ROMA 12:3 - Tanou Moonsoi Timugon

³ Sabap ra asi' ri Aki Kapuuno' raki', mindagu aku ra moonong ramuyun: Pai' kano minsawat guang, ioginio majanjayan intor ra ondo' sotopot no. Kaa' moonsoi ra akau minggana' guang am karaa' kaayagan mino maya' ra kapandayan ondo' tinaakan ri Aki Kapuuno' ramuyun sigagama' sabap ra mangintopot akau ri Jisus.

ROMA 12:3 ပူးပေါင်းရင်းမြစ်များ

AMSAL 25:27

Masuang akan ra ruu' maningot kalo moonsoi; ianga' makiunsu' pana kalo moonsoi.

AMSAL 26:12

Sasambungon pana ulun, sala' ka koson ra kinasambung ru ulun ondo' mangkara' ra io mapintar, sotopot no kalo.

MAMPATANOU 7:16

Ginio ra pai' no koonsoi kaga' kapoam kapintar kaga'; kua pamuso ra inan galama'?

MIKA 6:8

Topot-topot kalo! Nambala' noyo Tuhan ritakau ra atan ondo' moonsoi. Baal ondo' kitaakon toojo ru Tuhan intor ritakau iono maa' raginio mambaal takau ra matimpok, masalok mangimaya' ra katagaman, am mabaya' ra guang minggana' maayag masimpung ri Aki Kapuuno' takau.

LUKAS 18:11

Ulun ru Parisi no minigor am nakiasi' io, kono, ‘Aki Kapuuno', paringkuanangan ku Rirun, sabap ra kalo makalit aku kapoam magabau, kapoam lumapau, koson ra ulun bokon. Paringkuanangan ku sabap ra aku sala' ka koson ra mampalulur ra cukai no.

JUANIS 3:34

Io ondo' sinusub ri Aki Kapuuno' mampasaboi ra ragu Nano, sabap ra kalo palasin i Aki Kapuuno' mangani' Riso ra Ambiluo Nano.

ROMA 1:5

Ralalom ru inggalan Nano noyo tinimpok taaki' ri Aki Kapuuno' raki' kandoi masauk ra rasul, koson mangandoi aku ri Kristus am magibit ra ngaangai' ulun mangintopot am gumagaya' Riso.

ROMA 11:20

Motopot ginio. Inindaanan ilo sabap ra kalo nangintopot ilo, am soroi kau sabap ra pangintapatan mino. Intor raginio, pai' kano limbau, kaa' ilalai' min!

ROMA 11:25

Pabukat kau ngaangai', mapaintutun aku ramuyun ra katapatan ondo' kalo igondo' pinabala', maa' ra akau makapandai no, kalo boo lumimbau kau. Gitio noyo katapatan i; kalo mantilayun ulun ru Israil mokotog ulu, kaa' polos ayuk ra morontop noyo suang ru ulun sala' ka Jaudi matong ri Aki Kapuuno'.

ROMA 12:16

Kaayag kano ra rondo' guang ra rondo' am bokon. Pai' pampaguang ra akau ti maatang, kaa' latok kano ra ulun musikin. Pai' pangkara' ra akau ti poyo mapintar.

1 KORINTUS 15:10

Kaa' kataawan ri Aki Kapuuno' niayuk ondo' nampasauk raki' ra osoi aku raino ti. Am kataawan Nano kalo niayuk nalubat. Kaa' sotopot no aku ondo' nangandoi toojo ka ngaangai' rasul ra bokon. Kaa' ginio noyo sala' ka aku galama', kaa' kataawan ri Aki Kapuuno' ondo' nangandoi nabaya' raki'.

1 KORINTUS 3:10

Maya' ra kapintaran ondo' pinataak ri Aki Kapuuno' raki', aku noyo nambaal ra turungan ru lugu' am ulun boo ra bokon manunggul panambaloi. Kaa' musiti' pagilalain ru moonong ulun ati kulaan io manunggul ra kandoi ti.

1 KORINTUS 7:17

Kaayag kano sigagama' sumugut ra tinaakan ru Tuhan ramuyun, ioginio tayar ru kaayagan min paat ri Aki Kapuuno' nampiau ramuyun. Ginio noyo pangilaan kuno ra moonong pasimpungan ulun Kristian.

2 KORINTUS 10:13

Kaa' akai ti pai' ru makiompor koson raginio. Kaa' makiompor niayuk morontop ra atan ondo' inaru' ri Aki Kapuuno' ramon, ioginio ondo' kinandoi mai ramuyun.

2 KORINTUS 12:13

Ati kia malimanan min ra kalo lioon kau intor ra pasimpungan ulun Kristian ra bokon no? Ginio kia ra kalo igondo' pantipagon aku ramuyun pakitaak ra ruit? Makimaap aku sabap ra sala kuno ramuyun no!

2 KORINTUS 12:7

Kaa' maa' raginio kalo minsawat guang kutu sabap ra kinibit ru papakitanan ondo' makaimuag, inanian aku ra rondo' maruol ra inan kutu. Mansail ra maruol ti magail aku imboloon ru Tingganai ru riwato, maa' raginio kalo boo minsawat guang kutu.

GALATIA 6:3

Amon ru sasangulun mangkara' ra io no maatang, am sotopot no kalo, io galama' ayuk miruruung.

