ROMA 6:22 - Tanou Moonsoi Timugon

²² Kaa' raino, pinalabus kano intor ra tula am masauk ra ulipon ri Aki Kapuuno'. Onong ru ginio kaayagan mino patimpokon noyo ri Aki Kapuuno' am ginio manangampos ra kaayagan motopot am mantilayun.

ROMA 6:22 ပူးပေါင်းရင်းမြစ်များ

KASAUKAN 50:17

nambilin io ramon mambala' rirun, ‘Ampuno' noyo kalaatan ondo' binaal ru pagaka'-pagaka' muno ragili.’ Raino, ampuno' noyo kasalaan mai, ra akai ti ulipon ri Aki Kapuuno' ondo' sambaan ru ama' takali.” Nantangi' i Jusup nakaapu ra bilin no.

AYUP 1:8

Indagu Tuhan, “Inurio mu kia i Ayup, ulun ondo' mangandoi ayuk Raki'? Giti ra titikop ru tana' ti kolondo' ulun ondo' totopot gumagaya' kaga' am moonsoi koson riso. Sumambayang io Raki' am totopot pagilalain no maa' raginio kalo mambaal ra malaat.”

MAZMUR 143:12

Potoyo' pantula' kuno sabap ra motogom Kou raki'; luuso' ngaangai' ondo' liminaat raki', sabap ra aku ti ulipon Muno.

MAZMUR 86:2

Palabuso' aku intor ra patayan, sabap ra mampagagaya' aku Rirun; bayago' noyo aku ti, ulipon Mutu ondo' mangintopot Rirun.

MAZMUR 92:14

Ilo koson ayuk ra puun ondo' tinanom ra Baloi ru Tuhan, koson ra tutuu' malabung giu' ra Baloi ri Aki Kapuuno' takau,

JISAYA 54:17

Kaa' moonong kinandoi mangayou ondo' tinitip koson gumula' rirun, kalo masauk. Ra am moonong panguwan ralalom pangakiman mampainono' kou ra kalo motopot. Pataakon Ku kamanangan koson tangguang ra ulipon-ulipon Kuno.” Ginio noyo ragu ru Tuhan.

DANIL 3:26

Inggaari' boo ru Raja' Nibukadnijar kulobon ru rapuan no am indagu, “Sadrak! Misak! Abidnigo! Ulipon-ulipon ri Aki Kapuuno' Ondo' Masawat Kaga', ingkual no!” Ilo pana miningkual ra mataki'.

DANIL 6:20

Paat ra maar matawang, sukal raja' am agou-agou minongoi ra luang batu ru singa' no.

UNTABAN 23:10

Papag ru Israil koson ra kaau kalo mauntob; masuang ilo kaga'. Gama' ru pupus ru bayag kuno koson ra pupus ru bayag ru sangulun ra ulun ri Aki Kapuuno'; Gama' ru matoi aku ra mamimio koson ra ulun mabanis guang.”

MATIUS 13:40

Koson ra alab no timungon am suruin ra apui, koson niayuk ra Orou Pupus ra tauli no.

MATIUS 13:43

Baal ru ulun motopot pana makito boo ru ngaangai' koson ra silau ru mato ru orou giu' ra Tana' Bagu ri Aki Kapuuno', Ama' nilono. Rongogo' am karaa' min!”

MATIUS 19:29

Osoi ayuk mangiruan ra baloi, kapoam pabukat no ra ungkuyon, kapoam pabukat no ra ruandu', kapoam ina' am ama', kapoam anak nano, kapoam lanau am umo nano; ulun ragitio makaalap maatus ruli' ra raino ti am niayuk aniin io ra kaayagan mantilayun.

MATIUS 25:46

Akau ti ukumin ra ukum mantilayun, kaa' ulun motopot mokoowot ra kaayagan mantilayun.”

JUANIS 15:16

Pai' ru akau nampili' Raki', kaa' Aku noyo nampili' ramuyun am inaru' takamin mongoi ra ati-ati ayuk am manangkawa' ra maawas, am kawa' mino tumilayun. Atan ayuk kitaakon min ralalom ru inggalan Kuno, aniin kau ri Ama'.

JUANIS 15:2

Moonong pango Kuno ra kalo manangkawa' iruon No, am moonong pango ra manangkawa' intawangin No, maa' raginio makapangkawa' ra maawas poyo.

JUANIS 4:36

Raino ulun mangkumos no nokoowot ra ampos am ampos raginio magibit ra kaayagan motopot am mantilayun. Ginio ra ulun ondo' manias am ondo' mangkumos no mabaya' boo maansukan.

JUANIS 8:32

Mauligan min i Aki Kapuuno' ondo' motopot am ginio mampalabus ramuyun.”

ROMA 6:14

Tula kalo boo makapanguasa' ramuyun, sabap ra kaayagan mino kalo boo inimpuun ra Ukum ri Musa, kaa' inimpuun ra asi' ri Aki Kapuuno'.

ROMA 6:18

Pinalabus kano intor ra kuasa' ru tula am siminauk ra ulipon ru kasagaan ri Aki Kapuuno'.

