UNTABAN 3:40 - Tanou Moonsoi Timugon

^40-41 Indagu Tuhan ri Musa, “Ngaangai' anak ungkuyon ru Israil Aku tatangan. Ginio ra parijistoo' inggalan ru moonong anak ungkuyon katuaan ru Israil ondo' umur sansila' am nakasail. Kaa' koson suali nilo, mangalap Aku ra ngaangai' ulun ru Liwi ra Aku tatangan. Aku noyo Tuhan. Mangalap Aku niayuk ra bibiag tinambiag ru ulun ru Liwi koson suali ru ngaangai' anak katuaan ru bibiag tinambiag ru ulun ru Israil.”

UNTABAN 3:40 ပူးပေါင်းရင်းမြစ်များ

MAZMUR 87:6

Pasubolon ru Tuhan ngaangai' ru bansa', ralalom pamatikan ra mamagun ru Jirusalim.

JISAYA 4:3

Moonong ulun natatang ra Jirusalim, ioginio ulun ondo' pinili' ri Aki Kapuuno' maa' raginio maayag ilo, am piawon ra matulai.

UNTABAN 3:12

“Raino ulun ru Liwi masauk ra Aku tatangan. Paat ra Aku namatoi ra ngaangai' anak ungkuyon katuaan ru ulun ru Misir, patimpokon Kuno noyo ngaangai' anak ungkuyon katuaan sasambaloi ru Israil masauk ra Aku galama' tatangan, am niayuk moonong anak ungkuyon katuaan ru bibiag tinambiag. Kaa' raino alapon Ku ulun ru Liwi masauk ra Aku tatangan koson suali ra ngaangai' anak ungkuyon katuaan ru Israil; ulun ru Liwi masauk ra Aku tatangan. Aku noyo Tuhan.”

UNTABAN 3:15

koson maparijisto ra ulun ru Liwi sumugut ra bansa' am sasambaloi ru sigagama'; inggalan ru moonong anak ungkuyon ondo' umur sansila' am nakasail musiti' parijistoon.

UNTABAN 3:45

“Raino patimpokon ulun ru Liwi masauk ra Aku tatangan koson suali ru ngaangai' anak ungkuyon ru bibiag tinambiag ru ulun ru Israil.

LUKAS 10:20

Kaa' kabalu' pana koson raginio, pai' kau pakaansuk sabap ra riwato-riwato gumagaya' ramuyun, kaa' pakaansuk kano sabap ra inggalan mino tinulisan noyo ra suruga'.”

PILIPI 4:3

Am okou niayuk Sunsugos, rangan kuno mangandoi, bilin ku rirun ra indangano' noyo ruandu' ragitilo mobonsoi saguli'. Sabap ra ilo ti mapirot toojo nangindangan raki' mampabala' ra Tanou Moonsoi; koson niayuk ra indangano' poyo i Kilimin am ngaangai' ondo' nangandoi nabaya' raki'. Inggalan nilai ti nakatulis noyo ra kitab ru Ulun Mokoowot ra Kaayagan Motopot.

2 TIMOTIUS 2:19

Kaa' ondo' binaal ri Aki Kapuuno' no ra guang ru ulun Nano kalo maalap kauyog. Am minindagu Io noyo, “Tuhan makaulig ra osoi ulun Nano,” am poyo ra, “Osoi ayuk mangiou ra io ulun ru Tuhan, musiti' io tumalikur intor ra kasalaan nano.”

IBRANI 12:23

Nakasaang kau noyo ra bunsag maayo mabaya' ra anak-anak katuaan ri Aki Kapuuno', ondo' inggalan nilono tinulisan noyo giu' ra suruga'. Mininggaar kau ri Aki Kapuuno' ondo' mangakim ra ngaangai' ulun, am poyo ra ambiluo-ambiluo ru ulun motopot ondo' tinanda' ri Aki Kapuuno'.

PINAINTALANG 14:4

Ilo ti ungkuyon ondo' kalo igondo' siminamba ra tuhan ra bokon. Ilo ti ungkuyon mapasau toojo ondo' kalo igondo' lampit ra ruandu'. Mapasau ilo mogondo' ra ralaa. Ilo ti sumunu' ayuk ra Anak Domba no ra ati ayuk angayan Nano. Binayag ilo intor ra ngaangai' ulun koson ilo ti kasaa' pataakin ri Aki Kapuuno' am ra Anak Domba.

PINAINTALANG 3:5

“Osoi ayuk mangala ra kuasa' ru kalaatan pambayangon Ku ilo ra mapulak, am kalo luluon Ku inggalan nilono intor ra kitab ru Ulun Mokoowot ra Kaayagan Motopot. Giu' ra saang ri Ama' Kuno am ra malaikat-malaikat Nano, iowon Ku ilo ti maamaya' Kuno.