am moonong ra taak simbalui solobon koson ra Tuhan paat ra orou Sabat, paat ra pangiantakan ra Sila' Bagu, am paat ra pangiantakan-pangiantakan ra bokon. Suang ru ulun ru Liwi ondo' musiti' mangandoi ra moonong igondo', niayuk mokoondo' ra aturan no. Ulun ru Liwi musiti' mampaugar ra kandoi no ra sabubuoi no.
UNTABAN 28:1
17 ပူးပေါင်းရင်းမြစ်များ
Masaga' aku mambaal ra rondo' baloi sambayangan koson mangurumat ra Tuhan, i Aki Kapuuno' kuno. Baloi no masauk ra intok matulai, intok ru mamagun am aku galama' sumamba ra Tuhan am monolob ra kaminyan ondo' maamis owou; giu' no aku am mamagun kuno magail mampataak ra ruti' ondo' mapasau am niayuk taak simbalui koson mapabansuk ra guang ru Tuhan ra moonong susuab ti am mai' ti, paat ra orou-orou Sabat, paat ra pangiantakan ru Sila' Bagu, am paat ra pangiantakan ra bokon no. Aku am mamagun kuno masaga' mangurumat ra Tuhan, i Aki Kapuuno' mai. Namarinta Io ra ulun ru Israil am nambaal raginio ra sabubuoi no.
Pinangandoi ri Joyada imam-imam am ulun-ulun ru Liwi koson manalingapu ra kandoi giu' ra Baloi ru Tuhan sumugut ra pantayaran ra kandoi ondo' inaru' noyo ru Raja' Daut. Musiti' ilo mampataak ra taak simbalui koson mapabansuk ra guang ru Tuhan sumugut ra Ukum ri Musa. Ilo niayuk pinangandoi manalingapu ra miujik am pangiantakan.
Intor ra bibiag tinambiag nano galama', Raja' Gijkia nangani' ra bibiag ondo' makapakuan ra tayar ru taak simbalui koson mapabansuk ra guang ru Tuhan ondo' pinataak paat ra moonong susuab ti am mamai' ti, paat ra orou Sabat, Pangiantakan ra Sila' Bagu, am niayuk paat ra pangiantakan-pangiantakan ra bokon ondo' inaru' giu' ra ralalom ru Ukum ru Tuhan.
Nampataak io ra taak simbalui koson mapabansuk ra guang ru Tuhan sumugut ra kaulayan ru Ukum ri Musa ra moonong pangiantakan ondo' inaru': orou Sabat, Pangiantakan ra Sila' Bagu, am talu poyo pangiantakan ru kabilaran, iono Pangiantakan ra Ruti' Kalo Linatakan ra Ragi, Pangiantakan Mangkumos am Pangiantakan Mangkalukub ra Raun.
Paatangon mai kalalair kuliamos pakayon ragitio koson sambayang giu' ra Baloi ru Tuhan: ruti' pasulungon, taak simbalui moonong orou, iono taak simbalui ra paringkuanangan am bibiag tinambiag ondo' taak simbalui koson mapabansuk ra guang ru Tuhan, am niayuk taak mapasau paat ra orou Sabat, Pangiantakan Sila' Bagu, am niayuk pangiantakan ra bokon, taak-taak mapasau ra bokon, taak-taak simbalui ondo' mangampun ra tula ru Israil, am atan ayuk ondo' makapakuan ra Baloi ru Tuhan.
Kaa' paat ra pangiantakan ra sila' bagu, am orou Sabat, am orou pangiantakan ra bokon, ulun manguasa' lansanin manampos ra bibiag koson pataakon koson ra taak simbalui, am niayuk taak simbalui koson paringkuanangan Raki'; am niayuk taak simbalui wain ra tayar ru ngaangai' bansa' ru Israil. Io no lansanin manampos ra taak simbalui koson mangampun ra tula, taak simbalui koson paringkuanangan Raki', taak simbalui koson mapabansuk ra guang Kuno, am taak simbalui koson makibarakat Raki'. Aku pana mangampun boo ra tula ru ulun ru Israil.”
Paat ra orou-orou bunsagan am pangiantakan, unor-unor suang 17.5 ngalito musiti' pataakon pabayaan ra moonong sapi' gawayan kapoam domba gawayan. Ulun ondo' sumambayang iowon mampataak ra unor-unor ra suang ru kasagaan nano mabaya' ra moonong sanginan anak domba. Moonong 17.5 ngalito unor-unor musiti' pabayaan ra 3 ngalito umau jaitun.
ကြော်ငြာတွေ