SULABOI 1:18 - Tanou Moonsoi Timugon

¹⁸ “Kaa' Tuhan matimpok sabap ra inanggal ku susuban Nano. Rongog kano raki', akau ngaangai' bansa', ilai' aku no ondo' marualan. Kamulakan kuno ungkuyon am ruandu' rinakop am inibit minugar.

SULABOI 1:18 ပူးပေါင်းရင်းမြစ်များ

1 RAJA'-RAJA' 13:21

am posoboyo' no ra ragu raginio ra nabi intor ra Jiuda no, “Minindagu Tuhan ra kalo gumagaya' kou Riso, am ra kalo nambaal kou ra susuban Nano.

IJRA 9:13

Raino nangukum Kou ramon sabap ra ngaangai' tula am inanggalan mai ra ukum Muno. Kaa' nakapandai akai iou Aki Kapuuno' mai, ra ukuman Muno mamaan poyo kaga' intor ra ondo' binaal mai; am Okou pana namayag ramon.

NIGIMIA 9:26

Kaa' ulun Muno giminuor am kalo giminagaya' Rirun; tinalikuran nilo Taurat Muno. Pinatoi nilo nabi-nabi ondo' nampakara' risilo, am ondo' nanusub risilo sumaguli' Rirun. Ruruli' ilo magasab Rirun,

NIGIMIA 9:33

Timbalos Muno matimpok koson mangukum ramon ondo' najamaran; Gumagaya' Kou, kabalu' pana makatula akai.

MAZMUR 107:11

sabap ra ilo minanggal ra panusuban ri Aki Kapuuno', am marara' ilo ra susuban ru Io Ondo' Maayo Kaga' Kuasa'.

MAZMUR 119:137

Matimpok Kou, iou Tuhan, am matimpok ukum Muno.

MAZMUR 119:75

Makapandai aku ra namalantasan Muno matimpok, iou Tuhan, inukum Mu aku sabap ra nampagagayaan Muno.

MAZMUR 145:17

Matimpok toojo atan ayuk pana baalon ru Tuhan, am makaasi' Io ra atan ayuk pana baalon Nano.

KAINGKUALAN 9:27

Pampiau boo raja' ri Musa am i Arun am indagu, “Raino ti natulaan aku. Motopot toojo Tuhan no, aku am mamagun kuno makasala.

JIRIMIA 12:1

“Iou Tuhan, amon ru pabalaan ku baal kutu Rirun, maaru' matutunan toojo ra Okou noyo ondo' motopot. Kaa' musiti' aku mangkuot Rirun intor ra katimpakan. Kua kia ra ulun malaat langkaya'? Kua kia ra ulun ondo' kalo mabanis guang makabanang?

JIRIMIA 32:23

Kaa' paat ra ilo minatong ra pagun ti am minayan, kalo giminagaya' ilo ra susuban Muno, am kalo naayag siminugut ra pangilaan Muno. Kalo siminugut ilo ra rondo' pana intor ra susuban Muno. Ginio ra namparatong Kou ra ngaangai' karaat ti risilo.

JIRIMIA 4:17

am magawang ra Jirusalim koson ra ulun magalung ra umo. Ngaangai' baal raginio masauk sabap ra mamagun ru Jiuda giminuor noyo ra Tuhan. Nakaindagu noyo Tuhan.

JIRIMIA 49:12

Ulun ondo' sotopot no kalo ukumin pana natiu' ra ukuman. Indoson min kia ra makalabus kau intor ra ukuman? Maaru' ukumin kau!

SULABOI 1:12

Golok io ra moonong ulun ondo' mansail ra giu', “Ilai' aku no. Kalo kia igondo' osoi pana naimbolo' koson raki', kaimbalaan ondo' pinaratong ru Tuhan raki' sabap ra sangit Nano.

SULABOI 3:42

“Iou Tuhan, makatula akai noyo am giminuor Rirun, am kalo poyo nangampun Kou ramon.

SULABOI 5:16

Baal ra kaantakan ru guang mai kalio noyo. Raino ukumin akai sabap makatula.

DANIL 9:5

“Makatula akai noyo. Nambaal akai noyo ra kalaatan. Nambaal akai noyo ra kasalaan. Minanggal akai noyo ra susuban Muno, am siminiang intor ra aturan Muno.

DANIL 9:7

Okou, iou Tuhan masalok mambaal ra motopot, liliwa' akai masalok manuyu' ramon galama'. Koon raginio niayuk ra ngaangai' ru bansa' mai ondo' minayan ra Jiuda, Jirusalim, am ngaangai' ulun ru Israil ondo' pinantutuliar Mu giu' ra pagun-pagun mamaar am maalur sabap ra kalo gumagaya' ilo Rirun.

AMOS 8:13

Paat ra orou raginio ra tauli no, ungkuyon am ruandu' ondo' mamulok pana malausan sabap ra paason.

JIPANYA 3:5

Kaa' Tuhan lakat poyo giu' ra bandar no. Magail Io mambaal ra motopot am kalo igondo' nambaal ra ondo' sala. Moonong susuab ti maaru' mangani' Io ra katimpakan ra ulun Nano. Kaa' ulun ondo' kalo makaulig ra katimpakan giu' ra bandar no magulayun mambaal ra malaat ra kalo makaulig ra mauyu'.

JAKARIA 1:6

Pinabala' galing ra nabi-nabi, ulipon Kuno, nampasaboi Aku ra susuban am pampakaraan Kuno ra kinamatuaan min. Kaa' kalo nampalio ilo raginio saboi musiti' mansaan ra kinibit nano. Kopongo raginio timinalikur ilo intor ra tula am nangiou ra Aku, Tuhan Ondo' Maayo Kaga' Kuasa', nangukum noyo risilo nontopot ra kasalaan nilo am nontopot ra nangaruan Kuno.”

ROMA 2:5

Kaa' akau mailo raguin am mokotog ulu! Intor raginio mampagaai kau po ra bagat ru ukum min ra Orou Pupus no, ioginio paat i Aki Kapuuno' mampaintalang ra sangit am ukum ondo' mabanis.

ROMA 3:19

Ginio ra raino mapandayan takau noyo ra ngaangai' ondo' tinulisan ra Ukum i, pasukuon risilo ondo' gumagaya' ra Ukum no. Kolondo' sasaban boo ru sangulun pana am ngaangai' ulun ru tana' ti maukum ri Aki Kapuuno'.

SAGULION 32:4

“Tuhan manaung ramuyun ondo' mapanggol, Io matanda' am matimpok ralalom ru ngaangai' baal; i Aki Kapuuno' min mampagagaya', kolondo' abau Riso, nambaal Io ra ondo' moonsoi am ondo' motopot.

TINGGANAI RU BANSA' 1:7

Indagu Raja' Adoni-Bijik, “Ragili namutul aku ra pangina' ru kalindu' am pangina' ru kalayam ru tulu' ngoopor ngaulun raja', am nanganam ilo ra suwo ru akanon susut ru mija' kuno. Raino pinamakuan ri Aki Kapuuno' raki' koson ra pinamakuan kuno risilo.” Raja' Adoni-Bijik pana inibit boo giu' ra Jirusalim, am minatoi io ra giu'.

1 SAMUIL 15:23

Gumuor ra Tuhan nogondo' laat no ra mambaal ra sihir, am guang ra malilimbau nogondo' laat no ra sumamba ra sinungkalalaing. Ginio sabap ra okou nangimpai ra susuban ru Tuhan, Tuhan pana nangimpai rirun koson ra raja'.”