UNTABAN 18:7 - Tanou Moonsoi Timugon

⁷ Kaa' okou am anak-anak ungkuyon muno ayuk pambaalon ra ngaangai' kandoi toojo ru imam ondo' makakulawit ra altar am atan pana ondo' giu' ralalom ru Lamin Matulai Kaga'. Ngaangai' baal raginio pinakandayan rirun, sabap ra nanaak Aku noyo rirun ra kandoi ru imam. Osoi ayuk ondo' kolondo' kuasa' mapaugar ra kandoi raginio ukumin ra matoi paat minggaar ra kuliamos-kuliamos mapasau.”

UNTABAN 18:7 ပူးပေါင်းရင်းမြစ်များ

MAZMUR 115:10

Pangintopot no ra Tuhan, akau imam ri Aki Kapuuno'. Io no mangindangan am manindung ramuyun.

KAINGKUALAN 28:1

“Piawo' noyo maayo muno i Arun am anak ungkuyon nano i Nadab, Abigu, Iliajar am i Itamar. Timpokon ilo intor ra popolos ulun ru Israil, maa' raginio mangandoi ilo Raki' koson ra imam.

KAINGKUALAN 29:9

pogoboton ilo niayuk ra abot, am pansigalon ilo. Ginio noyo ralan muno ra patimpokon i Arun am anak-anak nano. Musiti' ilo am papag nilo mangandoi Raki' ayuk koson ra imam ra sabuoi-buoi no.

YEHEZKIEL 44:15

Indagu Tuhan Raja', “Imam-imam ru Liwi intor ra papag ri Jadok, magulayun toojo mangandoi Raki' paat ulun ru Israil nangiruan Raki'. Ginio ra, raino ilo noyo ondo' mangandoi Raki' am matong ra saang Kuno koson mampataak ra lomok am niayuk raraa' ru bibiag sinimbalui.

YEHEZKIEL 44:16

Ilo ayuk iowon sumubol ra ralalom ru Baloi Kuno, mangandoi giu' ra altar Kuno, am maningganai ra sambayang ra giu' no.

YEHEZKIEL 44:8

Sala' ka ilo galama' ondo' nambaal ra upacara mapasau ralalom ru Baloi Kuno, kaa' ulun bansa' ru bokon ondo' pinangandoi nilo koson mambaal raginio.

IMAMAT 16:2

“Balai' i Arun, maayo muno, ra paat ra ondo' inaru' ayuk, mokoongoi io ra talikuron ru tabir, mongoi ralalom ru Lamin Matulai Kaga', sabap ra giu' no mintalang Aku ralalom ru gaun rasawat ru tataub ru Kaban Nabantuan. Amon ru manggal i Arun ra susuban raginio, matoi io.

IMAMAT 7:35

Gitio noyo tayar ru taak akanon ra Tuhan ondo' pataakon ri Arun am anak-anak nano paat ra orou ilo patimpokon ra imam.

UNTABAN 1:51

Paat akau mapabanding ra pangkiman, ulun-ulun ru Liwi musiti' maparulun ra Kim Kuno, am mapatirong raginio saguli' giu' ra intok bagu. Suai ra ulun ru Liwi, osoi ayuk minggaar ra Kim Kuno musiti' ukumin ra matoi.

UNTABAN 16:40

Taub no nasauk ra papakaraan ra ulun ru Israil ra kolondo' sangulun pana ondo' ayuk am papag ri Arun makainggaar ra altar monolob ra kaminyan ra Tuhan. Ulun ondo' manggal ra aturan no matoi koson ri Kora am ngaangai' maamaya' nano. Ngaangai' no binaal sumugut ra susuban ru Tuhan ri Iliajar ra pinasaboi galing ri Musa.

UNTABAN 18:20

Indagu Tuhan ri Arun, “Kalo makaalap kou ra atan pana rapu' koson ra tungkuson. Kolondo' tayar ru tana' giu' ra Israil masauk ra longgom muno. Aku Tuhan noyo tungkuson muno.”

