RUT 4:14 - Tanou Moonsoi Timugon

¹⁴ Ruandu'-ruandu' ra giu' no mindagu ri Naomi, “Koompor noyo Tuhan! Orou raiti', nanaak io rirun sangulun akupu ondo' nagalung rirun. Gama' ru mauligan kaga' anak no giu' ra Israil ra tauli no.

RUT 4:14 ပူးပေါင်းရင်းမြစ်များ

KASAUKAN 12:2

Mangani' Aku rirun ra papag ondo' masuang am masauk ilo ra bansa' maayo. Mambarakat Aku rirun am masauk boo inggalan muno ra mauligan kaga' saboi alapon kou mambarakat ra ulun bokon.

KASAUKAN 24:27

Indagu io, “Koompor noyo Tuhan i Aki Kapuuno' ru tuan kuli i Abragam totopot nampaguut ra bantu' Nano ra tuan kuli i Abragam. Inibit aku ru Tuhan parampuso' ra pabukat ru tuan kuli.”

KASAUKAN 29:35

Kaapang poyo igondo' i Liya am paganak sangulun anak ungkuyon. Kono, “Raino ti, mongompor aku ri Aki Kapuuno'.” Inggalani' no boo anak raginio i Jiuda. Kopongo raginio kalo boo naganak i Liya.

LUKAS 1:58

Pakaining pinasambalayan am pabukat-pabukat nano ra ati kulaan gayo ru asi' ru Tuhan ri Ilisabit i, minaya' ilo niayuk riso maansukan.

ROMA 12:15

Baya' kano pakaansuk risilo ondo' maansukan, am baya' kano pantangi' risilo ondo' mangiluk guang.

1 KORINTUS 12:26

Amon ru rondo' tayar maimbolo', ngaangai' tayar ra bokon pana makaaya' kaimbolo'. Amon ru rondo' tayar omporon, ngaangai' tayar ra bokon no pana makaaya' pakaansuk.

1 TISALONIKA 5:18

Paringkuanang kau ayuk ra ngaangai' ondo' matuum min, sabap raginio noyo kasagaan ri Aki Kapuuno' ramuyun koson ra ulun ondo' sumimpung ri Kristus Jisus.

2 TISALONIKA 1:3

Pabukat ku ngai', musiti' akai masalok maringkuanang ri Aki Kapuuno' sabap ra akau. Am ginio noyo maaru' baalon mai, sabap ra mulu' poyo boo akau mangintopot ri Kristus am togom maayo min ra ulun bokon.