YEHEZKIEL 40:38 - Tanou Moonsoi Timugon

³⁸ Giu' ra liliut ra liwar mokoondo' rondo' lamin pinatambil giu' ra tampilon ralalom ru kulobon garabang ralayo. Lamin ra pinatambil no mokoondo' rondo' kulobon ondo' mongoi ra tampilon ra tingganai ondo' tumingkuang ra liliut ra liwar. Giu' no pambaguan ru ulun ra bibiag ondo' sinimbalui koson ra taak simbalui mapabansuk ra guang ru Tuhan.

YEHEZKIEL 40:38 ပူးပေါင်းရင်းမြစ်များ

2 TUNUNG RU BANSA' ISRAIL 4:6

Nambaal ilo niayuk ra mopor bisin: limo koson pinabanta' ra tampilon rabugus ra Baloi ru Tuhan, limo poyo pinabanta' tampilon ralayo. Bisin-bisin no pinakai koson mambagu' ra tinata' ra bibiag ondo' solobon koson ra taak simbalui. Timug ralalom ru tangki' maayo no pakayon ru imam-imam koson mambagu' ra inan.

IBRANI 10:22

Intor raginio, pagindagu takau no ri Aki Kapuuno' mabaya' ra guang mabanis am pangintapatan maikang; mabaya' ra guang kolondo' sala am pampariwan ondo' mampakito ra itakau mapasau noyo.

YEHEZKIEL 42:13

Indagu ungkuyon no raki', “Karuruo baloi maayo no mapasau. Giti noyo intok ru imam-imam tumingkuang ra Tuhan mangakan ra taak ondo' matulai kaga'. Ginio sabap ra lamin-lamin no matulai, pabantaan ru imam-imam taak ondo' matulai kaga' ra giu' no: taak simbalui koson paringkuanangan ra Tuhan, taak simbalui koson makiampun ra tula, am taak simbalui koson mambayar ra kalubatan.

YEHEZKIEL 40:17

Nagibit ungkuyon no raki' nansail ra kulobon garabang minongoi ra liliut ra Baloi ru Tuhan. Giu' ra igig ru timbok ra liwar giu' ra liput ra Baloi ru Tuhan no binaal talu ngoopor ngalamin. Giu' ra saang ru lamin-lamin no mokoondo' intok inanian ra batu,

YEHEZKIEL 40:12

Giu' ra saang ru moonong lamin ru ulun magalung no mokoondo' ra timbok ondo' magana'; sawat no 0.5 ngamito, am kapal no 0.5 ngamito niayuk. Ngaangai' ru lamin no 3 ngamito gayo no.

1 RAJA'-RAJA' 6:8

Kulobon tampilon ra tingkat kasaa' ru lamin pinasambil no binaal ra tampilon rabugus ru Baloi ru Tuhan, am tingkat-tingkat no pinatunggul ra tukar.

IMAMAT 1:9

Ulun no musiti' mambagu' ra kalabuat am paa ru sapi' no, am ngaangai' taak simbalui no musiti' solobon ru imam ondo' mangandoi no ra rasawat ru altar. Owou ru taak ra akanon no mapabansuk ra guang ru Tuhan.

1 TUNUNG RU BANSA' ISRAIL 28:12

Nampataak Raja' Daut ri Salomo ra ngaangai' pelan ondo' ginuang nano, iono pelan ru liliut-liliut am lamin-lamin ra liliut nano, am pelan ru gudang-gudang ru kuliamos ru Baloi ru Tuhan, am niayuk pelan ru gudang-gudang pambulian ra ondo' pinataak ra Tuhan.

NIGIMIA 13:5

Nangiou i Ilyasib ri Tobia mamakai ra rondo' lamin maayo, ondo' sotopot no alapon ayuk koson pambulian ra papataakan unor-unor am kaminyan, kuliamos ondo' pakayon giu' ra Baloi ru Tuhan, papataakan tayar ru imam, papataakan sampiopor intor ra unor-unor, wain am umau jaitun tayar ra ulun ru Liwi, ulun mangkukuli ra miujik giu' ra Baloi ru Tuhan am ulun magalung ra Baloi ru Tuhan.

NIGIMIA 13:9

Aku pana nanusub boo maa' raginio upacara pamasawan baalon tayar ru lamin-lamin no. Kopongo raginio nanusub aku ra ulun nampasaguli' ra ngaangai' kuliamos Baloi ru Tuhan, taak ra unor-unor am kaminyan ra lamin-lamin no.

JIRIMIA 35:4

am ongoi ra Baloi ru Tuhan. Inibit ku ilo ra lamin ru maamaya' ru Nabi Ganan anak ri Jigdalya. Lamin no giu' ra rasawat ru lamin ri Maasiya anak ri Salum, sangulun pagawai masawat giu' ra Baloi ru Tuhan. Lamin no niayuk mamaar ra lamin ru pagawai-pagawai ra bokon.

JIRIMIA 36:10

Liliwa' ru ngaangai' ulun mangkirongog, i Baruk pana nambasa' boo ra naskhah rinulun ondo' mokoondo' ra ngaangai' ondo' rinagu kuli. Binasa' no ginio giu' ra Baloi ru Tuhan, giu' ra lamin ri Gimarya anak ri Sapan, mamamatik ru pagun. Lamin nano giu' ra liliut tampilon rasawat, mamaar ra Kulobon Garabang Bagu giu' ra Baloi ru Tuhan.

YEHEZKIEL 40:44

Ungkuyon no pana nagibit boo raki' ra liliut ralalom. Giu' no mokoondo' ruo lamin, rondo' ra kiing ru kulobon garabang ralayo am tumingkuang ra rabugus, am rondo' poyo giu' ra kiing ru kulobon garabang rabugus am tumingkuang ra ralayo.

YEHEZKIEL 40:45

Nambala' io raki' ra lamin ondo' tumingkuang ra rabugus tinampos ra tayar ru imam-imam ondo' mangandoi giu' ra Baloi ru Tuhan,

YEHEZKIEL 40:46

am lamin ondo' tumingkuang ra ralayo tinampos ra tayar ru imam-imam ondo' mangandoi giu' ra altar. Ngaangai' ru imam no papag ri Jadok. Intor ilo ra bansa' ru Liwi am ilo ayuk ondo' iowon muma' ra Tuhan koson mangandoi Riso.

IMAMAT 1:13

Musiti' ulun no mambagu' ra kalabuat am paa ru bibiag no. Musiti' imam-imam boo mapataak ra ngaangai' taak simbalui no ra Tuhan, am niayuk ngaangai' no solobon ra rasawat ru altar. Owou ru taak ra akanon no mapabansuk ra guang ru Tuhan.