SAGULION 17:9 - Tanou Moonsoi Timugon

⁹ Giu' no, pabalaa' baal raginio ra imam ru bansa' ru Liwi, am ra akim ondo' mangandoi paat raginio. Polosoo' noyo ilo mangakim ra baal raginio.

SAGULION 17:9 ပူးပေါင်းရင်းမြစ်များ

1 TUNUNG RU BANSA' ISRAIL 26:29

Papag ri Jijgar, iono i Kinanya am niayuk anak-anak nano, inanian ra kandoi ru upis pamarintaan am kandoi pangakiman giu' ra Israil.

KAINGKUALAN 18:16

Amon ru mansangor ruo ngaulun, matong ilo raki' am patasin ku osoi intor risilo ondo' motopot. Mapasaboi aku niayuk ra susuban am ukum ri Aki Kapuuno' risilo.”

KAINGKUALAN 22:8

Kaa' amon ru kalo marampatan mantatakou no, musiti' ulun nakibulian no ibiton ra intok sambayangan, am magibot ra kalo nantakou io ra kuliamos pinabulian riso no.

JIRIMIA 18:18

Kon boo ru ulun, “Ibok no paguguum takau manggal ri Jirimia sabap itakau galama' mokoondo' ra imam ondo' makapangani' ra pangilaan, ulun mapintar makapangani' ra bilin, am nabi ondo' makapampasaboi ra tanou ri Aki Kapuuno' masalok soroi. Ibok no ibito' takau panguwan ri Jirimia, am lumonggo' mangkirongog ra ragu-ragu nano!”

YEHEZKIEL 44:24

Paat ra makatabual pansangaran intor ra baal ru ukum, imam-imam no musiti' mangakim raginio sumugut ra ukum Kuno. Musiti' nilo salingapuon pangiantakan-pangiantakan ru ugama sumugut ra ukum am aturan Kuno am niayuk mangiantak ra orou Sabat koson ra orou ondo' matulai.

AGAI 2:11

Mindagu Tuhan, “Pakitaak ra pamatasan ru imam-imam intor ra pangkuatan ragitio:

JAKARIA 3:7

ra ragu ru Tuhan Ondo' Maayo Kaga' Kuasa', “Amon ru suguton mu ukum Kuno am mambaal ra kandoi ondo' taakin Kuno rirun, iowon kou manunggul ra kandoi koson ra tingganai giu' ra ralalom Baloi Kuno am niayuk koson manalingapu ra liliut nano. Rongogon Ku pakiasian muno, koson ra Aku riminongog ra pakiasian ru malaikat-malaikat ondo' giu' ra saang Kuno.

JAKARIA 7:3

Sinusub ilo niayuk mangkuot ra imam-imam am nabi-nabi, “Lakat poyo kia akai musiti' manulaboi ra kapusaan ru Baloi ru Tuhan ra mampali ra moonong sila' kalimo, koson ondo' binaal mai ra bibilor buoi no?”

MALIAKI 2:7

Imam-imam musiti' toojo mangila' ra atan ondo' motopot intor ri Aki Kapuuno'. Mamagun musiti' matong ra imam-imam koson makapandai ra kasagaan Kuno sabap ilo ulun sinusub ru Tuhan Ondo' Maayo Kaga' Kuasa'.

SAGULION 16:18

“Lantiko' noyo tingganai-tingganai ru bansa' am pagawai-pagawai ra bokon giu' ra moonong bandar ondo' pataakon ramuyun ru Tuhan i Aki Kapuuno' min. Ngaangai' ulun musiti' mangakim ra mamagun ra matimpok.

SAGULION 17:10

Mamatas ilo ra baal raginio, am musiti' baalon min ra matanda' atan ondo' raguon nilo ramuyun.

SAGULION 21:5

Imam-imam ru bansa' ru Liwi niayuk musiti' mongoi ra giu' no, sabap musiti' ilo mangakim ra moonong baal ondo' makalabit ra kalaatan. Nampili' noyo Tuhan i Aki Kapuuno' min risilo koson mangandoi ayuk Riso am koson mambarakat ra ulun sabap ra inggalan Nano.

SAGULION 25:1

“Amon ru ruo ngaulun ru Israil mongoi ra makama koson manalasai ra pansangaran, am sangulun napandayan ra kolondo' sala am sangulun poyo napandayan ra makasala.

SAGULION 33:10

Mangila' ilo ra ulun Muno am gumagaya' ra Ukum Muno; Mapataak ilo ra taak simbalui giu' ra rasawat ru altar Muno.