IPISUS 3:2

Maaru' nakapandai kano ra maya' ra kataawan ri Aki Kapuuno' aku inanian ra kandoi ti koson ra kaatangan min.

IPISUS 3:4

Am amon ru basaan min tinulisan kuni, makarati' kau ra ati kulaan kaintutunan kuno ra sauk ondo' kalo igondo' pinabala', ioginio ondo' binaal ri Kristus.

IPISUS 4:16

Maya' ra paningganayan Nano, moonong tayar ru inan mokoondo' noyo ra intok sigagama', am inan no matunggul toojo ru parangaban. Amon ru moonong tayar ti mambaal ra kandoi nano galama', ulun no sumukor boo, koson maikang takau boo ralalom ru togom.

PILIPI 2:13

Sabap ri Aki Kapuuno' no galama' magibit ra guang mino mangiou am poyo magagaya' min niayuk atan ondo' kasagaan Nano toojo.

KOLOSI 1:29

Koson mampasingkot ra kandoi raginio, sumingkotog aku toojo. Maayo toojo kuasa' ri Kristus ondo' mabaya' ra kandoi kutu.

KOLOSI 2:13

Gili, akau ondo' sala' ka ulun ru Jaudi, koson ayuk ra minatoi kau sabap ra kinibit ru tula min am sabap ra kalo nakaulig kau ra Ukum ri Musa. Kaa' akau binayag Nano saguli' mabaya' ri Kristus ra Io nangampun ra tula takau.

1 TIMOTIUS 1:14

Am maya' ra kinataau ru Tuhan takau ondo' kalo mauntob, nangani' Io raki' ra asi', pangintapatan am togom sabap ra pasimpungan takau ri Jisus Kristus.

1 TIMOTIUS 2:15

Kaa' ruandu' pana bayagon ra io maganak, amon ru magulayun io mangintopot, motogom ra ulun bokon, mapasau guang am makapaliso ondo' sama' bayaan.

1 TIMOTIUS 2:9

Am masaga' aku ra ruandu'-ruandu' mambayang ayuk ra ondo' sama' tantangin am kalo mampakauyu' ra pagilangan ru ulun; ioginio kalo majanjayan sikot ru abuk, mampakai ra mas, mutiara kapoam bayang ra mongologo.

TITUS 2:12

Am ginio noyo makapanulu' ritakau mangulau ra kaayagan ondo' kalo sumugut ra kasagaan Nano, ioginio kasagaan ru tana' ti. Maa' raginio mabanis guang am mongorot takau am makapampagagaya' takau toojo ri Aki Kapuuno' ra tana' ti.

TITUS 2:2

Ragui' noyo ungkuyon matutuo maa' raginio mapintar, tumanda' am mongorot. Musiti' ilo ti mangintopot ra Kristus, motogom am poyo mataan guang.

TITUS 2:4

maa' raginio makapangila' ilo ra ruandu' mangamulok ra ati kulaan tumogom ra ralaki am niayuk anak nilai no,

TITUS 2:6

Ragui' niayuk tuu'-bagu koson ilo ti pana mapandai mongorot.

JAKUBUS 4:6

Am mulu' poyo boo kataawan Nano ritakau. Ginio ra tinulisan ra Buuk Kitab ra, “Ampangin ri Aki Kapuuno' ulun ondo' minsawat guang, kaa' mataau Io ra ulun ondo' minggana' guang.”

1 PITRUS 1:13

Sabap ra ngaangai' ondo' binaal ri Aki Kapuuno' no ramuyun, kasalok pororoo' pangkaraan min. Pagilalai' min noyo am poyo lansan kano toojo ra kataawan ri Aki Kapuuno' ramuyun paat ra papaintalangan ri Jisus Kristus.

1 PITRUS 4:11

Osoi ayuk inanian ra kapandayan mindagu, moonsoi ru mampasaboi io ra bala' intor ri Aki Kapuuno'; am osoi ayuk mangindangan ra ulun bokon, musiti' io mangindangan mabaya' ra ikang intor ri Aki Kapuuno'. Maa' raginio, ralalom ngaangai' ondo' kondoyon min, i Aki Kapuuno' urumaton sabap ri Jisus Kristus. Io no makakuasa' am maaya' omporon ra sabuoi-buoi no. Amin.

1 PITRUS 4:7

Pamupusan ru tana' ti mamaar noyo sumuku', pagilalai' am pantataan guang, maa' raginio makapakiasi' kau.

1 PITRUS 5:5

Koson niayuk ramuyun tuu'-bagu kau ngai', gagaya' kano ra ulun matutuo. Pabukat kau ngai', paingganaa' noyo guang mino am pangindangan kano ra rondo' am bokon. Sabap ra mokoondo' tinulisan ra Buuk Kitab, “I Aki Kapuuno' gumula' ra ulun mangasumbung, kaa' motogom io ra ulun minggana' guang.”

1 PITRUS 5:8

Tampos kano am pagilalai' min! Sabap ra Tingganai ru riwato, pantula' mino, mijajawot am mansangal' koson ra singa' maguyum ra osoi ayuk mapatoi nano.

3 JUANIS 1:9

Nanulis aku no rondo' surat mariwa' posoboyon ra pasimpungan ulun Kristian. Kaa' i Diotripis, ondo' masaga' sumauk ra tingganai ru pasimpungan ulun Kristian, kalo masaga' mangkirongog raki'.