ROMA 8:3 - Tanou Moonsoi Timugon

³ Atan ondo' kalo nabaal ru Ukum ri Musa sabap ra paliso ru ulun no ondo' malawo, binaal noyo ri Aki Kapuuno'. Koson mamuso ra kuasa' ru tula ralalom paliso ru ulun, nangator i Aki Kapuuno' ra Anak Nano galama'. Minayag Io koson ra ulun, ioginio baal ru ulun ondo' makatula am intor raginio kinala No kuasa' ru tula.

ROMA 8:3 ပူးပေါင်းရင်းမြစ်များ

UNTABAN 21:9

Nambaal boo i Musa ra sanginan kukuo intor ra gangsa' am patampako' ginio ra rondo' lugu'. Moonong ulun ondo' tininduk ru kukuo mababas amon ru magilong ra kukuo intor ra gangsa' no.

UNTABAN 28:22

Papataak niayuk sanginan kambing gawayan ra tayar ru taak simbalui koson mangampun ra tula. Koon raginio noyo akau mambaal ra upacara pamasawan ra tayar ru ulun raginio.

MARKUS 15:27

Nababaya' ri Jisus, sinalip nilo ruo ngaulun mantatakou; sangulun sinalip tampilon ra pamiris am sangulun sinalip tampilon ra kait. [

JUANIS 1:14

Ragu no nasauk ra ulun am minayan Io ritakau. Nakito takau noyo ra Io matulai toojo, sabap ra Io no rorondo' Anak Langkuir ri Ama'. Ralalom inggalan Nano i Aki Kapuuno' galama' am togom Nano pinakito ritakau.

JUANIS 9:24

Piawo' nilo poyo ulun binabas ni am konilo riso, “Pagibot no ralalom inggalan ri Aki Kapuuno' ra mindagu kou ra motopot! Nakapandai akai noyo ra ondo' namabas rirun i ulun makatula.”

ROMA 3:20

Sabap ra kolondo' sangulun pana pobonsoyon ri Aki Kapuuno' sabap ra sumugut io ra panusuban ru Ukum no. Sotopot no, Ukum raginio mambala' ayuk ra itakau ulun makatula.

ROMA 6:6

Mapandayan takano ra kiralan ru kaayagan lair takau pinuso noyo paat ri Kristus pinatoi giu' ra salip, koson kuasa' ru paliso takau ondo' makatula no pusoon. Maa' raginio, kalo boo uliponon takau ru tula.

ROMA 7:18

Ginio ra kolondo' moonsoi soroi ra guang kutu, ioginio paliso kuno ra ulun. Sabap ra iou pana masaga' aku mambaal ra moonsoi, kalo makapambaal aku.

ROMA 8:32

Kalo iningaan ri Aki Kapuuno' Anak Nano galama', kaa' pinoloso No Io potoyon koson ra kaatangan takau. Amon ru pinataak No Anak Nano ritakau, maaru' mangani' Io poyo ritakau ngaangai' ra bokon.

ROMA 9:3

mangkara' ra pabukat-pabukat kuno, ioginio bansa' kuno galama'. Gama' ru makapangindangan aku risilo, amon ru kitaakon tumampos aku ukumin ri Aki Kapuuno' am patuliaron intor ri Kristus.

2 KORINTUS 5:21

Kolondo' noyo tula ri Kristus, kaa' koson ra kaatangan takau, kinara' Io ri Aki Kapuuno' koson makatula. Maa' raginio, sabap ra pasimpungan takau ri Kristus, itakau ondo' makatula mobonsoi saguli' ri Aki Kapuuno'.

GALATIA 3:13

Kaa' i Kristus nampalabus noyo ritakau intor ra usung ondo' kinibit ru Ukum ri Musa ti, ra Io nokoowot ra usung sabap ra itakau. Mokoondo' tinulisan ra Buuk Kitab ra, “Mapara' piboo usung ru ulun ondo' salipon ra tataun.”

GALATIA 3:21

Gitio kia arati' ra Ukum ri Musa am binantu' ri Aki Kapuuno' mantula' boo? Sotopot no kalo noyo toojo! Sabap ra amon ru nataakan noyo rondo' ukum ugama ondo' makapangani' ra kaayagan ra ulun, am ulun boo mokopobonsoi saguli' ri Aki Kapuuno', amon ru mampagagaya' ilo ayuk ra ukum ugama no.

PILIPI 2:7

Kaa' ngaangai' tinatang No ayuk am siminauk koson ra ulipon am siminauk Io ra ulun, am kaayagan Nali mogondo' ritakau.

IBRANI 10:12

Kaa' i Kristus igondo' ayuk nampataak ra painawo Nano koson pangampunan ra tula, am ginio makakuasa' ra mantilayun. Kopongo raginio, nanturung Io ra tampilon pamiris ri Aki Kapuuno'.

IBRANI 10:14

Sabap ra Io nampataak ra painawo Nano ra igondo' ayuk, tandaan No ra mantilayun ulun ondo' kinapasau noyo intor ra tula.

IBRANI 2:14

Sabap ra ilo ondo' sabiton ra pabukat, ioginio ulun, ilo mapandai matoi, ginio ra i Jisus pana nasauk ra ulun toojo mogondo' risilo. Binaal No ginio, maa' raginio mansail ra pinatayan Nano mamuso Io ra kuasa' ru Tingganai ru riwato ondo' makapampatoi ra ulun.

IBRANI 2:17

Ginio noyo sabap ra musiti' Io masauk ra ulun koson ra pabukat Nano ralalom ngaangai' baal. Maa' boo raginio nasauk Io ra Tingganai Maayo Imam ondo' makaasi' toojo ritakau am masalok gumagaya' ra susuban ri Aki Kapuuno'. Intor ra kandoi Nano raginio tula ru ulun ampunon boo ri Aki Kapuuno'.

IBRANI 4:15

Sabap ra Tingganai Maayo Imam takano sala' ka sangulun ondo' kalo nakaliman ra paliso takau, kaa' sotopot no kininaman Io ralalom ngaangai' baal koson ritakau, kaa' kalo makatula Io.

1 PITRUS 2:24

I Kristus galama' nansaan ra tula takau giu' ra salip. Ginio nai ra nakalabus takau intor ra kuasa' ru tula am maayag takau sumugut ra kasagaan ri Aki Kapuuno'. Pilat ri Kristus ti noyo ondo' namabas ramuyun.