UNTABAN 18:3

Ulun ru Liwi musiti' mambaal ra kandoi toojo nilono ramuyun am mapaugar ra kandoi nilono giu' ra Kim Kuno, kaa' kalo makainggaar ra altar kapoam mangambong ra kuliamos-kuliamos matulai giu' ralalom ru Lamin Matulai. Amon ru manggal ilo ra aturan raginio, ilo am niayuk akau matoi.

UNTABAN 3:10

Saukon noyo i Arun am anak-anak nano mapaugar ra kandoi ru imam. Ulun ra bokon ondo' kuminam mapaugar ra kandoi ru imam musiti' ukumin ra matoi.”

UNTABAN 3:38

I Musa, i Arun am anak-anak nano musiti' mangkim ra saang ru Kim ru Tuhan, tampilon ra sirangon. Mapaugar ilo ra sambayang giu' ralalom ru Lamin Matulai tayar ru ulun ru Israil. Ulun ra bokon ondo' kuminam mapaugar ra kandoi raginio musiti' ukumin ra matoi.

MATIUS 10:8

Babaso' min noyo ulun ondo' marualan; paluato' min noyo ulun ondo' minatoi, babaso' min noyo ulun ondo' makamaruol ra kungkung maaja', am pagiruo' min noyo riwato-riwato. Inanian kau ra kalo kinilagaan am panaak kau pai' min kilagai'!

JUANIS 3:27

Kaa' taam i Juanis, “Kolondo' atan ayuk pana maapu ru sasangulun amon ru kalo i Aki Kapuuno' mangani'.

IPISUS 3:8

Sotopot no, kabalu' pana ra aku ti nakatauli intor ra ngaangai' ulun ri Aki Kapuuno', kaa' inanian aku niayuk ri Aki Kapuuno' ra kandoi mampasaboi ra ulun sala ka Jaudi ra Tanou Moonsoi intor ra kalangkayaan ri Kristus ondo' kalo noyo mauntob.

SAGULION 18:2

Ondo' apuon nilono iono tungkuson nilo, koson ondo' binantu' noyo ru Tuhan. Ginio sabap ra kalo makaalap ilo ra tana' koson ra bansa'-bansa' ra bokon no.

IBRANI 5:4

Kolondo' sangulun galama' mampili' sumauk ra Tingganai Maayo Imam, kaa' piawon io ri Aki Kapuuno', koson i Arun piniau ra galing i.

JOSUA 18:7

Kaa' bansa' ru Liwi kalo makaalap ra tayar ru tana' mabaya' ramuyun, sabap tayar nilo iono mangandoi ra Tuhan koson ra imam. Bansa' ru Gad, Rubin am Manasi Sirangon nakaalap noyo ra tana' giu' ra tampilon sirangon ru Sungoi Jordan, ondo' tinaakan ri Musa, ulipon ru Tuhan risilo.”

1 PITRUS 5:2

Alungi' min toojo domba ondo' pinalansan noyo ramuyun ri Aki Kapuuno'. Pai' kano kaagat guang, kaa' alungi' ilo no mabaya' ra guang matasu', sabap ragitio noyo kasagaan ri Aki Kapuuno'. Pai' min noyo kondoyo' gitio koson maguyum ayuk ra gaji' galama', kaa' alungi' ilo no ra totopot ru guang min.

1 PITRUS 5:3

Pai' kano mamarinta mamisi' risilo ondo' pinaintopot noyo ramuyun ti, kaa' sauk kano koson ra tiluan moonsoi risilo.

1 SAMUIL 2:28

Intor ra ngaangai' bansa' ru Israil, pinili' Ku sasambaloi nano nasauk ra imam Kuno koson mangandoi giu' ra altar, monolob ra kaminyan, am mambayang ra efod paat makitulu' intor Raki'. Nanaak Aku risilo ra pangiawan koson mangalap ra santayaran intor ra taak simbalui ondo' solobon ra rasawat ru altar.