ROMA 6:21

Ragili kolondo' onong no ra akau nampaugar ra baal-baal ondo' raino mampakauyu' ramuyun. Baal-baal raginio mangkinibit ra kapatayan.

ROMA 7:4

Pabukat kau ngaangai', koson niayuk raginio ramuyun. Maya' ra pagilangan Ukum ri Musa koson ra minatoi kau noyo, sabap ra siminimpung kau ra inan ri Kristus. Akau raino i Kristus noyo tatangan, Io ondo' binayag saguli' intor ra kapatayan, maa' raginio kaayagan takau mokoonong ri Aki Kapuuno'.

ROMA 8:2

Sabap ra ukum ru Ambiluo ri Aki Kapuuno' ondo' mangani' ra kaayagan ra pasimpungan takau ri Kristus Jisus, nampalabus noyo raki' intor ra ukum ondo' mangkinibit ra tula am kapatayan.

1 KORINTUS 7:22

Sabap ra sangulun ulipon ondo' piniau ru Tuhan, sotopot no pinalabus io no ru Tuhan. Mogondo' niayuk ra sangulun sala' ka ulipon ondo' piniau ru Tuhan, uliponon io no ri Kristus.

2 KORINTUS 3:17

Arati' ru ragu “Tuhan” ragitio am Ambiluo; am ati ayuk kasarayan ru Ambiluo ru Tuhan no, giu' no niayuk mokoondo' kalabusan.

GALATIA 1:10

Ati boo kulaan, maguyum aku kia ra pangiawan intor ra ulun? Kalo, pangiawan intor ri Aki Kapuuno' ayuk gogoton kuno. Makikiilong aku kia ra ulun? Kalo, amon ru koson raginio sala' ka ulipon aku ri Kristus.

GALATIA 5:13

Kaa' koson ramuyun, pabukat kau ngaangai', napiau kano masauk ra ulun nakalabus. Kaa' pai' min polosoo' kaluagan raginio mangkinibit ramuyun makatula, koson mampagagaya' kau ayuk ra kasagaan ru guang min. Ondo' ayuk am gitio; kotogom am koonsoi kano ra rondo' am bokon.

GALATIA 5:22

Kaa' gitio noyo ampos amon ru ulun tingganayon ru Ambiluo ri Aki Kapuuno': montotogom ilo, maansukan, maayag ra rondo' guang ra rondo' am bokon, mataan guang, masaga' mangindangan, moonsoi guang, mampagagaya',

IPISUS 5:9

Sabap ra maayag ralalom ru sinda no magibit ra ampos, ioginio nansalinut baal ra moonsoi, matanda' am motopot.

PILIPI 1:11

Intor raginio, kaayagan mino mauli' ra baal topot-topot moonsoi ondo' kondoyon ri Jisus Kristus, am bagu raginio katulayon am omporon boo i Aki Kapuuno'.

PILIPI 4:17

Sotopot no pai' ru mompogogot aku ra taak mino raginio, kaa' ondo' ayuk gogoton ku ioginio ampos ru kasingkatan mino.

KOLOSI 1:10

Kon raginio boo ra maayag kau sumugut ra kasagaan Nano am makapapabansuk ra guang Nano, ioginio kaayagan min magibit ra nansalinut baal moonsoi am mulu' poyo makaintutun kau ri Aki Kapuuno'.

KOLOSI 4:12

Bilin kaansayan poyo intor ri Ipapras. Akau niayuk ra ulun. Io ti ulipon ri Jisus Kristus am masalok io mapirot mangkara' ramuyun ralalom pakiasian nano. Intor noyo ra pakiasian nano ri Aki Kapuuno' maikang kau am totopot makaintutun am poyo sumugut niayuk ra ngaangai' ru kasagaan ri Aki Kapuuno'.

TITUS 1:1

Aku i Paulus mamatik ra surat ti koson sangulun ulipon ri Aki Kapuuno' am sangulun rasul ri Jisus Kristus. Aku pinili' koson mampaingkotog ra pangintapatan ru ulun pinili' ri Aki Kapuuno' am mampaintutun risilo ra pangilaan motopot sumugut ra ugama takau.

IBRANI 12:14

Gogot kano pobonsoi ra ngaangai' ulun am poyo kaayag kano ra mapasau, sabap ra kolondo' sangulun pana makakito ra Tuhan, amon ru kalo maya' io raginio.

JAKUBUS 1:1

Aku i Jakubus, sangulun ulipon ri Aki Kapuuno' am niayuk ulipon ru Tuhan Jisus Kristus. Kaansayan ku ra ngaangai' ulun ri Aki Kapuuno' ondo' soroi ra titikop ru tana' ti.

1 PITRUS 1:9

Sabap ra noowot min noyo ampos ru pangintapatan mino, ioginio pamayagan min.

1 PITRUS 2:16

Kaayag kano koson ra ulun ondo' kalo boo uliponon ru tula, kaa' pai' polosoo' pampalabusan min ti mapasibuni ra tula min, kaa' pakapaliso kano koson ra ulipon ri Aki Kapuuno'.

PINAINTALANG 7:13

Sangulun intor ra tingganai-tingganai no nangkuot raki', “Osoi kia ulun-ulun ondo' nambayang ra sukub mapulak no, am ati intor nilono?”