokon.

YEHEZKIEL 43:8

Raja'-raja' nilo nambaal ra tataun pangiing am lugu' ru kulobon ra istana nilo giu' ra kiing ru kulobon am lugu' ru kulobon ra Baloi Kuno, saboi rondo' ayuk timbok nokololot risilo intor Raki'. Jinamalan nilo inggalan Kuno ondo' matulai ra ngaangai' binaal nilo ondo' makauyuyu'. Ginio ra namuso Aku risilo sabap ra siminangit Aku kaga'.

YEHEZKIEL 5:10

Kinibit nano, giu' ra Jirusalim, matuo mangakan ra anak nilo, am anak mangakan ra matuo nilo. Mangukum Aku rirun am mampatutuliar ra osoi ayuk ondo' lakat poyo maayag ra ngaangai' intok.

YEHEZKIEL 5:17

Porotongon Ku maruol tumapik, pampatayan am pangayawan koson mamatoi ra mamagun muno. Porotongon Ku bitilan am niayuk bibiag masigo koson mamatoi ra anak-anak nilo. Aku, Tuhan nakaindagu noyo.”

YEHEZKIEL 5:2

Solobo' sampitalu ra abuk no giu' ra ralalom ru bandar mopongo' pagawangan maampus. Ondo' sampitalu poyo musiti' totokon mu ra ilang muno liliwa' lumiput ra bandar no. Sampitalu ondo' pupus musiti' pasiabon mu, am ilowon Ku ginio ra ilang Kuno.

YEHEZKIEL 6:8

Polosoon Ku santayaran intor risilo makalabus intor ra pamatayan no, am pantutuliaron giu' ra pagun-pagun ra bokon.

YEHEZKIEL 7:15

Ulun mantutula' giu' ra ralan, ulun marualan am maitilan giu' ra ralalom ru baloi. Osoi ayuk ondo' soroi giu' ra liwar ru bandar matoi sabap ra pangayawan, am osoi ayuk ondo' soroi giu' ra ralalom ru bandar matiu' ra maruol am maitilan.

YEHEZKIEL 7:3

Okou Israil, raino nasaboi noyo kapusaan muno! Makaliman kou ra poros ru sangit Kuno, sabap ra mangakim Aku ra binaal muno. Mambalos Aku ra paliso muno ondo' makauyuyu' no.

IMAMAT 26:33

Porotongon Ku pangayawan giu' ra pagun mino, am mantutuliar kau giu' ra pagun ru ulun bokon. Makai' kalunsai bandar mino am mokoloso pagun mino.

AMOS 9:4

Amon ru ibiton ilo ru pantula' giu' ra pamatiran, manusub Aku maa' raginio potoyon ilo. Totopot Ku potoyon ilo, am kalo mangindangan risilo.”

AMOS 9:9

Manusub Aku, am atapin Ku ulun ru Israil koson ra ulun mangatap ra gandum ra atapan. Atapin Ku ilo ra gino ngai' ru bansa' koson mamatir ra ngaangai' ondo' kolondo' onong.

JAKARIA 7:14

Koson ra bagiu' mapuor, kinuliagai Ku ilo saboi ilo minayan kalalaat giu' ra pagun ra bokon. Tana' ondo' malabung ti nasauk ra mapua', masiluk kaga', am kolondo' ulun minayan.”

SAGULION 28:65

Ra gino ngai' ru bansa'-bansa', kalo makaalap kau ra kamiaan am kolondo' intok ondo' maalap min kasabit ra akau tatangan; Tuhan mangkinibit ramuyun magalabo, malawo guang am malaa'.

PINAINTALANG 6:8

Kakito ku sanginan kuda ondo' mabula' am ondo' siminakoi no ininggalanan ra ‘Patayan ’ am minitut riso no Nabalu, ioginio intok ru ulun-ulun namagatoi. Inanian ilo ra kuasa' koson mampatoi ra sampiapat ulun ru tana' ti ra pangayawan, bitilan, tiranga' am saamon ru bibiag masigo.